BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

19. Aventiure

 

___________________________________________________

 

 

Aventivre wie der nibelvnge hort

ze wormze braht wart

 

1101

Do div edel criemhilt | also verwitwet wart

bi ir ime lande | der grave ecchewart

beleip mit sinen mannen | der dienet ir zallen tagen

der half ovch siner vrowen | sinen herren diche chlagen

1102

ze wormez bi dem mvnster | ein gezimber man ir sloz

wit vnd vil michel | rich vnd groz

da si mit ir gesinde | sit ane vrevde saz

si was cer chirchen gerne | vnd tet vil gvetlichen daz

1103

da man begrvb ir vriedel | wi selten si daz lie

mit trvregem mvte | si alle cit dar gie

si bat got den gvten | siner sele pflegen

vil diche wart beweinet | mit grozzen triwen der degen

1104

vte vnd ir gesinde | trosten si zaller stvnt

do was ir daz herce | so grozliche wunt

ez chvnde niht vervahen | swaz man ir trostes bot

si hete nach liebem vrivnde | di allergrosten not

1105

di nach liebem manne | ie mer wip gewan

man mohte ir michel tvgende | chiesen wol daran

si chlagete vnz an ir ende | di wile wert si der lip

sit rach sich wol mit ellen | des chvenen sifrides wip

1106

svs saz si nach ir leide | daz ist alle war

nach ir mannes tode | wol vierdehalbez iar

daz si ce gvnther | nie dehein wort gesprach

vnt ovch ir vient hagenen | in der cite nie gesach

1107

do sprach der helt von tronege | moht ir daz tragen an

daz ir iwer swester | ce vrivnde mohtet han

so chome ce disen landen | daz nibelvnges golt

des moht ir wol gewinnen | wuerd vns div chvneginne holt

1108

er sprach wir svln iz versvchen | mine brvder sint ir bi

di svl wirz piten werben | daz si vnser vrivnt si

ob virn ir angewinnen | daz si daz gerne sehe

ine truwes niht sprach hagene | daz daz immer geschehe

1109

do hiez er ortwinen | hin ce hove gan

vnt den margraven geren | do daz was getan

man braht ovch gernoten | vnd giselher daz chint

si versvchtenz vrivntliche | an vrovn criemhilde sint

1110

prvnhilt div schoene | mit vebermvete saz

vrowe ir chlaget ce lange | den sifrides tot

iv wil der chvenich rihten | daz er sin niht hat erslagen

man horet ivch zallen citen | so rehte grozlichen chlagen

1111

si sprach des zihet in niemen | in slvch div hagenen hant

wa man in verhowen solde | do er daz an mir ervant

wi moht ich des getruwen | daz er im waere gehaz

ich hete wol behvtet | sprach div chvneginne daz

1112

daz ich niht vermeldet | hete sinen lip

so lieze ich nv min weinen | ich vil armes wip

holt wirt ich in nimmer | di ez da hant getan

do begonde vlehen giselher | der vil waetliche man

1113

ich wil den chvenich grvezen | do si im des veriach

mit sinen besten vrivnden | man in vor ir sach

do ne torste hagen | fvr si niht gegan

wol wesse er sine schvlde | er het ir leide getan

1114

do si verchiesen wolde | vf gvnthern den haz

ob er si chvessen solde | ez zaeme im deste baz

waere ir von sinem rate | leide niht getan

so moeht er vnzwifellichen | zv criemhilde gan

1115

ez en wart nie svne | mit so vil traehen me

gefveget vnder vrivnden | ir tet ir schade we

si verchos vf si alle | wan vf den einem man

in het erslagen niemen | ez hete hagen getan

1116

darnach vil vnlange | trvgen si daz an

daz div vrowe criemhilt | den grozen hort gewan

von nibelvnge lande | vnd fvrten an den rin

er was ir morgengabe | er solt ir pilliche sin

1117

darnach fvr giselher | vnd gernot

ir ahzech hvndert mannen | criemhilt do gebot

daz sin holen solden | da er verborgen lach

da sin der degen albrich | mit sinen besten vrivnden pflach

1118

do man di von dem rine | nach dem schatze chomen sach

albrich der vil chvene | zv sinen vrivnden sprach

wirn getverren ir des hordes | vor gehaben niht

sit sin ce morgengabe | div edel kveneginne ihit

1119

doch wurdez nimmer | sprach albrich getan

niwan daz wir vebele | da verlorn han

mit samt sifrit | di gvten tarnhvt

want di trvch alle cite | der schoenen criemhilde trvt

1120

nv ist ez sifride | leider vbel chomen

daz vns di tarnchappen | hat der helt benomen

vnt daz im mvse dienen | allez dize lant

do gie der chameraere | da er di slvzzel vant

1121

ez stvnden vor dem berge | di criemhilde man

vnd ovch ein teil ir mage | den shaz den hiez man dan

tragen zv dem scheffe | an div schiffelin

den fvrt man vf den vnden | vnz ze berge an den rin

1122

nv mveget ir von dem horde | wunder horen sagen

swaz zwelf chanzwagene | meiste mohten tragen

in vier tagen vnd nahten | von dem berge dan

ovch mvose ir ietslicher | des tages dristvnt gan

1123

ez en was niht anders | wan steine vnd golt

vnt ob man al di werlde | het davon versolt

si ne waere niht | minner einer marche wert

ia ne hetes schvlde | niht gar hagen gegert

1124

der wunhs der lach darvnder | von golde ein rvetelin

der daz het erchvnnet | der mohte meister sin

wol in aller werld | veber einn ietslichen man

der albriches mage | chom vil mit gernote dan

1125

do si den hort behielten | in gvntheres lant

vnd sih es div chveneginne | allererst vnderwant

in chamer vnd in tvernen | sin wart vil getragen

man gehorte nie daz wunder | von gvte mere gesagen

1126

vnd waere sin tvsent stvnde | noch alse vil gewesen

vnd solt der herre sifrit | gesvnder sin gewesen

bi im waere criemhilt | hende bloz bestan

getriwer wibes chvenne | ein helt ni mer gewan

1127

do si den hort nv hete | do brahtes in daz lant

vil vnchvnder rechen | ia gap der vrowen hant

daz man so grozzer milte | mere ni gesach

si pflach vil gvter tvgende | des man der chveneginne iach

1128

den armen vnt den richen | begonde si nv geben

daz da reite hagene | ob si solde leben

noch decheine wile | daz si so manigen man

in ir dienst gewunne | daz ez in leide mvs ergan

1129

do sprach der chvenech gvnther | ir ist lip vnd gvt

zwiv sol ich daz wenden | swaz si damit getvt

ia derwap ich daz vil chvme | daz si mir wart so holt

nv en rvchen war si teile | ir silber vnd ir golt

1130

hagen sprach ce dem chvnige | ez solde ein frvmer man

deheinem einem wibe | niht des hordes lan

si bringet ez mit gabe | noch vf den tach

daz vil wol geriwen | di chvenen bvrgonden mach

1131

do sprach der kvnich gvnther | ich swuor ir einen eit

daz ich ir getaete | nimmer mere leit

vnd wil es fvrbaz hveten | si ist div swester min

do sprach aber hagene | lat mich den schvldigen sin

1132

ir svmeliche eide | waren vmbehvht

do namen si der witwen | daz creftige gvt

hagen si der slvzzel | aller vnderwant

daz zvrnde ir brvder gernot | do er daz rehte bevant

1133

do sprach der herre giselher | hagen hat getan

vil leides miner swester | ich sold iz vnderstan

waere er niht min mag | ez gienge im an den lip

iteniwez weinen | tet do sifrides wip

1134

do sprach der herre gernot | e daz wir immer sin

gemvet mit dem golde | wir soldenz in den rin

allez heizen senchen | daz wer wol getan

si gie vil chlegeliche | fver ir brvder gvnthere stan

1135

si sprach vil lieber brvder | dv solt gedenchen min

beidiv libes vnd gvtes | soltv min voget sin

do sprach er zv der vrowen | daz sol sin getan

als wir nv chomen widere | wir haben ritens wan

1136

der kvenich vnd sine mage | rvmten do daz lant

di allerbesten darvnder | di man inder vant

niwan hagen aleine | der beleip da dvrch haz

den er trvch criemhilde | vnt tet vlizechliche daz

1137

e daz der chvenich riche | waere wider chomen

di wile hete hagene | den shaz vil genomen

er schvtten da ce loche | allen in den rin

er wand er sold in nizen | des en chvnde niht gesin

1138

di fversten chomen widere | mit in vil manich man

criemhilt ir schaden grozzen | chlagen began

mit meiden vnt mit vrowen | in was harte leit

gerne waer ir giselher | aller triwen bereit

1139

do sprachen si gemeine | er hat vbele getan

er ntweich der fvrsten zorne | also lange dan

vnz er gewan ir hvlde | sie liezen in genesin

do ne chvnde im criemhilt | nimmer viender sin gewesin

1140

e daz von tronege hagene | den shaz also verbarch

do heten siz gevestent | mit eiden also starch

daz er verholn waere | vnz ir einer mohte leben

si ne chvnden ins selben | noch niemen ander gegeben

1141

mit itenuewen leiden | beswaeret was ir mvt

vmb ir mannes ende | vnt do si ir daz gvt

also gar genamen | do ne gestvnt ir chlage

des libes nimmer mere | vnz an ir ivngesten tage

1142

nach sifrides tode | daz ist alwar

si wonte in manigem sere | drivcehn iar

daz si des recken todes | vergezzen chvnde niht

si was im getriwe | des ir div meiste menige iht