BIBLIOTHECA AUGUSTANA

 

Das Nibelungenlied

1190/1200

 

 

Handschrift C

 

2. Aventiure

 

___________________________________________________

 

 

<Auentv> von Sivride wie der erzogen wart

 

Do wohs in nider landen     eins edeln kuniges chint

des vater der hiez Sigemvnt     sin mvter Sigelint

ineiner richen burge     witen wol bechant

nidene bi dem Rine     div was ze Santen genant

20

Sifrit was geheizen     der snelle degen gvot

er versvchte vil der riche     dvrch ellenthaften mvot

durch sines libes sterche     svochter fremdiv lant

hey waz er sneller degene     sit ze Buregonden vant

21

Ê daz der degen chvne     vol whse zeman

do het er solhiv wnder     mit siner hant getan

da von man immer mere     mac singen vn sagen

des wir indisen stunden     mvzen vil von im gedagen

22

In sinen besten ziten     bi sinen iungen tagen

man mohte michel wnder     von Sifriden sagen

waz eren an im whse     vn wie schone was sin lip

des heten in zeminne     div vil wetlichen wip

<MAn> zoh in mit dem vlize     als im daz wol gezam

von sin selbes tvgenden     [2r]waz zvht er an sich nam

des wrden sit gezieret     sines vater lant

daz man in zallen dingen     so rehte herlichen vant

24

Uil selten ane hvote     man riten lie daz kint

in hiez mit wæte zieren     sin mvter Sygelint

sin pflagen ovch die wisen     den ere was bekant

des moht er wol gewinnen     beidiv lvot vn lant

25

Nv was er inder sterche     daz er wol waffen trvoch

swes er da zv bedorfte     des lag an im genvoch

do begvnder sinnen     werben schoniv wip

die trvoten wol mit eren     den sinen wetlichen lip

26

Do hiez sin vater <Sigemvnt>     chunden sinen man

er wolde hochgecite     mit lieben friunden han

div mære man do furte     in vremder kunige lant

den gesten vn den chunden     gap man rosse vn ovch gewant

Swa man vant deheinen     der ritter solde sin

von art der sinen mage     div edeln kindelin

dv ladet man zv dem lande     durch die hochgecit

mit samt dem iungen kunige     swert genamen si sit

28

Von der hochgecite     man mohte wnder sagen

Sigemvnt vn Sigelint     die chvnden wol beiagen

mit gvte michel ere     des teilte vil ir hant

des sah man vil der fremden     zvzin riten indaz lant

29

Vier hundert swert degene     die solden tragen chleit

mit dem iungen kunige     vil manic schoniv meit

mit werche was vnmvzich     wande si in waren holt

vil der edeln steine     die frowen leiten in daz golt

30

die si mit porten wolden     wrchen vf ir wat

den stolzen swertdegenen     des enwas niht rat

der wirt der hiez do sidelen     vil manigem chvnen man

zeinen svnewenden     da er die hochgecite wolde han

Do gie zeinem mvnster     vil manic richer kneht

vn vil der edeln ritter     die wisen heten reht

daz si den tumben dienten     als in was ê getan

si heten kvrzwile     vn ovch vil maniger vrovden wan

32

Got man zen eren     ein messe sanc

do wart von den lvten     vil michel der gedranch

da si zeritter wrden     nach ritterlicher ê

mit also grozzen eren     daz wetlich immer me erge

33

Si liefen da si funden     gesatelt manic march

in hofe Sigemundes     der bvhurt wart so starch

daz man erdiezen horte     palas vn sal

die hochgemvten degene     heten vrolichen scal

34

Von wisen vn von tumben     man horte manigen stoz

daz der schefte brechen     gein dem lufte doz

trunzvne sach man vliegen     fur den palas dan

da sahen churzewile     beidiv wip vn ovch die man

Der chunich bat iz lazen     do zoch man dan div march

man sach ovch da zebrochen     uil manige bukkel starch

vil der edeln steine     geuellet vf daz gras

an liehten schildes spangen     von hvrten daz geschehen was

36

Do giengens wirtes geste     da man in sitzen riet

vil der edeln spise     si von der mvode schiet

vn win der aller beste     den man mit vollen trvoch

den vremden vn den [2v]kunden     bot man eren da genvoch

37

Solcher kurcewile     si pflagen al den tac

vil der varnder diete     rwoe sich bewac

si dieten nach der gabe     die man da riche vant

des wart mit lobe gezieret     allez Sigemundes lant

38

Der herre hiez do lihen     sinen svn den iungen man

lant un purge     als er e het getan

den sinen swertgenôzen     gap do vil sine hant

do liebt in do div reise     daz si chomen in daz lant

Div hochgecite do werte     vnz an den sibenden tac

Sigelint div riche     nach alten siten pflac

durch ir kindes liebe     geben rotez golt

si kundez wol gedienen     daz si ir svne warn holt

40

Lutzel deheinen varnden     armen man da vant

rosse vn kleider     daz stvop in von der hant

sam si ze lebene heten     mer deheinen tac

ich wene ie ingesinde     so grozzer milte gepflac

Mit lobelichen eren     schiet sich div hochgecit

von des landes herren     hort man wol sit

daz si den iungen wolden     zeime vogete han

des enwolde in do niht volgen     Sifrit der wêtlich man

42

Sit daz noch beide lebten     Sigemunt vn Sigelint

niht wolde tragen krone     noch ir liebez kint

doch wolder wesen herre     fur allen den gewalt

des in den landen vorhte     der degen kvn vn balt

43

In dorfte niemen schelten     sit do er wafen genam

ia gerwoete vil selten     der reche lobesam

svchte niwan striten     sin ellenthaftiv hant

tet in zallen ziten     in vremeden richen wol bekant