BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

8. Aventiure

 

___________________________________________________

 

 

Aventivre wie sifrit nah den nibelvngen

sinen rechen fvor

 

482

Dannen gie do sifrit | cer porten vf den sant

in siner tarnkappen | da er ein schiffel vant

daran so stvnt vil tovgen | sigemvndes chint

er fvrt ez balde dannen | alsam ez wete der wint

483

den schefmeister sach niemen | daz schiffel sere vloz

von sifrides crepften | di waren also groz

si wanden daz ez fvrte | ein svnder starcher wint

nein ez fvrte sifrit | der schonen sigelinden chint

484

bi des tages citen | vnt in der einen naht

chom er ce einem lande | mit grozlicher maht

wol hvndert langer raste | vnt dan noch paz

di hiezen nibelvnge | da er den grozen shaz besaz

485

der helt der fvr aleine | vf einen wert vil breit

daz shif gebant vil balde | der ritter vil gemeit

er gie zv einem berge | darvf ein bvrch stvnt

vnt svchte herberge | so di wegemveden tvnt

486

do chom er fvr di porten | verslozzen im div stvnt

ia hvten si ir eren | so noch di livte tvnt

anz tor begvnde bozen | der vnchvnde man

daz was wol behivtet | do vant er innerthalben stan

487

einen vngefvegen | der der bvrge pflach

bi dem zallen citen | sin geweffen lach

der sprach wer ist der bozet | so vaste an daz tor

do wandelt sine stimme | der herre sifrit davor

488

er sprach ich pin ein recke | nvo entslivz vf daz tor

ich erzvorne ir etslichen | noch hivte davor

der gerne sampfte laege | vnt hete sin gemach

daz mvete den portnaere | do daz her sifrit gesprach

489

nv hete der rise chvene | sin gewaeffen angetan

sinen helm vf sin hovbt | der vil starche man

den schilt vil balde zvhte | daz tor er vf do swief

wi reht grimmechlichen | er an sifriden lief

490

wi er getorste wechen | so manigen chvenen man

da wurden slege swinde | von siner hant getan

do begond im shaermen | der herliche gast

do shvf der portnaere | daz sin gespenge cebrast

491

von einer isenstangen | des gie dem helde not

ein teil begonde fvrhten | sifrit den tot

do der portnaere | so crepftechliche slvch

darvmbe was im waege | sin herre sifrit genvch

492

si striten also sere | daz al div bvrch ershal

do hort man daz diezen | in nibelvnges sal

er twanch den portnaere | daz er in sit gebant

div mere wurden chvnde | in al nibelvnge lant

493

do hort daz grimme striten | verre dvrch den berch

albrich der vil chvene | ein wildiz getwerch

er waffende sich balde | do lief er da er vant

disen gast vil edelen | da er den risen gebant

494

albrich was vil grimme | starch was er genvch

helm vnd ringe | er an dem libe trvch

vnt eine geisel swaere | von golde an siner hant

do lief er harte snelle | da er sifriden vant

495

siben chnoffe swaere | di hiengen vor daran

damit er vmb der hende | den schilt dem chvenem man

slvch so pitterlichen | daz im des vil cebrast

des libes chom in sorge | do der waetliche gast

496

den sherm er vor der hende | gar cebrochen swanch

do stiez er in di sheiden | ein waffen daz was lanch

den sinen chameraere | wold er niht slahen tot

er shonte siner zvehte | als im div tvgent daz gebot

497

mit starchen sinen handen | lief er albrichen an

do viench er bi dem parte | den altgrisen man

er zogten vngefvege | daez er lvte schre

zvht des ivngen heldes | div tet albriche we

498

lvte rief der chvene | lat mich genesen

vnt moeht ich iemens eigen | an einen recken wesen

dem swure ich des eide | ich waer im vndertan

ich dient iv e ich stverbe | sprach der listige man

499

er bant ovch albrichen | alsam den risen e

di sifrides creffte | taten im vil we

daz getwerch begonde vragen | wi sit ir genant

er sprach ich haeize sifrit | ich wand ich waer iv wol bechant

500

so wol mich dirre maere | sprach albrich daz getwerch

nv han ich wol erfvnden | div degenlichen werch

daz ir von waren shvlden | mvegt landes herre wesen

ich tvn swaz ir gebietet | daz ir mich lazet genesin

501

do sprach der herre sifrit | ir svlt balde gan

vnt bringet mir der rechen | der besten di wir han

tvsent nibelvnge | daz mich di hi gesehen

warvmbe er do des gerte | des hort in niemen veriehen

502

dem risen vnt albriche | loset er div bant

do lief albrich balde | da er di recken vant

er wachete sorgende | der nibelvnge man

er sprach wol vf ir helde | ir svlt ce sifride gan

503

si sprvngen von den betten | vnt waren vil bereit

tvsent ritter snelle | wurden wol gecleit

si giengen da si fvnden | sifriden stan

da wart ein shone grvzen | ein teil mit werchen getan

504

vil chercen was enzvendet | man shancte im lvter tranch

daz si shiere chomen | er sagts in allen danch

er sprach ir svlt von hinnen | mit mir vber flvt

des vant er vil bereite | di helde chven vnt gvt

505

wol drizech hvndert recken | di waren shiere chomen

vz den wurden der besten | tvsent do genomen

den brahte man ir helme | vnt ander ir gewant

want er si fveren wolde | in daz prvnnhilde lant

506

er sprach ir gvte ritter | daz wil ich iv sagen

ir svlt vil richiv chleider | da ce hove tragen

want vns da saehen mvezen | vil minnechlichiv wip

darvmme svlt ir zieren | mit gvter waete den lip

507

an einen morgen frw | hvoben si sich dan

waz sneller geverten | sifrit do gewan

si fvrten ros div gvten | vnt herlich gewant

si chomen ritterliche | in daz prvnhilde lant

508

do stvenden in den cinnen | div minnechlichiv chint

do sprach div chveneginne | weiz iemen wer di sint

di ich dort sihe vliezen | so verre vf dem se

si fverent segle riche | di sint noch wizer danne der sne

509

do sprach der chvenich von rine | ez sint mine man

di het ich an der verte | hi nahen bi verlan

di han ich besendet | di sint nv vrove chomen

der herlichen geste | wart vil groze wargenomen

510

do sah man sifride | vor in einem shepffe stan

in herlicher waete | vnde ander manigem man

do sprach div chveneginne | her chvonech ir svlt mir sagen

sol ich di geste enpfahen | oder sol ich grvezen si verdagen

511

er sprach ir svlt engegen in | fvor den palas gen

ob wir si gerne sehen | daz si daz wol versten

do tet div chveneginne | als ir der chvenich geriet

sifride mit dem grvze | si von den andern shiet

512

man shvf in herberge | vnt behilt in ir gewant

do was so vil der geste | chomen in daz lant

daz si sich allenthalben | drvngen in der sharn

do wolden di vil chvenen | haeim ce lande varn

513

do sprach div chveneginne | ich wold im wesen holt

der geteiln chvnde | min silber vnt min golt

min vnt des chveneges gesten | des ich so vile han

des antwurte danchwart | des chvnich giselheres man

514

vil edliv chvneginne | lat mich der slvozel pflegen

ich truwe iz so geteilen | sprach der chvene degen

swaz ich erwerbe shande | di lat min eines sin

daz er milte waere | daz tet der degen shin

515

do sich hagenen brvder | der slvezel vnderwant

so manige gabe riche | gap des heldes hant

swer einer marche gerte | dem wart so vil gegeben

daz di armen alle | mvsen vroliche leben

516

wol bi hvndert pfvnden | gap er ane zal

genvge in richer waete | giengen vor dem sal

di nie davor getrvgen | so helichev kleit

daz gevriesh div chvnegin | ez was ir waerliche leit

517

do sprach div vrowe here | her chvenich ich hetes rat

daz iwer chameraere | mir wil der minen wat

lazen niht beliben | er swendet mir min golt

der iz noch vnderstvende | dem wold ich iemer wesen holt

518

er git so riche gabe | ia waenet des der degen

ich habe gesant nach tode | ich wils noch lenger pflegen

ovch truwe iz wol verswenden | daz mir min vater lie

so milten chameraere | gewan noch chvneginne nie

519

do sprach von tronege hagene | vrowe iv si geseit

ez hat der chvenech von rine | golt vnd kleit

also vil ce gebene | daz wir des haben rat

daz wir von hinen fveren | iht der prvnnhilde wat

520

nein dvrh mine liebe | sprach div kvenegin

lazet mich erfvellen | zweinceh leitschrin

von golde vnt von siden | daz geben sol min hant

so wir chomen veber | in daz gvntheres lant

521

mit edelem gesteine | ladete man div shrin

ir selber chameraere | damite mvsen sin

si ne woldes niht getruwen | dem gvntheres man

gvnther vnt hagene | darvmb lachen began

522

do sprach div chveneginne | wem laz ich miniv lant

div sol e bestipfften | min vnt iwer hant

do sprach der kvnich edele | nv haeizzet her gan

der iv darzv gevalle | den svl wir voget wesen lan

523

ein ir hohesten mach | div vrowe bi ir sach

er was ir mvter bruder | zv dem div vrowe sprach

nv lat ev sin bevolhen | mine bverge vnt ovch div lant

vnze daz hi rihte | des chvenich gvntheres lant

524

do welt si ir gesindes | zweinzech hvndert man

di mit ir varen solden | ze bvergonden dan

zvo ienen tvsent recken | vz nibelvnge lant

523.4

si rihten sich zer verte | man sach si reiten vf den sant

525

si fvrte mit ir dannen | sehs vnt ahzech wip

darzv wol hvndert maegde | vil shone was in der lip

sin svomten sich niht langer | si wolden gahen dan

di si da heime liezen | hey waz der weinen began

526

in tvgentlichen zvehten | si rvmte ir eigen lant

si chvst ir vrivnt di nahen | di si bi ir vant

mit gvtem vrlovbe | si chomen vf den se

zv ir vaterlande | chom div vrowe nimmer me

527

do horte man vf der verte | maniger hande spil

aller chvercewile | heten si do vil

do chom in zv ir reise | ein rehter wazzerwint

si fvren von dem lande | mit vil grozen vrevden sint

528

do ne wolde si den herren | niht minnen vf der vart

ez wart ir kvrcewile | vnz in ir hus gespart

ce wormz zv der bvorge | ceiner hochgezit

da si vil vrevdenriche | chomen mit ir helden sit