BIBLIOTHECA AUGUSTANA

 

Eilhart von Oberg

um 1170/80

 

 

Tristrant

 

Waldleben

(4491 - 4616)

 

_________________________________________________________________________________________

 

 

 

Dô Kurnevâl der wîgant

quam dâ her Tristrant

was mit der koninginne,

dô wart dem jungelinge

4495

vrôlîche ze mûte.

Tristrant der gûte

wart dô ouch rechte vrô:

Kurnevâle vrâgete he dô,

wâ he den brackin nême.

4500

he sagete im daz he quême

aleine gejagit ûf der vart.

die vroude die dô wart,

die enkan ûch nîman gesagin:

sie vorgâzin swaz sie solden clagin

4505

daz in zu leide î geschach

und retin allen den tach

in den walt sô verre

daz Tristrant der herre

meinte wêrlîche.

4510

ab in sûchte al daz rîche,

die envundin in nimmir dâre.

dô hîlt der helt mâre

und sprach zu sîme gesellin,

sie musten dâ entwellin.

4515

Al dâr sâzin sie hin nedir.

sie torsten nicht komen wedir

nergin ûz dem walde.

Kurnevâl vil balde

holzes und loubes genûg

4520

sîme hêren ze samene trûg,

und machtin eine hutte.

die vrauwe torste sich nicht entschutten:

die pfert hîlt sie die wîle.

dô wârin sie âne spîse

4525

mê denne andirhalbez jâr.

ich wil ûch sagin vor wâr

daz die armen lûte

nicht âzin wen gekrûte

daz sie in dem walde vundin.

4530

swâ sie daz sûchen kundin,

daz was ir beste spîse,

und sô Tristrant der wîse

mit sîme bogin icht irschôz

und sîner liste genôz

4535

daz he etlîchin visch gevîng

in eime wazzer daz dâ gîng

mit eime angel den he habete.

vor wâr mir man daz sagete,

Tristrant wêre der êrste man

4540

der daz angelin î began.

ouch hôrte ich sagin mêre,

daz he der êrste wêre

der daz erdêchte,

wie man bracken brêchte

4545

ûf wildes verte:

sie hâtin ein lebin herte

in dem wilden walde

her und die schône Îsalde.

îdoch was in daz ein kinder spel,

4550

wen sie hâtin dâ bî vroude vel

von der grôzen minne.

sô ich mich besinne,

Kurnevâl leit eine die nôt:

daz he nicht irlag tôd,

4555

daz was ein michel wundir.

nû merkit al besundir,

wie sie ir ding vîngen an,

wen ich ûch berichten kan:

 

Tristrant und die koningîn

4560

und Kurnevâl der knape sîn

ledin [alle drî] grôzin kummer:

swer nû sulchin hunger

ein jâr solde lîden

(ich kan des nicht vorswîgen),

4565

he muste wesin hungers tôd;

wen sie hâtin wedir vûr noch brôt.

ouch sô âzin ire ros

nicht wen loup gras unde mos:

daz mag ûch wol grôz wundir haben.

4570

ouch gîngen in die cleider abe

von weter und von regene:

daz die vrauwe und die degene

nicht zu tôde irvroren

dô sie die cleider gar vorloren,

4575

daz hât mich wundir gar genûg.

îdoch sô sagit uns daz bûch

und ouch die lûte vor wâr,

daz sie mêr denne zwei jâr

in dem wilden walde lâgin

4580

und nî dorf noch stad gesâgin.

Dô hâte Tristrant einen sete,

des volgete im die vrauwe mete:

swen sie sich gelegetin

und mit ein andir redeten

4585

daz ez in dûchte genûch,

sîn swert er ûz der scheide zôch

und legete ez zwischin sich und sie:

daz en wolde der helt nie

dorch kein ding gelâzen.

4590

wan sie en soldin slâfen,

daz swert en lêge zwischin in.

daz was ein vromder mannes sin

und quam im doch zu heile sît,

wen ez quam zu einer zît

4595

ein des koninges weideman

zû der hutten gegân

eines morgenes vrû

heimlîche hin zû.

dô wârin sie entslâfin.

4600

dô he gesach daz wâfin

und zu hant irkande

den hêren Tristrande,

do begunde her dannen gâhen

daz sie sîn nicht en sâhen

4605

und quam ze dem koninge rîche.

ted he dô icht lestirlîche

daz her ime sagete

swaz her gesên habete

unde wie her sie vant?

4610

der koning bat in dô zuhant

daz her swige al stille

dorch sînen willen

und in selbin dare brêchte.

wes her dâ mit gedêchte,

4615

daz mag ûch grôz wundir hân,

wan ich ez ûch nicht sagen kan.