Heliand

Fitte VIII

______________________________________________________________________________

630

Thô gifragn ic that sân aftar thiu| slî{d}môd cuning

thero uuârsagono uuord| them uurekkiun sagda,

thea thar an [elilendi]| erlos uuârun

ferran gifarana,| endi he frâgoda aftar thiu,

huan sie an ôstaruuegun| êrist [gisâhin]

635

thana cuningsterron [cuman],| cumbal luihtien

hêdro fon himile.| Sie ni uueldun is im thô helen [eouuiht],

ac sagdun it im sô{d}lîco.| Thô hêt he sie an thana sî{d} faran,

hêt that sie ira ârundi| al undarfundin

umbi thes kindes cumi,| endi the cuning sel{b}o gibôd

640

suî{d}o hardlico,| hêrro Iudeono,

them uuîsun mannun,| êr than sie fôrin [uuestan] for{d},

that sie im eft gicû{d}din,| huar he thana cuning scoldi

sôkean [at] is [sel{d}on];| qua{d} that he thar uueldi mid is gisî{d}un tô,

bedan te them barne.| Than hogda he im te banon uuer{d}an

645

uuâpnes eggiun.| Than eft uualdand god

thâhte uui{d} them thinga:| [he] mahta [athengean] mêr,

gilêstean an thesum liohte:| that is noh lango skîn,

gicû{d}id craft godes.| Thô gengun eft thiu cumbl for{d}

uuânum undar [uuolcnun].| Thô uuârun thea uuîson man

650

fûsa te faranne:| giuuitun [im] for{d} thanan

balda an bodskepi:| uueldun that barn godes

[sel{b}on] sôkean.| Sie ni habdun thanan gisî{d}eas mêr,

[bûtan] that sie thrie uuârun:| uuissun im thingo giskê{d},

uuârun im glauue gumon,| the thea ge{b}a lêddun.

655

Than sâhun sie sô uuîslîco| undar thana uuolcnes skion,

up te them hôhon himile,| huô fôrun thea huuîton sterron

– antkendun sie [that] cumbal godes –,| [thiu] uuârun thurh [Krista] herod

giuuarht te thesero uueroldi.| Thea uueros aftar gengun,

folgodun ferahtlîco| – sie frumide the mahte –

660

antthat [sie] gisâhun,| sî{d}uuôrige man,

berht bôcan godes,| blêc an himile

stillo gistanden.| The [sterro] liohto skên

huuît o{b}ar them hûse,| thar that hêlage barn

uuonode an uuilleon| endi ina that uuîf biheld,

665

thiu thiorne githiudo.| Thô uuar{d} [thero] thegno hugi

blî{d}i an iro briostun:| bi them bôcna forstôdun,

that sie that fri{d}ubarn godes| funden habdun,

hêlagna he{b}encuning.| Thô sie an that hûs innan

mid iro ge{b}un gengun,| gumon ôstronea,

670

sî{d}uuôrige man:| sân antkendun

thea uueros uualdand Krist.| Thea uurekkion fellun

te them kinde an kneobeda| endi ina an cuninguuîsa

gôdan grôttun| endi im thea ge{b}a drôgun,

gold endi uuîhrôc| bi godes têcnun

675

endi myrra thar mid.| Thea man stôdun garouua,

holde for iro hêrron,| thea it mid iro handun sân

fagaro antfengun.| Thô giuuitun im thea ferahton man,

seggi te sel{d}on| sî{d}uuôrige,

gumon an gastseli.| Thar im godes engil

680

slâpandiun an naht| [suue{b}an] gitôgde,

gidrog [im] an drôme,| al so it drohtin self,

[uualdand] uuelde,| [that im thûhte] that man im mid uuordun gibudi,

that sie im thanan ô{d}ran uueg,| erlos fôrin,

li{d}odin sie te lande| endi thana lê{d}an man,

685

Erodesan| eft ni sôhtin,

môdagna cuning.| Thô uuar{d} morgan cuman

uuânum te thesero uueroldi.| Thô bigunnun thea uuîson man

seggean iro sue{b}anos;| sel{b}on antkendun

uualdandes uuord,| huuand sie giuuit mikil

690

bârun an iro briostun:| bâdun alouualdon,

[hêron] he{b}encuning,| that sie môstin is huldi for{d},

giuuirkean is uuilleon,| quâ{d}un that sea [ti] im habdin giuuendit hugi,

[iro] môd [morgan gihuuem].| Thô fôrun eft thie man thanan,

erlos ôstronie,| al sô im the engil godes

695

uuordun giuuîsde:| nâmun im uueg ô{d}ran,

fulgengun godes lêrun:| ni uueldun themu Iudeo cuninge

umbi thes barnes giburd| bodon ôstronie,

sî{d}uuôrige man| seggian [giouuiht],

ac uuendun im eft an iro uuillion.|