BIBLIOTHECA AUGUSTANA

 

Eilhart von Oberg

um 1170/80

 

 

Tristrant

 

Neue Ränke des Zwerges

(3626 - 3820)

 

_________________________________________________________________________________________

 

 

 

Deme koninge irlangen dô began

biz im der tag quême,

dorch daz, daz he vornême,

ab her ez mit keinen dingen

3630

dar zû mochte gebringen,

daz Tristrant blîben wolde.

dô ted her als he solde

und reit wedir in den walt.

sîn gedanke wârin manchvalt,

3635

ab Tristrant ummir wolde blîben.

he quam zu sîme wîbe

des morgens vrû in die stad.

vil minniglîche her sie bat

daz sie im rechte sagete

3640

swaz sie gesprochin habete

mit Tristrande des nachtes.

sie sprach «hêre, dû machtest

mich der dinge wol vortragin:

ich sach in nî in zwelf tagin

3645

und wil in nimmir mê gesên,

wen mir ist von im geschên

wedirmûtes alsô vil

daz ich in nî mêre wil

mînes dankis schawin.»

3650

«zwâre» sprach her «vrauwe,

dû sâge in in desir nacht,

wen ich was ûf den boim brâcht,

dar ich dich undir sach

und hôrte swaz he zû dir sprach:

3655

daz lâz dir nicht wesin leit

und hilf mir dorch dîn vromigheit

daz her wille hie bestân.

ich wil im machin undirtân

swaz sô in mîme hofe is,

3660

des sî sichir und gewis.»

Dô sprach die vrauwe schône

«um den helt kône

wil ich dir nicht helfin noch enmag.

hînacht, dô he zû mir sprach,

3665

dô schîde wir uns zorniglîchen.

mir ist lîber wêrlîchen,

daz man in hinnen trebe,

denne daz he alhîr blebe.

he mochte mir mit nichte vromen,

3670

und soldez lîchte alsô komen

daz dir dîne lîben holdin

von uns beidin sagin woldin,

sô mêrte sich mîne schande:

wir lâzin Tristranden

3675

rîten swar he wille.»

«neinâ, trûtgeselle,

ez wêre uns beidin nicht gût.

dar abe kêre dînen mût

und hilf mir daz he belîbe:

3680

sîn mag ich nicht vormîden.»

«dar umme soldestû ez ouch tûn.»

«ich torste im nicht sprechin zû.»

he sprach «ich gebe dir die gewalt

daz dû stête bî im wesin salt

3685

alse dicke, als dich des geluste.

nêhest, dô her dich kuste,

dô zornete ich zû sêre.

ez geschît nimmir mêre:

ich wânde ûch tûn recht.

3690

nû hât mir der gûte knecht

und dû sô wol bezeigit

daz ir mich mit trûwin meinit.»

Dô sprach die koninginne

«wiltû in ie wedir winnen,

3695

sô bete die juncfrauwen mîn

daz sie zû dem helde dîn

dorch dînen willen wille gên

unde in dar umme vlên.

ich wêne daz abir wol,

3700

daz sie dar umme werbin sol

als ungerne als ich ez tû.»

dô sprach he Brangênen zû

und begunde sie sêre betin

daz sie im dorch iren gûtin setin

3705

hulfe daz Tristrant belebe.

«war umme hât ir in vortrebin?»

«daz machit, he was zû mir belogin.»

«wer ted daz?» «ein herzoge.»

«der gewinne in ouch wedir!»

3710

«her en mag.» «alsô mag ich ouch redin.»

«sô geschach mir nie sô leide.»

«ist ez wâr?» «jâ ez, bî dem eide.»

«nein, ich tar sîn nicht getrûwin.»

«dû machst wol werbin âne rûwin,

3715

ich wil in sô lîplîchen haldin:

he sal wesin bî Îsaldin

als dicke als im sî lîp.»

«nein, ich trûwe sîn nît,

daz her icht wedir kome,

3720

ouch wêre ez im kein vrome:

im geschêge lîchte alsam.

wil he mînen rât begân,

ich râte im daz her bî zîte

dare von hinnen rîte,

3725

dâr man im rechte frûntschaft bîte.»

der koning dô sîne mîte

Brangênen grôzlîchen bôt,

daz sie hulfe, daz der helt gût

mit im wedir wolde stân.

3730

«swaz ich im leides habe getân,

des wil ich in irgetzin:

sîn bette lâze ich setzin

in mîne kemenâtin,

und her sî vrû und spâte

3735

mit der koninginne.

dar zû hât her wol mîne minne,

wan her ist unschuldich

allir bôsheit wedir mich.»

Brangêne muste entwîchen,

3740

dô sie der koning rîche

alsus inniglîchen bat.

sie quam geretin in die stat

zu Tristrandes herbergin.

sie mochte lîchte werbin,

3745

daz her williglîche bleip:

mit liste sie ez zu samene treip.

do he wedir in den hof quam,

der koning hîz mâge unde man

daz ir nichein en lîze

3750

swaz in Tristrant hîze.

he sprach «he was bî mir belogin

von etlîchem herzogin

den ich wol genennen kan:

der sal immir mêr hân

3755

deste ergir wedir mich.

nebe» sprach der koning rîch

«du salt mîner kemenâten plegin

und bî mir sîn alle wege

und mit der koninginne

3760

(daz merke an dîme sinne)

alse dicke ez dir gevalle,

und zurizzen sie sich alle

vor zorne und vor leide

daz ich dich nicht von mir scheide.»

3765

Dô hîz der hêre Tristrant

in die kemenâten ze hant

Kurnevâle sîn bette tragin.

mit vrouden mochte he vorclagin

swaz im zu leide î geschach.

3770

wen he bî der koninginnen lach

alsô dicke sô her wolde

und eines tages dô solde

der trogsêze rîten jagin.

dô quam he vrû vor dem tage

3775

in deme walde ûf einen berg.

dô sach he den getwerg

vor im in dem holze gân.

dô hîz in der hêre vân,

Tînas der wîgant,

3780

und vrâgete in al zuhant,

waz he in dem walde tête.

daz getwerg sprach, her hête

des koninges hulde vorlorn.

«ich wil dir mînes hêren zorn

3785

helfin wol vorsûnen»

sprach der helt kûne,

«und wil den nît zustôren.»

he hîz in mit im [heim] vûren

und half im der hulde.

3790

wuste he recht sîne schulde,

he hête in eir irhangin.

dô stunt ez nicht gar lange,

eir daz die [bôsin] nîdêre

abir gewunnen swêre,

3795

daz Tristrant sô wol fûr.

bî sîme houbte dô swûr

Antrêd der valsche herzoge,

daz in daz getwerg hête betrogin:

dar umme wolde he in irslân.

3800

dô sprach der lîbelôse man,

von swelchir list so ez quême

daz man des nicht vornême,

«Tristrant hât jâ die koningîn,

als gewis als ich lebende bin.

3805

Wêre mir mîn hêre nicht irbolgin

und woldit ir mir nâch volgin,

ich wolde im die wârheit wîsen.»

die nîdêre abir lîse

sprâchin diz ze dem koninge.

3810

mit wârheit und mit logine

brâchten sie den hêren dar zû,

daz he sprach «ich wil ez tûn:

iz wirt abir vorsûchit,

und ab des got gerûchit,

3815

daz he unschuldig ist,

geselle getwerg, dû wirdist

vorbrant in deme vûre.»

dô sprach der ungehûre

«hêre, jâ, daz ist mir lîp,

3820

ich en rûche, waz mir geschiet.»