Tristrant

Verurteilung der Liebenden

(3943 - 3990)

_________________________________________________________________________________________

Dô der koning rîche

die wârheit offenlîche

3945

von Tristrande vornam

und zû der vrauwen bette quam,

«nurâ helde gûte,

swes ûch sî zu mûte,

daz grîfet an zu desir nôt!»

3950

sie tâtin als her in gebôt

und vîngen Tristranden.

sie bundin in mit bandin,

die hende zû rucke

(daz was sîn [grôz] ungelucke)

3955

recht als eime dîbe.

do geschach nî sô lîbe

den bôsen nîdêren;

ouch wart dem koninge mêre

vil grimme ze mûte

3960

zu Tristrande deme gûten

und zû der koninginne.

he sprach, daz he ir minne

gerne sô gar zubrêche

daz man dar von sprêche

3965

die wîle die welt wêre.

do gebôt der koning hêre

sînen lîbin holdin

daz sie im râtin woldin,

welchin tôd daz her in tête

3970

den man sêre ze laster hête.

Antrêd dô her vore trat

und irteilete im daz rat

und der vrauwin die hort.

sie soldin irarnin sô den mort

3975

den sie hêten begangen.

do begunde deme koninge irlangen

biz daz der tag quême

daz er in den lîp nême

nâch Antrêtes râte.

3980

dô hîz her drâte

wâfin schrîen in die lant.

swaz lûte man dâ heime vant,

die hîz man ze dem gerichte komen.

sie hêtin alle gerne vornomen,

3985

waz sie dâr soldin.

die boten nicht enwoldin

in sagen dar abe,

wan swer daz land mochte haben,

daz er quême ze dem gerichte vrû.

3990

daz volg berichte sich dar zû.