BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

22. Aventiure

 

___________________________________________________

 

 

Aventivre wie chriemhilt vnd ezele brvten

in der stat ze wienne

 

1336

Si was ce zeizenmvre | vnz an den vierden tach

div molte vff der straze | di wile ni gelach

si ne stvebe alsam ez brvenne | allenthalben dan

da ritten dvrch osteriche | des chvnich eceln man

1337

do was ovch dem chvenige | vil rehte nv geseit

des im von den gedanchen | swunden siniv leit

wi herlichen criemhilt | da chome dvrch div lant

der kvenich begonde gahen | da er di wolgetanen vant

1338

von vil maniger sprache | sah man vffe den wegen

vor eceln riten | manigen chvenen degen

von cristen vnd von heiden | vil manige wite schar

da si di vrowen fvnden | si chomen herliche dar

1339

von rivzen vnd von criechen | reit da vil manich man

den poelan vnd den walachen | sach man swinde gan

ir ross div vil gvten | da si mit creffte riten

swaz si site heten | der wart vil wenich vermiten

1340

von dem lande ze chiewen | reit da vil manich degen

vnt di wilden petsschenaere | da wart vil gepflegen

mit dem bogen schiezen | cen vogeln di da flvgen

di pfile si vil sere | zv den wenden vaste zvgen

1341

ein stat bi tvonowe | lit in osterlant

div ist geheizen tvln | da wart ir bechant

vil manich site vremede | den si e nie gesach

si enpfiengen da genvge | den sit leit von ir gesach

1342

vor eceln dem chvenege | ein ingesinde reit

vro vnd vil riche | hoefsh vnt gemeit

wol vier vnd zweinzech fversten | tiwer vnd her

daz si ir vrowen saehen | davon en gerten si niht mer

1343

der herzoge ramvnch | vzer walachen lant

mit siben hvndert mannen | chom er fver si gerant

sam vliegende vogele | sah man si varn

do chom der fverste gybecke | mit vil herlichen scharn

1344

hornboge der snelle | wol mit tvsent man

cherte von dem chvenege | gegen siner vrowen dan

vil lvte wart geschallet | nach des landes siten

von der hivnen magen | wart ovch da sere geritten

1345

do chom von tenemarchen | der chvene hawart

vnt yrinch der vil snelle | vor valsche wol bewart

vnt irnfrit von dveringen | ein waetlicher man

si enpfiengen criemhilde | daz sis ere mvsen han

1346

mit zwelf hvndert mannen | di fvrtens in ir schar

do chom der herre bloedelin | mit drin tvsent dar

der eceln brvder | vzer hivnen lant

der chom vil herliche | da er di chveneginne vant

1347

do chom der chvenich ecel | vnd ovch her dietrich

mit allen sinen gesellen | da was vil lobelich

manich ritter edele | biderbe vnd gvt

des wart do vrovn criemhilde | vil wol gehoehet der mvt

1348

do sprach cer kveneginne | der herre rvedger

vrowe ich wil enpfahen | hie den chvnich her

swen ich ivch heize chvessen | daz sol sin getan

ia ne mvgt ir niht geliche | gervzen alle eceln man

1349

do hvp man von dem moere | di chveneginne her

ecel der vil riche | en beite do niht mer

et stvnt von sinem rosse | mit manigem chvenem man

man sah in vroliche | gegen criemhilde gan

1350

zwene fvrsten riche | als vns daz ist geseit

bi der frvn gende | trvgn iriv chleit

da ir der chvenich ecel | hin engegen gie

da si den fvrsten edele | mit chvsse gvetelich enpfie

1351

vf rvchte si ir gebende | ir varwe wolgetan

div lvht ir vz dem golde | da was vil manich man

di iahen daz vrov helche | niht schoener chvnde sin

dabi so stvnt vil nahen | des kveniges brvder bloedelin

1352

den hiez si chvessen rvedeger | der margrave rich

vnt den kvnech gybechen | da stvnt ovch dieterich

der recken chvste zwelve | daz eceln wip

do enpfie si svs mit grvze | vil maniges riteres lip

1353

al di wile vnd ecel | bi chriemhilde stvnt

do taten do di tvmben | als noch di livte tvnt

vil manigen pvneiz richen | sah man da geriten

daz taten cristen helde | vnd ovch di heiden nach ir siten

1354

wi rehte ritterliche | di dieteriches man

di schefte liezen vliegen | mit trvnzvnen dan

hohe vber di schilde | gvter ritter hant

von den tivschen gesten | wart dverchel manich schildes rant

1355

da wart von schefte brechen | vil michel doz vernomen

do waren von dem lande | di rechen alle chomen

vnt ovch des chveneges geste | vil manich edel man

do gie der kvnech riche | mit vrovn criemhilde dan

1356

si sahen bi in stende | ein vil herlich gezelt

von hvetten was erfvllet | alvmbe daz velt

da si solden ruwen | nach ir arbeit

von helden wart gewiset | darvnder manich schoniv meit

1357

mit der chveneginne | da si sit gesaz

vf rich stvlgewaete | der margrave daz

hetez wol geschaffen | daz man ez vant vil gvt

daz gesidele criemhilde | des vroevt sich eceln mvt

1358

waz do redete ecel | daz ist mir vmbechant

in der sinen zeswen | lag ir wiziv hant

si gesazen minnechliche | da rvedger der degen

den kvenech niht wolde lazen | criemhilde heinliche pflegen

1359

do hiez man lan beliben | den bvhvrt veberal

mit eren wart verendet | da der groze schal

do giengen zv den hvetten | di eceln man

man gap in herberge | wil wite allenthalben dan

1360

der tach der het nv ende | si schvf ir gemach

vnz man den liehten morgen | aber schinen sach

do was zv den rossen | chomen manich man

hey waz man chvrzewile | dem chvenege ce eren began

1361

der kvnech ez nach den eren | di hivnen schaffen bat

do ritten si von tvlne | ce wiene zv der stat

da fvnden si gezieret | vil maniger vrowen lip

si enpfiengen wol mit eren | des kvenech eceln wip

1362

mit harte grozem vollen | so was in bereit

swaz si haben solden | vil manich helt gemeit

sich vrevte gegen dem schalle | herbergen man began

des kvneges hohgezite | div hvp sich vrolichen an

1363

si ne mohten niht geherbergen | alle in der stat

di niht geste waren | rvedger di bat

daz si herberge | naemen in daz lant

ich wene man alle zite | bi dem criemhilde vant

1364

den herren dieterichen | vnd andern manigen degen

si heten sich der rvwe | mit arbeit bewegen

dvrch daz si den gesten | trosten wol den mvt

her rvedger vnd sine vrivnde | heten chverzewile gvt

1365

div hohzit was gevallen | an einen pfinxtach

da der kvnech ecel | bi criemhilde lach

in der stat ce wiene | si waen so manigen man

bi ir ersten manne | nie ze dienste gewan

1366

si chvnte sich mit gabe | dem der si nie gesach

vil maniger darvnder | zv den gesten sprach

wir wanden daz vrov criemhilt | gvtes niht mohte han

nv ist hie mit ir gabe | vil manich wunder getan

1367

div hohzit div werte | sibenzehen tage

ich waene man von deheinem | kvnige mere sage

des hohzit grozer waere | daz ist vns gar verdeit

alle di da waren | di trvgen iteniuowe chleit

1368

si waen in niderlande | davor nine gesaz

mit so manigem recken | dabi so gelovbe ich daz

was sifrit rich des gvtes | daz er nie gewan

so manigen recken edele | so si sach vor eceln stan

1369

ovch gap nie deheiner | zv sin selbes hohgezit

so manigen richen mantel | tief vnd wit

noch so gvter cleider | der si mohte vil han

so si dvrch criemhilde | heten alle getan

1370

ir frivnde vnt ovch di geste | di heten einen mvt

daz si da niht en sparten | deheiner slahte gvt

swes iemen an si gerte | daz gaben si bereit

des gestvnt da vil der degene | von milte bloz ane chleit

1371

wi si ce rine saeze | si gedaht ane daz

bi ir edelen manne | ir ovgen wurden naz

si hetes vaste haele | deiz iemen chvnde sehen

ir was nach manigem leide | so vil der eren geschehen

1372

swaz iemen tet mit milte | daz was gar ein wint

vnz an dieterichen | swaz botelvnges chint

im gegeben hete | daz was nv gar verswant

ovch begie da michel wunder | des milten rvedegeres hant

1373

vzer vngerlande | der fverste bloedelin

der hiez da laere machen | vil manich leitschrin

von silber vnd von golde | daz wart da hin gegeben

man gesach des chveneges helde | so rehte vroliche leben

1374

waerbel vnd swemmelin | des kveniges spilman

ich waene ir ieselicher | zer hohgezit gewan

wol ce tvsent marchen | oder dannoch baz

da div schoene criemhilt | bi ecel vnder chrone saz

1375

an dem ahzentem morgen | von wiene si do ritten

da wart in ritterschepfte | schilde vil versniten

von spern di da fvrten | di recken an der hant

svs chom der chvenich ecel | vnz in daz hivnissche lant

1376

ze heimbvrch der alten | si waren vber naht

do ne chvnde niemen wizzen | wol des volches aht

mit wi getaner crefte | si ritten veber lant

hey waz man schoener vrowen | in siner heinmvete vant

1377

ze misenbvrch der richen | da shifften si sich an

daz wazer wart verdechet | von ross vnd ovch von man

alsam ez erde waere | swaz man sin vliezen sach

di wegemveden vrowen | di heten senfte vnd ovch gemach

1378

zesamene was geslozen | manich shif vil gvt

daz im niht en schadete | di vende noch div flvt

darveber was gespannen | manich gvt gecelt

sam ob si noch heten | beiduv lant vnde velt

1379

do chomen disiv maere | ce ecelnpvrch von dan

do vrevten sich darinne | wip vnde man

des eceln ingesinde | des e div vrowe pflach

gelebten sit bi crimhilde | vil manigen vroelichen tach

1380

do stvnden da wartende | vil manich edel meit

di von helchen tode | heten manigiv leit

siben chvenige toehter | crimhilt noch da vant

von den was gezieret | wol allez eceln lant

1381

div ivnchvrowe herrat | noch des gesindes pflach

div helchen swester tohter | an der vil tvgende lach

div gemahele dieteriches | eins edeln chvneges chint

div tohter naentwines | div het vil der eren sint

1382

gegen der geste chvemfte | vrevte sich ir mvt

ovch was darzv bereitet | vil creftigez gvt

wer chvnde iv daz bescheiden | wi sit der chvenech saz

si gelebten da cen hivnen | nie mit der chvneginne baz

1383

do der chvenech mit sinem wibe | von dem stade reit

wer ieslichiv waere | daz wart do wol geseit

di edelen criemhilde | si grvztens deste baz

hey wi gewaltechliche | si sit an helchen stat gesaz

1384

getriwelicher dienste | wart ir vil bechant

do teilte div chvneginne | golt vnt gewant

silber vnt gesteine | swaz di des veber rin

mit ir cen hivnen brahte | daz mvse gar cergeben sin

1385

ovch wurden ir mit dieneste | sider vndertan

alle des chveniges mage | vnt alle sine man

daz div vrowe helche | so gewalteclich gebot

so si nv mvsen dienen | vnz an den criemhilde tot

1386

do stvnt mit soelhen eren | der hof vnt ovch daz lant

daz man da zallen ziten | di chvrzewile vant

swar nach ieslichem | daz herce trvch den mvt

dvrh des chveneges liebe | vnt di kveneginne gvt