BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

17. Aventiure

 

___________________________________________________

 

 

Aventivre wie chriemhilt ir man klagte

vnd wie man in begrvp

 

1002

Do erbiten si der nahte | vnd fvren vber rin

von helden chvnde nimmer | wirs geiaget sin

ein tier daz si slvgen | daz weinten edliv chint

ia mvsen sin engelten | vil gvte wigande sint

1003

von grozer vebermvete | mveget ir horen sagen

vnd von eislicher rache | do hiez hagen tragen

sifrit also toten | von nibelvnge lant

fver eine chaemenaten | da man criemhilde vant

1004

er hiez in tovgenlichen | legen an di tver

daz sin da solde vinden | so si gienge dafver

zer mettine | e daz ez wurde tach

der div vrowe criemhilt | vil selten deheine verlach

1005

man lvte da cem mvenster | nach gewoneheit

vrov criemhilt div schoene | wachte manige meit

ein lieht bat si ir bringen | vnd ovch ir gewant

do chom ein kameraere | da er sifriden vant

1006

er sah in blvtes roten | sin wat was elliv naz

daz ez sin herre waere | nine wesse er daz

hin cer kemenaten | daz lieht trvg er an der hant

von dem vil leidem maere | div vrov criemhilt ervant

1007

do si mit ir vrowen | cem mvnster wolde gan

do sprach der chameraere | ir svlt stille stan

ez lit vor disem gadme | ein ritter tot erslagen

do begonde criemhilt | vil harte vmmaezliche chlagen

1008

e daz si reht erfvnde | daz iz waere ir man

an di hagenen vrage | denchen si began

wi er in solde vristen | do wart ir erste leit

von ir was allen vrevden | von sinem tode widerseit

1009

do seich si zv der erden | daz si niht en sprach

di schoenen vrevdelosen | ligen man do sach

criemhilde iamer | wart vmmazen groz

do erschre si nach vncreffte | daz al div chemenate erdoz

1010

do sprach daz gesinde | waz ob ez ist ein gast

daz blvt ir vz dem mvnde | von herceniamer brast

do sprach si ez ist sifrit | der min vil lieber man

ez hat geraten prvennhilt | daz ez hat hagen getan

1011

do vrowe hiez sich wisen | da si den helt vant

si hop sin hovbt schoene | mit ir vil wizzen hant

swi rot ez waere von blvte | si het in schiere erchant

do lach vil iemerliche | der helt von nibelvnge lant

1012

do rief vil trvrechliche | div vrowe milt

owe mich mines leides | nv ist dir din shilt

mit swerten niht verhowen | div list ermorderot

wesse ich wer iz het getan | ich riet im immer sinen tot

1013

allez ir gesinde | chlagete vnd schre

mit ir lieben vrowen | wande in was harte we

vmb ir vil edeln herren | den si da heten velorn

da het gerochen hagene | harte prvnnhilde zorn

1014

do sprach div iamerhaffte | ir kameraere ir svlt hin gan

vnd wechet harte balde | die sifrides man

ir svlt ovch sigemvnde | minen iamer sagen

ob er mir helffen welle | den chvenen sifride chlagen

1015

do lief ein bote balde | da er si ligen vant

di sifrides helde | von nibelvnge lant

mit den vil leiden maren | ir vrevd er in benam

si ne wolt es niht gelovben | vnz man daz weinen vernam

1016

der bote chom ovch schiere | da der chvnich lach

sigemvnt der herre | der slaffes niht en pflach

ich waene sin herce im sagte | daz im was geschehen

ern mohte sinen lieben svn | nimmer lebendich gesehen

1017

vachet herre sigemvnt | mich bat nach iv gan

criemhilt min vrowe | der ist ein leit getan

daz ir vor allen leiden | an ir herce gat

daz svlt ir chlagen helffen | wand ez ivch sere bestat

1018

vf rihte sich do sigemvnt | er sprach waz sint div leit

der schonen criemhilde | div dv mir hast geseit

der bote sprach mit weinen | ine chan iv niht verdagen

ia ist von niderlande | der chvene sifrit erslagen

1019

do sprach der herre sigemvnt | lat iwer schimpfen sin

vnd also bosiv maere | dvrch willen min

daz ir ez saget iemen | daz er si erslagen

wand ine chvnd in nimmer | vor minem tode verchlagen

1020

welt ir mir niht gelovben | daz ir mir horet sagen

so mvget ir selbe hoeren | criemhilde klagen

vnt allez ir gesinde | den sifrides tot

vil ser scrachte do sigemvnt | des gie im werliche not

1021

mit hvndert sinen mannen | er von dem bette spranch

si zvchten zv den henden | div scharffen waffen lanch

si lieffen zv dem wuffe | vil iamerliche dan

do chomen tvsent rechen | des chvenen sifrides man

1022

do si so iaemerliche | di vrowen horten chlagen

do wanden svemeliche | si solden chleider tragen

ia ne mohten si der sinne | vor leide niht gehaben

in wart vil michel swaere | in ir hercen begraben

1023

do chom der chvene sigemvnt | da er criemhilde vant

er sprach owe der reise | her in dize lant

wer hat mich mines chindes | vnd ivch des iweren man

bi also gvten frivnden | svs mortliche anegetan

1024

hey sold ich den bechennen | sprach daz vil edel wip

holt wurde im nimmer | min herce vnt ovch min lip

ich geriete im also leide | daz di frivnde sin

von den minen schvlden | mvsen weinende sin

1025

sigemvnt der herre | den fvrsten vmbesloz

do wart von sinen vrivnden | der iamer also groz

daz von dem starchem wuffe | palas vnde sal

vnd ovch di stat ce wormze | von ir weinen erschal

1026

do ne niemen getroesten | daz sifrides wip

man zoch vz den chleidern | den sinen lip

man wusch im sine wunden | vnd leit in vf den re

do was den sinen livten | von grozem iamer starche we

1027

do sprachen sine rechen | von nibelvnge lant

in sol immer rechen | mit willen vnser hant

er ist in dirre bverge | der iz hat getan

do ilten nach den waffen | alle sifrides man

1028

di vzerwelten degene | mit schilden chomen dar

einlef hvndert rechen | di het an siner schar

sigemvnt der herre | sines svnes tot

den wold er gerne rechen | des gie im waerlichen not

1029

si ne wessen wen si solden | mit strite do bestan

si ne taeten ez danne gvnther | vnd sine man

mit den der herre sifrit | an daz geieide reit

criemhilt sach si gewaffent | daz was ir groezliche leit

1030

swi michel waer ir iamer | vnd swi starch ir not

do vorhte | der nibelvnge tot

von ir brvder mannen | daz si ez vnderstvnt

si warnt si als gvetliche | so vrivnde liebe vrivnde tvnt

1031

do sprach div iamers riche | min herre sigemvnt

wes welt ir beginnen | iv ist niht rehte chvnt

ia hat der kvenich gvnther | so manigen chvenen man

ir welt ivch alle vliesen | svlt ir di rechen bestan

1032

mit vf erbvnden schilden | in was ce strite not

div edel kvneginne | bat vnd gebot

daz siz miden solden | di rechen vil gemeit

do siz niht lazen wolden | ei was ir waerlichen leit

1033

si sprach herre sigemvnt | ir svlt iz lazen vnderstan

vnz ez sich baz gefvege | so wil ich minen man

immer mit iv rechen | der mir in hat benomen

wird ich des bewiset | ich sol im schaedeliche chomen

1034

ez ist der vebermveten | hie bi rine vil

davon ich iv des strites | raten niht en wil

si habent wider einen | ie wol drizech man

nv laz in got gelingen | als vmb vns gedienet han

1035

ir svlt hie beliben | vnt dolt mit mir miniv leit

als iz tagen beginne | ir helde vil gemeit

so helffet mir besarchen | den minen lieben man

do sprachen di degene | daz sol werden getan

1036

iv en chvnde niemen | daz wunder volsagen

von rittern vnt von vrowen | wi man di horte chlagen

so daz man des wuffes | wart in der stat gewar

di edelen bvrgaere | di chomen gahende dar

1037

si chlageten mit den gesten | want in was hart leit

daz sifrides schvlde | in niemen het geseit

dvrch waz der edel reche | verlvr den sinen lip

do weinten mit den vrowen | der gvten bvrgaere wip

1038

smide hiez man gahen | wurchen einen sarch

von silber vnd von golde | vil michel vnd vil starch

man hiez in vaste spengen | mit stahel daz was gvt

do was allen livten | harte trvrech der mvt

1039

div naht was cergangen | man sagte ez wolde tagen

do hiez div edel vrowe | zv dem mvnster tragen

sifriden den herren | den vil lieben man

swaz er da vrivnde hete | di sach man weinende gan

1040

do si in cem mvnster brahten | vil der gloken chlanch

do hort man allenthalben | vil maniges pfaffen sanch

do chom der kvnich gvnther | mit den sinen man

vnd ovch der grimme hagene | zv dem wuffe gegan

1041

er sprach vil liebiv swester | owe der leide din

daz wir niht ane | des grozen schaden sin

wir mvezen chlagen immer | den sifrides lip

daz tvt ir ane schvlde | sprach daz iamerhafte wip

1042

waer iv darvmbe leide | son waer es niht geschehen

ir hetet min vergezzen | des mag ich nv wol iehen

da ich da wart gescheiden | vnt min lieber man

daz wolde got sprach criemhilt | vnd waer iz mir selber getan

1043

si buten vaste ir lovgen | criemhilt begonde iehen

swelher sich vnschvldige | der laze daz gesehen

der sol zv der bare | vor den livten gen

dabi mach man di warheit | harte schiere versten

1044

daz ist ein michel wunder | vil dicke ez noch geschiht

swa man den mortmeilen | bi dem toten siht

so blvtent im di wunden | als ovch da geschach

davon man di schvlde | da ce hagene gesach

1045

di wunden vlvzzen sere | alsam si taten e

di e da sere chlageten | des wart nv michel me

do sprach der kvenich gvnther | ich wilz ivch wizzen lan

in slvgen schachaere | hagen hat es niht getan

1046

mir sint di schachaere | sprach si vil wol bechant

nv laz ez got errechen | noch siner vrivnde hant

gvnther vnd hagene | ia habt ir iz getan

di sifrides degene | heten gegen strite wan

1047

do sprach aber crimhilt | habt mit mir di not

do chomen dise beide | da si in fvnden tot

gere ir brvder | vnd giselher daz chint

in triwen si in chlageten | mit den anderen sint

1048

si weinten innechlichen | den crimhilde man

man solde messe singen | zv dem mvnster dan

giengen allenthalben | wip man vnt chint

di sin doch liht enbaren | di weinten sifriden sint

1049

gernot vnd giselher | di sprachen swester min

nv troste dich nach tode | als iz doch mvz sin

wir wellen dichs ergeczen | di wile wir geleben

do ne chvnde ir trost deheinen | cer werlde niemen gegeben

1050

sin sarch der was bereitet | wol vmbe einen mitten tach

man hvp in von der bare | da er vffe lach

ine wolde noch div frowe | lazen niht begraben

des mvsen al di livte | michel arbeite haben

1051

in einen richen pfellel | man den toten want

ich wene man da iemen | ane weinen vant

do chlagete hercenliche | vte ein edel wip

vnd allez ir gesinde | den sinen waetlichen lip

1052

do man daz gehorte | daz man cem mvenster sanch

vnt man in gesarchet hete | do hvp sich groz gedranch

dvrch willen siner sele | waz opffers man do trvch

er hete bi den vinden | doch gvter vrivnde genvch

1053

criemhilt div arme | cen kameraeren sprach

si svln dvrch mine liebe | liden vngemach

di im iht gvtes gvennen | vnd mir wesen holt

dvrch sifrides sele | sol man teilen sin golt

1054

dehein chint was da so chleine | daz iht witze mohte haben

daz mvse gen cem opffer | e wurde begraben

baz danne hvndert messe | man da des tages sanch

von sifrides vrivnden | wart da grozer gedranch

1055

do man da hete gesvngen | daz volch hvp sich von dan

do sprach div vrowe criemhilt | irn svlt eine lan

hinte mich bewachen | den vzerwelten degen

ez ist an sinem libe | al min vrevde gelegen

1056

dri tage vnd dri nahte | wil ich lazen stan

vnz ich mich geniete | mines vil lieben man

waz ob daz got gebivtet | daz mich nimt ovch der tot

so waere wol verendet | min armer criemhilde not

1057

cen herbergen giengen | di livte von der stat

pfaffen vnd mvenche | si beliben bat

vnd allez sin gesinde | daz ez des heldes pflach

si heten naht vil arge | vnt vil mvelichen tach

1058

ane ezzen vnd ane trinchen | beleip da manich man

di ez da nemen wolden | den wart daz chvnt getan

daz mans in den vollen gaebe | daz schvf her sigemvnt

do was den nibelvngen | vil arbeite chvnt

1059

di drie tagecite | so wir horen sagen

di da chvnden singen | daz si mvsen tragen

vil der arbeite | waz man in opfers trvch

di vil arme waren | di wurden riche genvch

1060

swaz man vant der armen | di es niht mohten han

di hei man cem opfer | mit dem golde gan

vz sin selbes kamern | do er niht solde leben

vmb sine sele | wart manich tvsent march gegeben

1061

vrbor vf der erden | teilten si in div lant

swa so man div kloster | vnd gvte livte vant

silbers vnd waete | gap man den armen genvch

si tet dem wol geliche | daz sim holden willen trvch

1062

an den drittem morgen | ce der rehten messecit

so was bi dem mvnster | der chirchof also wit

von den lantlivten | weinens also vol

si dienten im nach tode | also man lieben vrivnden sol

1063

in den tagen vieren | man hat gesaget daz

ce drizech tvsent marchen | oder dannoch baz

wart dvrch sine sele | den armen da gegebn

do was gelegen ringe | sin groziv schone vnd ovch sin leben

1064

do got da wart gedienet | daz man vol sanch

mit vngefvegem leide | vil des volches ranch

man hiez in vz dem mvenster | zv dem grabe tragen

di sin vngern enbaren | di sah man weinen vnd chlagen

1065

vil lvte schriende | daz livt gi mit im dan

vro en was da niemen | weder wip noch man

e daz man in begrvebe | man sanch vnd las

hey waz gvter pfaffen | ce siner pifilde was

1066

e daz cem grabe choeme | daz sifrides wip

do ranch so mit iamer | ir getriwer lip

daz man si mit dem brvnnen | vil dicke da vergoz

ez was ir vngemvete | vil harte vnmaezlichen groz

1067

ez was ein michel wunder | daz si ie genas

mit chlage ir helfende | manich vrowe was

do sprach div chveneginne | ir sifrides man

ir svlt dvrch iwer triwe | an mir genade began

1068

lat mir nach minem leide | daz chleine liep geschehen

daz ich sin schoene hovbt | noch eines mveze sehen

do bat sis also lange | mit iamers sinnen starch

daz man cebrechen mvse | do den herlichen sarch

1069

do brahte man di vrowen | da si in ligen vant

si hvp sin schoene hovbt | mit ir vil wizzen hant

do chvstes also toten | den edel ritter gvt

div ir vil liehten ovgen | vor leide weinten blvt

1070

ein iamergez scheiden | wart do da getan

do trvch man si von dannen | si ne chvnde niht gegan

do vant man sinnelose | daz herliche wip

vor leide moht ersterben | der ir vil wunnechlicher lip

1071

do man den edelen herren | hete nv begraben

leit ane maze | sah man di alle haben

di mit im chomen waren | von nibelvnge lant

vil selten vroelichen | man do sigemvnden vant

1072

da was der etelicher | der drier tage lanch

vor dem grozem leide | niht az noch en tranch

do mohten si dem libe | so gar geswichen niht

si nerten sich nach sorgen | so noch genvgen gesiht