BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

3. Aventiure

 

___________________________________________________

 

 

Aventivre wie sivrit

ze wormze chome

 

44

Den herren mveten selten | deheiniv hercenleit

er horte sagn maere | wi ein scoeniv meit

waere in bvrgonden | ce wunsche wolgetan

von der er sit vil vrevden | vnt ovch arbeit gewan

45

div ir vnmazen scoene | was vil witen chvnt

vnt ir hoh gemvete | zvo der selbn stvnt

an der ivnchfrovwen | so manech helt ervant

ez ladete vil der geste | in daz gvnthers lant

46

swaz man der werbenden | nah ir minne sach

chrimhilt in ir sinne | ir selber nie veriach

daz si deheinen wolde | ce eime trvote han

er was ir noch vil vremde | dem si wart sider vndertan

47

do gedaht vf hohe minne | daz siglinde kint

ez was ir aller werben | wider in ein wint

er mohte wol verdienen | scoener frovwen lip

sit wart div edele chrimhilt | des chvenen sivrides wip

48

im rieten sine mage | vnt genvoge sine man

sit er vf staete minne | wolde tragen wan

daz er dan eine wurbe | div im mohte zemen

do sprach der chvene sivrit | so wil ich chiemhilden nemen

49

dif scoenen ivnchfrovwen | von bvrgonden lant

dvrch ir vnmazen scoene | daz ist mir wol bechant

nie keiser wart so riche | der wolde haben wip

im zaeme wol ce minnen | der richen chvneginne lip

50

disiv selbn maere | gehorte sigmvnt

ez reiten sine livte | davon wart im chvnt

der wille sines chindes | des was im harte leit

daz er werbn wolde | di vil herlichen meit

51

ez gevriesc ovch siglint | des edelen kvneges wip

si hete groze sorge | vm ir chindes lip

wan si wol erchande | gvnthern vnt sine man

den gewerp man dem degene | sere leiden began

52

do sprach der chvene sivrit | vil lieber vater min

an edeler frovwen minne | wold ich immer sin

ih en wurbe dar min herce | vil groze liebe hat

swaz iemn reden chvnde | des ist decheiner slahte rat

53

vnt wildv niht erwinden | sprach der chvnech do

so bin ich dins willen | waerlichen vro

vnt wil dirz helfen enden | so ich allerbeste chan

doch hat der chvnech gvnther | vil manegen hohferten man

54

ob ez ander niemn waere | wan hagene der degn

der chan mit vbermvete | der hohverte pflegn

daz ich des sere fverhte | ez mvg vns werden leit

ob wir werbn welln | di vil herlichen meit

55

waz mag vns daz gewerren | sprach do sivrit

swaz ih friwentliche | niht ab in erbit

daz mach svs erwerbn | mit ellen da min hant

ich truowe an in ertwingen | beide livte vnd lant

56

do sprach der fvrste sigmvnt | din rede div ist mir leit

wan wurden disiv maere | ce rine geseit

dv ne dorftest nimmer | geriten in daz lant

gvnther vnt gernot | di sint mir lange bechant

57

mit gewalte niemn | erwerben mach di magt

so sprach der kvnec sigmvnt | daz ist mir wol gesagt

wilt aber dv mit rechen | riten in daz lant

ob wir iht habn vriwende | di werdent sciere besant

58

des en ist mir niht ce mvote | sprach abr sivrit

daz mir svlen rechen | ce rine volgen mit

dvrh deheine hervart | daz waere mir vil leit

damit ich solde ertwingen | di vil waetlichn meit

59

si mach wol svs erwerben | da min eines hant

ich wil selbe zwelfte | in gvnthers lant

dar svlt ir mir helfen | vater sigmvnt

do gap man sinen degenen | ze chleidern gra vnd bvnt

60

do vernam ovch disiv maere | sin mvoter siglint

si begvnde trvoren | vm ir liebez chint

daz vorhte si verliesen | von gvnthers man

div edele chvneginne | vil sere weinen began

61

sivrit der herre | gie da er si sach

wider sine mvoter | er gvetliche sprach

frovwe ir svlt niht weinen | dvrh den willen min

ia wil ich an sorge | vor allen wiganden sin

62

vnd helfet mir der reise | in bvrgonden lant

daz ich vnt mine rechen | habn soelch gewant

daz also stolce helde | mit eren mvgen tragn

des wil ich iv genade | mit triwen waerlichen sagn

63

sit dv niht wil erwinden | sprach frov siglint

so hilf ich dir der reise | min einigez chint

mit der besten waete | di riter ie getrvoch

dir vnt dinen gesellen | ir svlt ir fveren genvoch

64

do neich der kvneginne | sivrit der ivnge man

er sprach ih wil cer verte | niemn mer han

niwan zwelf rechen | den sol man prveven wat

ich wil daz sehen gerne | wi ez vm chrimhilde stat

65

do sazen scoene frovwen | naht vnd tach

daz lvcel ir deheiniv | ruowe gepflach

vnce man geworhte | di sivrids wat

er wolde siner reise | habn deheiner slahte rat

66

sin vater hiez im cieren | sin riterlich gewant

damit er wolde rvemen | daz sigmvnds lant

vnt ir vil liehten brvenne | di wurden ovch bereit

vnt ir vesten helme | ir schilde scoen vnde breit

67

do nahet in ir reise | cen bvrgonden dan

vm si begvnde sorgen | wib vnde man

ob si immer chomn solden | heim wider in daz lant

di helde in hiezen sovmen | beide wafen vnt gewant

68

ir ross div waren scoene | ir gereite goldes rot

lebt iemn vbermveter | des en was niht not

denne waere sivrit | vnt di sine man

vrlovbes er do gerte | zvo den bvrgonden dan

69

in werten trvrechlichen | der chvnech vnt sin wip

er troste minnechlichen | do ir beider lip

er sprach ir svlt niht weinen | dvrch den willen min

immer ane sorge | svlt ir mines libes sin

70

ez was leit den rechen | ez weinte ovch manech meit

ich waen in het ir herce | rehte daz geseit

daz in so vil der friwende | davon gelaege tot

von scvlden si do chlageten | des gie in waerliche not

71

an dem sibenden morgen | ce wormez vf den sant

riten di vil chvenen | allez ir gewant

was von rotem golde | ir gereite wolgetan

ir ross in giengen ebene | des chvenen sivrids man

72

ir schilde waren niwe | lieht vnde breit

vnt vil scoen ir helme | da ce hove reit

sivrit der vil chvene | in gvnthers lant

man gesach an helden | nie so herlich gewant

73

div ort ir swerten giengen | nider vf den sporn

ez fvorten scaerpfe gern | di riter vzerchorn

sivrit der fvort ir einen | wol zweier spannen breit

der zvo sinen ecken | vil harte vreislichen sneit

74

die goltvarwen zovme | fvortens an der hant

sidiniv fvrbvege | svs chomens in daz lant

daz volch si allenthalbn | chapfen an began

do liefen in engegene | vil der gvnthers man

75

die hohgemveten rechen | riter vnd chneht

di giengen zvo den herrn | daz was michl reht

vnt enpfiengen dise geste | in ir herrn lant

vnt namen in di moere | mit den schilden von der hant

76

div ross si wolden dannen | ziehen an gemach

sivrit der vil chvene | wi snelle er do sprach

lat vns sten di moere | mir vnt minen man

wir wellen sciere hinnen | des ich vil gvoten willen han

77

swem sin chvnt div maere | der sol mich niht verdagn

wa ich den kvnec vinde | daz sol man mir sagn

gvnthern den vil richen | vz bvrgonden lant

do sagt ez im ir einer | dem ez rehte was bechant

78

welt ir den herrn vinden | daz mach vil wol gescehn

in ienem sale witen | da han ich in gesehn

bi den sinen helden | da svlt ir hine gan

da mvgt ir bi im vinden | vil manegen herlichen man

79

nv waren dem kvnge | div maere geseit

daz da chomen waeren | riter vil gemeit

di fvortn wizze brvenne | vnt herlich gewant

sin erchande niemn | in der bvrgonden lant

80

den kvnech des hete wunder | von wannen choemn dar

di herlichen rechen | in wate lieht gevar

vnt mit so gvoten scilden | niwe vnd breit

daz im daz sagte niemn | daz was gvnthere leit

81

des antwurt dem kvnege | von mecen oertwin

rich vnde chvene | moht er wol sin

sit wir ir niht erchennen | nv svlt ir heizen gan

nach minem oeheim hagenen | den svlt ir si sehen lan

82

dem sint chvnt div riche | vnt ovch div vremden lant

sint im di herrn chvende | daz tvot er vns bechant

der chvnech bat in bringen | vnt di sinen man

man sach in herliche | mit rechen hinz hove gan

83

waz sin der kvnech wolde | des vragte hagene

ez sint in mime hvse | vnchvnde degene

di niemn hie bechennet | habt ir si ie gesehn

des svlt ir mir her hagene | der rehten warheite iehn

84

daz tvon ich sprach hagne | ceinem venster er da gie

sin ovge er do wenchen | zvo den gesten lie

wol behagte im ir geverte | vnt ovch ir gewant

si waren im vil vremde | in der bvrgonden lant

85

er sprach von swannen choemn | di rechen an den rin

ez moehtn selbe fversten | oder fverstn boten sin

ir ross div waeren scoene | ir chleider harte gvot

von swannen daz si fveren | si waeren hohgemvot

86

also sprach do hagne | ich wil des wol veriehn

swi ich sivriden | nimer hab gesehn

so wil ich wol gelovben | swi ez darvmbe stat

daz ez si der reche | der dort so herlichen gat

87

er bringet niwe maere | her in dize lant

di chvenen nibelvnge | slvoch des heldes hant

schilbvnch vnt nibelvngen | div richen chvneges kint

er frvmte starchiv wunder | mit siner grozen chrefte sint

88

da der helt aleine | an alle helfe reit

er vant vor eime berge | daz ist mir wol geseit

bi nibelvnges horde | vil manegen chvenen man

di waren im e vremde | vnz er ir chvnde da gewan

89

hort der nibelvnges | der was gar getragn

vz eime holem berge | nv hoeret wunder sagn

wi in wolden teilen | der nibelvnge man

daz sach der degen sivrit | den helt ez wunderen began

90

er chom zvo zin so nahen | daz er di helde sach

vnt ovch in di degene | ir einer drvnder sprach

hie chvmt der starche sivrit | der helt von niderlant

vil seltsaeniv maere | er an den niblvngen vant

91

den rechen wol enpfiengen | scilbvnch vnt nibelvnch

mit gemeinem rate | di edeln fvrsten ivnch

den scaz in baten teilen | den waetlichen man

vnt gerten des mit vlize | der herre lobn inz began

92

er sach so vil gesteines | so wir hoeren sagn

hvndert chanzwaegene | ez moehten niht getragn

noch me des roten goldes | von nibelvnge lant

daz sold in allez teilen | des chvenen sivrides hant

93

do gaben si im ce miete | daz nibelvnges swert

si waren mit dem dienste | vil vbele gewert

den in da leisten solde | sivrit der helt gvot

ern chvndez niht verenden | si waren zornech gemvot

94

si heten da ir frivnde | zwelf chvene man

daz starche risen waren | waz chvndez si vervan

di slvoch sit mit zorne | div sivrids hant

vnt rechen siben hvndert | twang er von nibelvnge lant

95

mit dem gvotem swerte | daz hiez balmvnch

dvrch di starchen vorhte | vil manech reche ivnch

di si cem swerte heten | vnt an den chvenen man

daz lant zvo den bvergen | si im taten vndertan

96

darzvo di richen chvnge | di slvog er bede tot

er chom von albriche | sit in groze not

der wande sine herrn | rechen da cehant

vnz er di grozen sterche | sit an sivride vant

97

do ne chvnd im niht gestriten | daz starche getwerch

alsam di lewen wilde | si liefen an den perch

da er di tarenkappen | sit albriche an gewan

do was der hordes herre | sivrit der vreisliche man

98

di da torsten vehten | di lagen alle erslagn

den scaz den hiez er balde | fveren vnde tragn

da in davor da namen | di nibelvnge man

albrich der vil starche | do di kamern gewan

99

er mvos im sweren eide | er diente im so sin chneht

aller hande dinge | was er im gereht

so sprach von tronege hagene | daz hat er getan

also grozer chrefte | nie mer reche gewan

100

noch weiz ich an im mere | daz mir ist bechant

einen lintrachen den | slvoch des heldes hant

er badet sich in dem blvote | sin hvt wart hvrnin

des snidet in chein wafen | daz ist diche worden scin

101

wir svln den herrn | enpfahen deste baz

daz wir iht verdienen | des ivngen rechen haz

sin lip der ist so chvene | man sol in holden han

er hat mit siner chrefte | so menegiv wunder getan

102

do sprach der kvnech riche | dv maht wol habn war

nv sich wi degenliche | er stet in strites var

er vnt di sinen degene | der vil chvene man

wir svlen im engegene | hin nider zvo dem rechen gan

103

daz mugt ir sprach do hagene | wol mit ern tvon

er ist von edelem chvnne | eines richen kvnegs svn

er stet in der gebaere | mich dvnchet wizze christ

ez en sin niht chleiniv maere | darvmb er her geriten ist

104

do sprach der kvnech des landes | nv si vns willechomn

er ist edel vnd chvene | daz han ich wol vernomn

des sol ovch er geniezen | in bvrgonden lant

do gie der herre gvnther | da er sivriden vant

105

der wirt vnt sine rechen | enpfiengen so den gast

daz in an ir zvehten | vil wenech iht gebrast

des begvnd in nigen | der waetliche man

daz si in heten grvezen | so rehte scone getan

106

mich wundert dirre maere | sprach der kvnech cehant

von wannen ir edel sivrit | sit chomn in dizze lant

oder waz ir wellent werben | ze wormez an den rin

do sprach der gast cem kvnege | daz sol ivch vnverdaget sin

107

mir wart gesaget maere | in mins vater lant

daz hie bi iv waeren | daz het ich gern erchant

di chvensten rechen | des han ich vil vernomn

di ie chvnech gewunne | darvmbe bin ich her bechomn

108

ovch hoere ich iv selben | der degenheite iehn

daz man kvnec deheinen | chvener hab gesehn

des redent vil di livte | vber elliv disiv lant

nv wil ich niht erwinden | vnz ez mir werde bechant

109

ich bin ovch ein reche | vnt solde chrone tragn

ich wil daz gerne fvegen | daz si von mir sagn

daz ich hab von rehte | livte vnde lant

darvmbe sol min ere | vnt ovch min hovbet wesen pfant

110

nv ir sit so chvene | als mir ist geseit

so ne rvoch ich ist daz iemn | lieb oder leit

ich wil an iv ertwingen | swaz ir mvget han

lant vnde bvrge | daz sol mir werden vndertan

111

den kvnec hete wunder | vnt sine man alsam

vm disiv maere | di er hie vernam

daz er des hete willen | er naeme im siniv lant

daz horten sine degene | do wart in zvernen bechant

112

wie het ich daz verdienet | sprach gvnther der degn

des min vater lange | mit eren hat gepflegn

daz wir daz solden vliesen | von iemannes chraft

wir liezen vbele schinen | daz wir ovch pflegn riterschaft

113

ine wil es niht erwinden | sprach aber der chvene man

ez en mvge von dinen ellen | din lant den fride han

ich wil es alles walden | vnd ovch div erbe min

erwirbest dvz mit sterche | div svelen dir vndertaenech sin

114

din erbe vnt ovch daz mine | svlen geliche lign

sweder vnser einer | am andern mach gesign

dem sol ez allez dienen | di livte vnd ovch div lant

daz widerredete hagene | vnt gernot cehant

115

wir han des niht gedingen | sprach do gernot

daz wir iht lande ertwingen | daz iemn drvmbe tot

gelige vor heldes handen | wir habn richiv lant

div dienent vns von rehte | ze niemn sint si baz bewant

116

mit grimmigem mvote | da stvonden friwende sin

do was ovch darvnder | von mecen oertwin

der sprach disiv svone div | ist mir harte leit

iv hat der starche sivrit | vnverdient widerseit

117

ob ir vnt iwer brvoder | hetet niht di wer

vnd ob er danne fvorte | ein gancez kvneges her

ih trvote wol erstriten | daz der chvene man

diz starchez vbermveten | von waren schvlden mvese lan

118

daz zvrnde harte sere | der helt von niderlant

er sprach sich sol vermezzen | niht wider mich din hant

ich bin ein kvnec riche | so bistv kvneges man

ia ne dorften mich din zwelve | mit strite nimmer bestan

119

nach swerten rief do sere | von mecen oertwin

er mohte hagenen swestersun | von tronege vil wol sin

daz der so lange dagete | daz was dem kvnege leit

do vnderstvond ez gernot | der riter chven vnt gemeit

120

er sprach ce oertwine | lat iwer zvrnen stan

vns en hat der herre sivrit | solhes niht getan

wir en mvgenz noch wol sceiden | mit zvehten deist min rat

vnt habn in ce friwende | daz vns noch loblicher stat

121

do sprach der starche hagne | vns mach wol wesen leit

allen dinen degenen | daz er ie gereit

dvrch striten her ce rine | | er soltez habn lan

im heten mine herren | soelher leide niht getan

122

des antwurte sivrit der chreftige man

mvet ivch daz her hagene | daz ich gesprochen han

so sol ich lazen chiesen | daz die hende min

wellent vil gewaltech | hie cen bvrgonden sin

123

daz sol ich eine wenden | sprach aber gernot

allen sinen degenen | reden er verbot

iht mit vbermvete | des im waere leit

do gedahte ovch sivrit | an di herlichen meit

124

vie zaeme vns mit iv striten | sprach aber gernot

swaz helde nv darvnder | mvese ligen tot

wir hetens lvcel ere | vnt ir vil chleinen frvm

des antwurte im do sivrit | des kvnech sigmvndes svn

125

warvmbe bitet hagne | vnt ovch oertwin

daz er niht gaht striten | mit den friwenden sin

der er hie so manegn | cen bvrgonden hat

si mvosen rede vermiden | daz was gernotes rat

126

er svlt vns wesen willechomn | so sprach daz voten kint

mit iwern gesellen | di mit iv chomn sint

wir svlen iv gerne dienen | ich vnt di mage min

do hiez man den gesten | scenchen den gvnthers win

127

do sprach der wirt des landes | allez daz wir han

gervochet irs nach eren | daz si iv vndertan

vnt si mit iv geteilet blib vnde gvot

do wart der herre sivrit | ein lvcel sanfter gemvot

128

do hiez man in gehalten | allez ir gewant

man svochte herberge | di besten di man vant

sivrids chnehten | man scvof in gvot gemach

den gast man sit vil gerne | da cen bvrgonden sach

129

man bot im michel ere | darnach ce manegn tagn

tvsent stvnden mere | dann ich iv chan gesagn

daz het versolt sin ellen | ir svlt gelovben daz

in sach vil lvcel iemen | der im waere gehaz

130

sich vlizen chvrzwile | di kvnege vnt ovch ir man

so was er ie der beste | swes man da began

des en chvnd im gevolgen niemen | so michel was sin chraft

so si den stein wurfn | oder schvzen den scaft

131

swa so bi den frovwen | dvrch ir hofscheit

chvrcewile pflagen | di riter vil gemeit

da sah man ie vil gerne | den helt von niderlant

er het vf hohe minne | sine sinne gewant

132

swes man ie begvnde | des was sin lip bereit

er trvog in sime sinne | ein minnechliche meit

vnt ovch in ein div frovwe | di er noh nie gesach

div im in heinliche | vil diche gvetlichen sprach

133

swenne vf dem hove wolden | spilen da div kint

riter vnd chnehte | daz sach vil diche sint

chrimhilt dvrch div venster | div kvneginne her

deheiner chvrzwile | bedorftes in den citen mer

134

wesser daz in saehe | di er in hercen trvoch

da het er chvrzewile | immer von genvoch

saehen sie siniv ovgen | ich wil wol wizen daz

daz im in dirre werlde | chvnde nimmer werden baz

135

swenner er bi den helden | vf dem hove stvont

also noch di livte | dvrch chvrcewile tvont

so stvont so minnechliche | daz siglinde kint

daz in dvrch hercenliebe | trvote manech frovwe sint

136

er gedaht ovch manege cite | wi sol daz gescehen

daz ich di maget edele | mit ovgen mvge sehen

di ich von hercen minne | vnt lange han getan

div ist mir noch vil vremde | des mvoz ich trvorich stan

137

so ie di kvnege riche | riten in ir lant

so mvosen ovch di rechen | mit in al cehant

damite mvos ovch sivrit | daz was der frovn leit

er leit ovch von ir minne | diche michel arbeit

138

svss wont er bi den herrn | daz ist alwar

in gvnthers lande | vollechlich ein iar

daz er di minnechlichen | di cite nien gesach

davon im sit vil liebe | vnt ovch vil leide gescach