Tristrant

Prolog

(1 - 46)

_________________________________________________________________________________________

Sint zu sagene mir geschît

den lûten die man hîr sît

(der bete brengit mich dar zû,

daz ich daz williglîchin tû

5

als ich allir beste kan),

nû wuste ich gerne ab îman

in desir wîse ummir wêre

der sulchir rede gerne entbêre:

des welde ich hîr getrôsten mich.

10

doch man in lâze, her touget sich

an bôsem willen schîre,

ir werdin lîchte mêr wen vîre

die des begint vordrîzen.

die sollin des nicht genîzin

15

daz ir herze sô gar krank is,

wan si ir undankis

mûzen uns entwîchen.

bôsheite mag man sî gelîchen

und dar umbe wol schelten,

20

wan sie sîn billîche engelten.

die selbin warne ich hie mite,

daz sie den selbin bôsin setin

eine wîle varin lâzin

und sich sulchir wîse mâzin

25

die an in wandelbêre sint.

her ist klûkir sinne ein kint,

swer sulche rede vorstôret

die man gerne hôret

und die nutze ist vornomen

30

und gûten lûten wol mag vromen.

ich sage ûch, wolt ir swîgen stille

(wen ez ist mîn wille

daz ich ûch ân alle valscheit

hie kunde die rechten wârheit),

35

als ich daz an dem bûche vant,

wie der hêre Tristrant

zu disir werlde êrst bequam,

und sîn ende wedir nam,

und swaz he wundirs î begîng,

40

und wie herz allez ane vîng

des her in der werlde began,

und wie der listige man

die vrouwin Îsalden irwarp,

und wie sie dorch in irstarp,

45

her dorch sie und sie dorch in.

nû merkit ebin desin sin.