BIBLIOTHECA AUGUSTANA

 

Das Nibelungenlied

1190/1200

 

 

Handschrift B

 

24. Aventiure

 

___________________________________________________

 

 

<Do> Ecel zv dem Rine     sine boten sande

do flvgen disiv mære     von lande ze lande

mit boten harte snellen     er bat vnd ovch gebot

zv siner hohgecite     des holte maniger da den tot

Di boten dannen fvren     vzer Hivnen lant

zv den Bvfgonden     dar waren si gesant

nach drin edeln kvenegen     vnd ovch nach ir man

si solden chomen Ecele     des man do gahen began

1421

Hinze Bechelaren     chomen si geritten

da diente man in gerne     daz enwart da niht vermitten

Rvedeger sinen dienest     enbot vnd Gotelint

bi in hin [361a] hinze Rine     vnd ovch ir beider liebez chint

Sine liezens ane gabe     von in niht scheiden dan

daz deste baz gefveren     di Ecelen man

Vten vnd ir chinden     enbot do Rvedeger

sine heten in so wæge     deheinen margraven mer

1423

<Si> enbvten ovch Prvnhilte     dienest vnd gvt

stætechliche triwe     vnd willigen mvot

do si di rede vernamen     di boten wolden varn

si bat div margavinne     got von himele bewarn

1424

ê daz di boten chomen     wol dvrch Peyrlant

Wærbel der vil snelle     den gvten bisschoff vant

waz der do sinen frivnden     hince Rine enbot

daz ist mir niht gewizen     niwan sin golt also rot

Gap er den boten ze minne     riten er si lie

do sprach der <bissof> Bilgrim     vnde sold ich si sehen hie

mir wære wol ce mvte     di swester svene min

wand ich mach vil selten     zv zin chomen an den Rin

1426

Welhe wæge si fveren     ce Rine dvrch div lant

des chan ich niht bescheiden     ir silber vnt gewant

daz nam in niemen     man vorht ir herren zorn

ia was gewaltech     der edele chvnech wol geborn

1427

Inner tagen zwelfen     chomens an den Rin

ze Wormez zv dem lande     Wærbel vnd Swemmelin

do sagt man div mære     den chvenegen vnd ir man

da chomen boten vremde     Gventher do vragen began

Do sprach der vogt von Rine     wer tvt vns daz bechant

von wannen dise vremden     riten in daz lant

daz enwesse niemen     vnze daz si sach

Hagen von Tronege     do ce Gventhern sprach

1429

Vns choment niwiv mære     des wil ich iv veriehen

di Eceln videlære     di han ich hie gesehen

si hat iwer swester     gesendet an den Rin

si sveln vns dvrch ir herren     groze willechomen sin

1430

Si ritten al bereite     fver den palas dan

ez gefvren nie herlicher     fversten spileman

des chveneges ingesinde     enpfiengen sa cehant

man gap in schoen herberge     vnt hiez behalten ir gewant

1431

Ir reisechleider waren     rich vnd so wol getan

ia mohten si mit eren     fver [361b] den kvenich gan

deren wolden si niht mere     da ce hove tragen

ob ir iemen rvchte     di boten hiezen iz da sagen

1432

In der selben maze     man ovch livte vant

di ez vil gerne namen     den wart ez gesant

do leiten an di geste     verre bezer wat

als ez boten chvenege     ce tragen herliche stat

1433

Do gie mit vrlovbe     da der kvenech saz

daz Eceln gesinde     gerne sach man daz

Hagen zvetechliche     gegen den boten spranch

vnt enpfie si minnechliche     des sageten im di knappen danch

Dvrch div chvnden mære     vragen er began

wi sich Ecel gehabte     vnd sine man

do sprach der videlære     daz lant gestvnt ni baz

noch so vro di livte     nv wizzet endechliche daz

1435

Si giengen zv dem wirte     der palas der was vol

do enpfie man di geste     so man von rehte sol

so gvetlichez grvezen     in ander chvenige lant

Wærbel vil der recken     da bi Gvnthern vant

1436

Der chvenech gezogenliche     grvzen si began

sit willechomen ir beide     ir Hivnen spilman

vnd iwer hergesellen     hat ivch her gesant

Ecel der vil riche     zv der Bvrgonden lant

Si nigen dem chvnige     do sprach Wærbelin

dir enbivtet holden dienest     der liebe herre min

vnd Criemhilt din swester     her in dize lant

si habent vns iv recken     vf gvte triwe gesant

1438

Do sprach der kvenech riche     der mære bin ich vro

wi gehabt sich Ecel     so vragt der degen so

vnd Criemhilt min swester     vzzer Hivnen lant

do sprach der videlære     div mære tvn ich iv bechant

1439

daz sich noch nie gehabten     deheine livte baz

danne si sich gehabent beide     wizzet daz

vnd allez ir gedigene     di mage vnd ovch ir man

si vrevten sich der verte     do wir schieden von dan

Genade siner dieneste     di er mir enboten hat

vnd miner swester     sit ez also stat

daz si lebent mit frevden     dr kvenech vnd sine man

wand ich doh der mære     gefragt sorgende han

1441

Di zwene ivnge chvenege     di waren ovch nv chomen

si heten disiv mære     alrerst do vernomen

dvrch siner swester liebe     di boten gerne sach

Giselher der ivnge     zv zin minnechlichen sprach [362a]

1442

Ir boten <soldet> vns groze willechome sin

ob ir dicher woldet     her riten an den Rin

ir fvendet hie di frivnde     di ir gerne moehtet sehen

iv solde hie ce lande     vil wenich leides geschehen

Wir <trvwen> iv aller eren     sprach do Swemmelin

ine chonde iv niht bedivten     mit den sinnen min

wi rehte minnechlichen     iv Ecel enboten hat

vnt iwer edel swester     der dinch in hohen eren stat

1444

Genade vnde triwe     mant ivh des kveneges wip

vnt daz ir ie was wæge     iwer herce vnt iwer lip

vnt ce vorderste dem chvenege     sin wir her gesant

daz ir gervchet riten     in daz Eceln lant

1445

Daz wir ivch des bæten     vil vast vns daz gebot

Ecel der riche     iv allen daz enbot

ob ir <ivch> iwer swester     niht sehen woldet lan

so wold er doch gerne wizzen     waz er iv hete getan

Daz ir in also vremdet     vnt ovch siniv lant

ob <iv> div chveneginne     wære ni bechant

so moeht er doch verdienen     daz ir in rvchet sehen

swenne daz ergienge     so wær im liebe geschehen

1447

Do sprach der chvenech Gvnther     veber dise siben naht

so chvend ich div mære     wes ich mich han bedaht

mit den minen frivnden     di wile svlt ir gan

in iwer herberge     vnd svelt vil gvote rwe han

1448

Do sprach aber Wærbelin     vnt moeht daz geschehen

daz wir mine vrowen     chonden ê gesæhen

Vten di vil richen     ê wir schveffen vns gemach

Giselher der edele     do vil zvehtechlichen sprach

Daz sol iv niemen <wenden>     welt ir fver si gan

ir habt miner mvter     willen gar getan

want si sihet ivch gerne     dvrch di swester min

vrovn Criemhilden     ir svlt ir wellechomen sin

1450

Giselher si brahte     da er di vrowen vant

di boten sach si gerne     von der Hivnen lant

si grvztes minnechliche     dvrh ir tvgende mvt

so sagten ir div mære     di boten <hoffsh> vnde gvt

1451

Ia enbivtet iv min vrowe     so sprach Swemmelin

dienest vnde triwe     mohte daz gesin

daz si ivch diche sæhe     ir svlt gelovben daz

so wær ir in der werlde     mit deheinen vrevden baz

Do sprach div chveneginne     des enmach [362b] niht gesin

swie gerne ich dicke sæhe     di lieben tohter min

so ist mir leider ce verre     des edeln chveneges wip

nv si immer sælich     ir vnd Eceln lip

1453

Ir svlt mich lazen wizen     ê irz gervmet hie

wenne ir wider wellet     ine gesach so gerne nie

boten in langen ziten     denne ich ivch han gesæhen

di chnappen ir do lobten     daz si daz liezen geschehen

1454

Zen herbergen fvren     di von Hivnen lant

do het der kvenech riche     nach frivnden sin gesant

Gventher der edele     vragte sine man

wi in div rede geviele     vil maniger do sprechen began

Daz er wol moehte riten     in Eceln lant

daz rieten im di besten     di er da vnder vant

ane Hagen eine     dem was ez grimme leit

er sprach zem kvenige tovgen     ir habt iv selben wider seit

1456

Nv ist iv doch gewizen     waz wir haben getan

wir mvegen immer sorge     zv Criemhilde han

wand ich slvch ze tode     ir man mit miner hant

wie getorste wir riten     in daz Eceln lant

1457

Do sprach der kvnech riche     min swester lie den zorn

mit chvsse minnecliche     si hat vf vns verchorn

daz wir ir ie getaten     ê si von hinnen reit

ezen si et Hagen danne     iv einem widerseit

Nv lat ivch niht betragen     sprach Hagene swes si iehen

di boten von den Hivnen     welt ir Criemhilde sehen

ir mvegt da verliesen     di ere vnd ovch den lip

ia ist vil lanchræche     des kvenech Eceln wip

1459

Do sprach zv dem rate     der fverste Gernot

sit ir von schvlden     fverhtet da den tot

in hivnisschen richen     solde wirz dar vmbe lan

wir ensæhen vnser swester     daz wære vil vbele getan

1460

Do sprach der fverste <Giselher>     zv dem degene

sit ir ivch schvldech wizet     frivnt Hagene

so svlt ir hi beliben     vnt ivch wol bewarn

vnt lazet di getverren     zv miner swester mit vns varn

Do begonde zvernen     von Tronege der degen

ine wil daz ir iemen     fverhtet vf den wegen

der getverre riten     mit iv ce hove baz

sit ir niht welt erwinden     ich sol iv wol erzeigen daz

1462

Do sprach der dvchenmeister     Rvmolt [363a] der degen

der vremden vnt der chvnden     mohtet ir wol heizen pflegen

nach iwer selbes willen     wand ir habet vollen rat

ich wæne niht daz Hagene     ivch noch vergiselt hat

1463

Welt ir niht volgen Hagene     iv rætet Rvmolt

wand ich iv bin mit triwen     vil dienestlichen holt

daz ir svlt hi beliben     dvrch den willen min

vnde lat den kvenech Ecel     dort bi Criemhilde sin

Wi chvnde iv in der werlde     immer sanfter wesen

ir mvegt vor iwern finden     harte wol genesen

ir svlt mit gvten chleidern     zieren wol den lip

trinchet win den besten     vnt minnet wærtlichiv wip

1465

Dar zv git man iv spise     di besten di ê gewan

in der werlt kvenech deheiner     ob des niht moeht ergan

ir soldet noh beliben     dvrch iwer schoene wip

ê ir so chintliche     soldet wagen den lip

1466

Des rat ich beliben     rich sint iwer lant

man mach iv baz erloesen     hie heime div pfant

danne da cen Hivnen     wer weiz wie iz da gestat

ir svlt beliben herren     daz ist der Rvmoldes rat

Wir wellen niht beliben     sprach do Gernot

sit daz vns min swester     so minnechlich enbot

vnt Ecel der riche     zwiv solde wir daz lan

der dar niht gerne welle     der mach hi heime bestan

1468

Des antwrte Hagene     lat ivh vnblinden niht

mine rede dar vmbe     swi halt iv geschit

ich rat iv an den triwen     welt ir ivch bewarn

so svlt ir zv den Hivnen     vil gewærliche varn

1469

Sit ir niht welt erwinden     so besendet iwer man

di besten di ir vindet     oder inder mveget han

so wel ich vz in allen     tvsent ritter gvt

sone mag iv niht gewerren     der argen Criemhilde mvt

Des wil ich gerne volgen     sprach der kvenech zehant

do hiez er boten riten     witen in siniv lant

do brahte man der helde     driv tvsent oder mer

sine wanden niht cerwerben     also grozlichiv ser

1471

Si ritten vroeliche     in Gventheres lant

man hiez in allen geben     ross vnt ovh gewant

di da varen solden     von Bvergonden dan

der kvenech mit gvtem willen     der vil manegen gewan

1472

Do hiez von Tronege Hagene     Danchwart der brvder sin

ir beider rech [363b] en ahzech     fveren an den Rin

di chomen ritterliche     harnassh vnt gewant

fvrten di vil snellen     in daz Gvntheres lant

Do chom der chvene Volker     ein edel spilman

zv der hovereise     mit drizech siner man

di heten soelech gewæte     ez moeht ein chvenech tragen

daz er zen Hivnen wolde     daz hiez er Gventhere sagen

1474

Wer der Volker wære     daz wil ich <ivch> wizen lan

er was ein edel herre     im was ovch vndertan

vil der gvten rechen     in Bvrgonden lant

dvrch daz er videln chonde     do was <er> der spilman genant

1475

Hagne welte tvsent     di het er wol bechant

vnt swaz in starchn striten     gefrvemt het ir hant

oder swaz si ie begiengen     des het er vil gesehen

den chonde anders niemen     niwan frvemcheite iehen

Di boten Criemhilde     vil sere da verdroz

wande ir vorhte cir herren     div was harte groz

si gerten tægeliche     vrlovbes von dan

des en gonde in niht Hagene     daz was dvrch liste getan

1477

Er sprach zv sinem herren     wir sveln daz bewarn

daz wir si lazen riten     ê daz wir selbe varn

dar nach in siben tagen     in Eceln lant

treit vns iemen argen villen     deist vns deste baz bechant

1478

Sone mach ovch sich vrov Criemhilt     bereiten niht dar zv

daz vns dvrh ir rate     iemen schaden tv

hat aber si den willen     ez mach ir leide ergan

wir fveren mit vns hinnen     so manigen vz erwelten man

Schilde vnd sætele     vnt allez ir gewant

daz si fveren wolden     in Eceln lant

daz was bereitet nv gar     vil manigem chvenem man

di boten Criemhilde     hiez man fver Gvntheren gan

1480

Do di boten chomen     do sprach Gernot

der kvenech wil gevolgen     des vns Ecel her enbot

wir wellen chomen gerne     ce siner hohgecit

vnd sehen vnser swester     daz ir des ane zwifel sit

1481

Do sprach der kvenech Gventher     chvennet ir vns gesagen

wenne si div hohzit     oder in welhen tagen

wir dar chomen solden     do sprach Swemmelin [364a]

cen næhesten svenewenden     sol si wærliche sin

Der kvenich in erlovbte     des was noh niht geschehen

ob si wolden gerne     frvon Prvennhilde sehen

daz si fver si solden     mit sinem willen gan

daz vnderstvnt do Volker     daz was ir liebe getan

1483

Iane ist min vrowe Prvennhilt     nv niht so wol gemvt

daz ir si mveget schowen     sprach der ritter gvt

bitet vnz morgn     so lat mans ivch sehen

do si sie wanden schowen     done chvndes niht geschehen

1484

Do hiez der fverste <riche>     er was den boten holt

dvrch sine selbes tvgende     tragen dar sin golt

vffe den breiten schilden     der moht er vile han

ovch wart in richiv gabe     von sinen vrivnden getan

Giselher vnd Gernot     Gere vnd Oertwin

daz si ovch milte waren     daz taten si wol shin

also riche gabe     bvten si di boten an

daz si se vor ir herren     niht getorsten enpfan

1486

Do sprach zv dem kvenige     der bote Wærbelin

her kvenich lat iwer gabe     hi ze lande sin

wir mvegen ir doch niht fveren     min herre iz vns verbot

daz wir iht gabe næmen     ovch ist es harte lvecel not

1487

Do wart der vogt von Rine     da von vil vngemvt

daz si versprechen wolden     so riches kveneges gvt

doch mvosen si enpfahen     sin golt vnd sin gewant

daz si mit in fvorten     sit in Ecelen lant

Si wolden sehen Vten     ê si schieden dan

Giselher der snelle     der braht di spileman

fver sine mvoter Vten     div vrowe enbot von dan

swaz si ern hete     daz wær ir liebe getan

1389

Do hiez div chveneginne     ir porten vnd ir golt

geben dvrch Criemhilde     want der was si holt

vnt dvrch den kvenech Ecel     den selben spileman

si mohtenz gern enpfahen     ez was mit triwen getan

1490

Vrlovp genomen heten     di boten nv von dan

von wiben vnd von mannen     vroelich si do dan

fvoren in ce Swaben     dar hiez si Gernot

sine helde leiten     daz ez in niemen missebot

Do sich di von in schieden     di ir solden pflegen

herschaft div Eceln     vridet vf allen wegen

des en nam in niemen     ross noch ir gewant

si ilten harte balde     in daz Ecelen lant

1492

Swa si der vrivnt iht wessen     daz taten si den chvnt

daz di Bvrgonden     in vil [364b] chvrzer stvnt

choemen her von Rine     in der Hivnen lant

dem bissoffe Pilgerime     wart ovch daz mære bechant

1493

Da si fver Bechelaren     di straze nider ritten

man saget ez Rvedger     daz enwart niht vermitten

vnde Gotelinde     des margraven wip

daz si sehen solde     des wart vil vroelich ir lip

Gahen mit den mæren     sah man di spilman

Eceln si fvnden     in dr stat ze Gran

dienest veber dienest     der man im vil enbot

sageten si dem kvenige     vor liebe wart er frevden rot

1495

Do div chveneginne     div mære reht ervant

daz ir brvder solden     chomen in daz lant

do was ir wol ce mvte     si lonte den spileman

mit vil grozer gabe     daz was ir ere getan

1496

Si sprach nv sagt beide     Wærbel vnd Swemmelin

welhe mine mage     cer hohzit wellen sin

der besten di wir ladeten     her in dize lant

nv sagt waz redete Hagene     do er div mære bevant

Er sprach der chom cer sprache     an einem morgen frv

lvecel gvter sprveche     redet er der zv

do si di reise lobten     her in Hivnen lant

daz was dem grimmem Hagene     gar cem tode genant

1498

Ez chvment iwer brvder     di chvenige alle dri

in herlichem mvote     swer mer da mite si

der mære ich enedechlichen     wizzen nine chan

ez lobt mit in riten     Volker der chvene spileman

1499

Des enbær ich harte lihte     sprach des kveneges wip

deich immer sæhe     den Volkeres lip

Hagenen bin ich wæge     der ist ein helt vil gvt

daz wir in sæhen mvezen     des stat mir hohe der mvt

Do gie div chveneginne     da si den kvenech sach

wi rehte minnechliche     criemhilt do sprach

wi gevallent iv div mære     lieber herre min

des ie min wille gerte     daz sol nv verendet sin

1501

Din wille deist min vrevde     sprach der kvenich do

ine wart min selbes mage     ni so rehte vro

ob si iemer chomen solden     her in miniv lant

dvrh liebe diner frivnde     so ist min sorge verswant

1502

Des chveneges ammetlivte     di hiezen veber al

mit gesidele rihten     palas vnd sal

gegen den lieben gesten     di in da solden chomen

sit wart von in dem chvenege     vil michel weinen benomen [365a]