BIBLIOTHECA AUGUSTANA

 

Das Nibelungenlied

1190/1200

 

 

Handschrift C

 

9. Aventiure

 

___________________________________________________

 

 

Auentv wie Sivrit ze Wormez in botschefte fvor

 

Do> si gevarn warn     vollen niwen tage

do sprach der chvne Hagene     nv merchet waz ih sage

ir svomt ivch mit den mæren     ze Wormeze an den Rin

die iwern boten solden     nv zen Burgonden sin

538

Do sprach der kunich Gvnther     ir habt mir reht geseit

nv hereitet ivch zer verte     ritter vil gemeit

wande wir in disen ziten     ander niemen han

der dar mvge geriten     do sprach der vbermvete man

539

Nv wizzet     lieber herre     ine bin niht bote gvot

ich wil ivch eins bewisen     der ez doch gerne tvot

Sivrit den chvnen     svlt ir iz niht verdagen

dvrch iwer swester liebe     getarrer erz iv nimmer versagen

540

Er sande nach dem rechen     der herre chom zehant

er sprach     sit daz wir nahen     heim in miniv lant

so solde ich boten senden     der lieben swester min

vn ovch miner mvoter     daz wir nv nahen an den Rin

541

Des bitte ich ivch     her Sivrit     daz ir die reise tvot

daz ez mit mir verdiene     div edel maget gvot

mit allen minen frivnden     ritter vil gemeit

do sprach der degen chvne     der reise bin ich iv bereit

Nv enbietet swaz ir wellet     des wirdet niht verdaget

dvrch die vil minneklichen     so wirt ez gar gesaget

zwiv solde ih dir verzihen     die ich in hercen han

swaz ir durch si gebietet     daz ist allez getan

543

So sagt miner mvoter     vn ovch der swester min

daz wir an dirre verte     in hohem mvote sin

lat wizzen [21r]mine brveder     wie wir geworben han

vn ander unser frivnde     sol man div mære ovch horen lan

544

Chriemhilde vn mine mvoter     svlt ir niht verdagen

min vn Prvnh' dienest     svlt ir in beiden sagen

vn allem ir gesinde     vn allen minen man

dar nach ie ranc min herce     wie wol ich daz erworben han

545

Vn sagt ovch minen brvdern     vn andern frivnden min

daz si mit grozem vlize     dar zv gewarnt sin

vn sol in vnsern landen     div mære wizzen lan

ich wil mit Prvnhilde     vil groze hochgecite han

546

Vn bitet mine swester     so si daz habe vernomen

daz ich mit minen gesten     si ze lande chomen

daz si mit vlize enpfahe     die trvtinne min

daz wil immer mere     mit triwen dienende sin

Do der vil chvne reche     vrlovp von im genam

vn ovch von Prvnhilde     der ritter lobesam

reit in grozen frevden     ze Wormeze an den Rin

ez enchunde in allen landen     ein bote bezzer niht gesin

548

Mit vier vn zweinzech rechen     ze Wormeze er do reit

des chvniges chom er ane     do daz wart geseit

allez daz gedigene     vor iamer heten not

si vorhten daz ir herre     dort beliben wære tot

549

Die helde erbeizet waren     vil hohe stvont ir mvot

vil schier in chomen beide     die ivnge kvnige gvot

vn al daz hofegesinde     der herre Gernot sprach

do er sinen <brvder>     niht bi Sivride ensach

550

Willechomen     ritter edele     ir svlt vns hoeren lan

wa ir minen brvder     <den> kunic     habt verlan

div Prvnhilde sterche     in wæn vns hat benomen

so ist vns ir hohiv minne     harte schedelich chomen

Iv edeln rechen beiden     vn al den magen sin

enbivtet sinen dienest     der hergeselle min

den liez ih wol gesunden     er hat mich her gesant

ze boten mit den mæren     daz ich iv div tæte <bekant>

552

Ir svlt daz ahten schiere     swie so daz geschehe

daz ich iwer mvoter     vn iwer swester sehe

die sol ich lazen horen     waz in enboten hat

Gunther der chvnic riche     des dinch in hohen eren stat

553

Do sprach der ivnge Giselher     da svlt ir dar gan

da habt ir miner mvoter     vil liebe an getan

div hat doch michel sorge     vmbe den brvoder min

si sehent ivch beide gerne     des svlt ir gar ane angest sin

554

Do sprach der herre Sivrit     swaz ich in dienen chan

daz sol vil willechlichen     mit triwen sin getan

wer sagt nv den frowen     daz ich wil dar gan

daz tvon ich     sprach do Giselher     der vil wætlich man

Der stolze chvene reche     ze siner mvoter sprach

vn ovch zv siner swester     da er si beide sach

vns ist chomen Sivrit     der helt vz Niderlant

in hat min brvoder Gunther     ze Rine her von im gesant

556

Er bringet vns div mære     wiez vmben chvnich ste

nv svlt ir im erlovben     daz er ze hove ge

er bringet div rehten mære     her von Islant

noch was den ede[21v]len frowen     vil michel sorgen bechant

557

Si sprvngen nach ir wæte     do leiten si sich an

si baten Sivride     do hin ze hove gan

daz tet er willechliche     wand er si gerne sach

Chriemhilt div vil schone     zvo zim do gvetlichen sprach

558

Sit willechomen     herre Sivrit     ritter lobelich

war ist chomen min brvoder     Gvnther der kunic rich

von Prvnhilde sterche     den wæn wir haben verlorn

owe mir armen meide     daz ih danne ie wart geborn

Do sprach der ritter chvene     nv gebt mir botenbrot

ir edeln ivncfrowen     ir wænet ane not

ich liez in wol gesunden     daz tvn ich iv bechant

er vn div schone Prvnhilt     hant mich iv beiden her gesant

560

Si enbietent iv ir dienest     mit triwen in daz lant

vil richiv kuniginne     daz tvon ih iv bechant

nv lazet iwer weinen     si wellent schiere chomen

sine het in langen citen     so lieber mære niht vernomen

561

Mit sneblanchen geren     ir ovgen wolgetan

wischte si nah trehenen     danchen si began

dem boten dirre mære     div ir da waren chomen

do was ir michel trvoren     vn ovch ir weinen benomen

562

Den boten bat man sizzen     des was er bereit

do sprach div ivncfrowe     mir wære niht ze leit

ob ich ze botenmiete     iv solde gebn min golt

dar zvo sit ir ze riche     ich wil iv svs immer wesn holt

563

Ob ich nv eine hete     sprach er     drizzech lant

so enpfienge ich doch vil gerne     gabe vz iwer hant

do sprach div minnekliche     nv sol ez sin getan

si hiez ir kamærære     nach der botenmiete gan

Vier vn zweinzich povge     mit gesteine gvot

die gab si im ze miete     do stvnt also sin mvot

ern woldes niht behalden     er gab ez sa zehant

ir nehstem ingesinde     die cr zer chemenaten vant

565

Ir mvter bot ir dienest     in gvtlichen an

ich sol iv sagen mere     sprach do der chvene man

wes ivch der kunich bitet     swenner nv chvmet her

daz weller immer dienen     daz ir leistet sinen ger

566

Die sine <richen> geste     bitet er ivch wol enpfan

des manter iwer vil sere     irn svlt des ovch niht lan

irn <ritet> im zegegene     fvr <Wormez> vf den sant

des sit ir von dem kunige     mit grozen triwen gemant

567

Do sprach div minnekliche     des bin ich vil bereit

swaz ich im kan gedienen     daz ist im vnverseit

in vrivntlichen triwen     so sol ez sin getan

do merte sich ir varwe     die si vor liebe do gewan

Ez enwart nie bote enpfangen     deheines fvrsten baz

getorste si in chvssen     div frowe tæte daz

wie rehte minnekliche     er von den frowen schiet

do taten Bvrgonden     als in Sivrit do geriet

569

Sindolt vn Hvnolt     vn Rvmolt der degen

die mvsen vil vnmvoze     zvo den citen pflegen

rihten daz gesidele     als in daz was bechant

des kuniges ambetlvte     man do mit arebeiten vant

570

<Ortwin> vn Gere     des [22r]rechen kvniges man

die sanden allenthalben     nach den frivnden dan

vn chvnten in die hochgecite     div da solde sin

da bereiten sich engegene     div vil schoenen magedin

571

Der palas vn die wende     was allez vber al

gezieret gegen den gesten     der Gvnthers sal

wart vil wol bezimbert     dvrch manigen vremden man

div selbe groze hochgecite     hvop vil vrolichen an

Do riten allenthalben     die wege dvrch daz lant

der drier kunige mage     die het man besant

daz si den solden warten     die in da wolden chomen

do wart vz den chisten     richer wæte vil genomen

573

Do sagt man div mære     daz man nv riten sach

den chvnich mit sinen gesten     do hvop sich vngemach

von des volches chreften     in Burgonden lant

hey waz man sneller degene     bi frowen Prvnhilde vant

574

Do sprach div schone Chriemhilt     ir miniv mægedin

di an dem antpfange     mir mir wellen sin

die svochen vz den chisten     div aller besten chleit

di si mvgen vinden     daz si den frowen ovch geseit

575

Do chomen ovch die rechen     die hiezen tragen dar

die herlichen sætele     nach rotem golde var

die frowen solden riten     ze Wormeze an den Rin

bezzir pferit gereite     chvnde ninder gesin

576

Hey was da liehtes goldes     von <den> moren schein

ovch lagen an den zovmen     vil manic edel stein

die gvldinen schemil     ob liehten pfellen gvot

braht man dar den frowen     si waren hoh gemvot

Begvrtet mit den siden     vil schoen vn starch

braht man den frowen     vil wnneklichiv march

div richen fvrbvege     sach man div more tragen

von den besten siden     da von iv iemen chvnde sagen

578

Sehs vn ahzech frowen     hiez man chomen dan

die gebende trvogen     zv Chriemhilde stan

chomen di vil schonen     vn heten liehtiv chleit

do wart ovch wol gezieret     vil manich minneklichiv meit

579

Fvnfzech vn viere     von Buregonden lant

so waren ez die beste     die man ze hove vant

di sah man <valevahsen>     vnder liehten porten gan

<des> Gvnther an si gerte     daz wart mit vlize getan

580

Von liehten richen pfellen     verre voz heiden lant

si trvgen vor den gesten     so manic gvot gewant

daz ir genvoge schoene     ze rehte wol gezam

er wære in swachem mvote     der ir deheiner wære gram

Von zobel vn ovch von harme     vil chleider man da vant

da wart vil wol gezieret     manich arm vn hant

mit <bovgen> ob den siden     die si da solden tragen

iv enchvnde dizze vlizen     zende niemen gesagen

582

Vil manigen gvrtel spæhen     gvot vn lanch

vber vil richiv kleider     manic wiziv hant do swanch

vber roche ferrans     vn pfelle vz Arabin

daz si in al der werlde     bezzer nimmer chvnden sin

583

Ez wart in fver gespenge     manic schoniv meit

gen     næt vil minnekliche     ez moeht ir wesn leit

der ir vil liehtiv varwe     niht lvohte [22v]gegen der wat

so schones ingesindes     nv niht kuniges chvnne hat

584

Do die vil minneklichen     nv trvgen ir gewant

di si da fvren solden     die chomen al zehant

der hochgemvten rechen     ein vil michel chraft

man trvg ovch dar mit schilden     vil manigen esschinen schaft