Ballade contre les ennemis de la France

(Balade pour France)

1461

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Balade pour France

Rencontré soit de bestes feu getans,

Que Jason vit, querans la toison d'or;

Ou transmué d'omme en beste sept ans,

Ainsi que fut Nabugodonosor;

Ou perte il ait et guerre aussi villaine

6

Que les Troyens pour la prinse d'Elaine;

Ou avallé soit avec Tantalus

Et Proserpine aux infernaux palus;

Ou plus que Job soit en griefve souffrance,

Tenant prison en la tour Dedalus,

11

Qui mal vouldroit au royaume de France!

Quatre mois soit en ung vivier chantans,

La teste au fons, ainsi que le butor;

Ou au Grant Turc vendu deniers contans,

Pour estre mis au harnois comme ung tor;

Ou trente ans soit, comme la Magdalaine,

17

Sans drap vestir de linge ne de laine;

Ou soit noyé comme fut Narcisus,

Ou aux cheveulx, comme Absalon, pendus.

Ou, comme fut Judas, par Desperance;

Ou puist perir comme Simon Magus,

22

Qui mal vouldroit au royaulme de France!

D'Octovien puisse venir le tems:

C'est qu'on luy coule au ventre son tresor;

Ou qu'il soit mis entre meules flotans

En ung moulin, comme fut saint Victor;

Ou transglouty en la mer, sans alaine,

28

Pis que Jonas au corps de la balaine;

Ou soit banny de la clarté Phebus,

Des biens Juno et du soulas Venus,

Et du dieu Mars soit pugny a oultrance,

Ainsy que fut roy Sardanapalus,

33

Qui mal vouldroit au royaulme de France!

Prince, porté soit des serfs Eolus

En la forest ou domine Glaucus;

Ou privé soit de paix et d'esperance:

Car digne n'est de posseder vertus

Qui mal vouldroit au royaulme de France!