BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

23. Aventiure

 

___________________________________________________

 

 

Aventivre wie krimhilt ir leit

gedaht ze rechen

 

1387

Mit vil grozen eren | daz ist alwar

wonten si mit einander | vnz an daz sibende iar

di zit div chveneginne | eines svns was genesen

des chvnde der kvenich ecel | nimmer vroelicher wesen

1388

si ne wolde niht erwinden | sine wuerbe sint

daz getovffet wuerde | daz eceln chint

nach cristenlichem rehte | ez wart ortliep genant

des wart vil michel vrevde | vber elliv eceln lant

1389

swaz ie gvter tvgende | an vrovn helchen lach

der vleiz sich nv vrov criemhilt | darnach vil manigen tach

di site si lerte herrat | div ellende meit

div hete tovgenliche | nach helchen groziv leit

1390

den vremden vnt den chvnden | was si vil wol bechant

di iahen daz nie vrowe | besaeze ein kveneges lant

bezzer vnde milter | daz heten si fver war

daz lop si trvch si cen hivnen | vnz an daz dricehende iar

1391

nv het si wol erchvnnen | daz ir niemen widerstvnt

also noch fvrsten wibe | chveneges recken tvnt

vnt daz si alle zite | zwelf chvenige vor ir sach

si gedaht ovch maniger leide | der ir da heime gesach

1392

si gedaht ovch maniger eren | von nibelvnge lant

der si da was gewaltich | vnt di ir hagenen hant

mit sifrides tode | hete gar benomen

ob im daz noch immer von ir | ce leide mohte chomen

1393

daz geschaehe ob ich in | moehte bringen in daz lant

ir trovmte daz ir gienge | vil diche an der hant

giselher ir brvder | si chvsten zaller stvnt

vil ofte in senftem slaffe | sit wart in arbeiten chvnt

1394

ich waene der vbel valant | criemhilde daz geriet

daz si sich mit frivntschefte | von giselhere schiet

den si dvrch svne chvste | in bvergonden lant

do begonde ir aber salwen | von heizen trehen ir gewant

1395

ez lag ir an dem hercen | spate vnd vrov

wi man si ane schvlde | braehte darzv

daz si mvese minnen | einen heidenisschen man

di not di het ir hagene | vnt gvnther getan

1396

des willen in ir hercen | chom si vil selten abe

si gedahte ich pin so riche | vnt han so groze habe

daz ich minen vinden | gefvege noch ein leit

des waere et ich von tronege | hagen gerne bereit

1397

nach den getriwen iamert | diche daz herce min

di mir da leide taten | moehte ich pi den sin

so wuerde wol errochen | mines vrivndes lip

des ich chvme erbeite | sprach daz ecelen wip

1398

ze liebe si do heten | alle skveneges man

di criemhilde recken | daz was vil wol getan

der chamern der pflach eckewart | davon er frivnt gewan

den crimhilde willen | chvnde niemen vnderstan

1399

si dahte zallen ziten | ich wil den chvenech piten

daz er ir des gonde | mit gvetlichen siten

daz man ir frivnde braehte | in der hivnen lant

den argen willen niemen | an der chvneginn ervant

1400

do si eines nahtes | bi dem chvenige lach

mit armen vmbvangen | het er si als er pflach

di edeln vrowen trivten | si was im also sin lip

do gedahte ir finde | daz vil herliche wip

1401

si sprach zv dem chvenige | vil lieber herre min

ich wolde ivch bitten gerne | moht iz mit hvlden sin

daz ir mich liezet sehen | ob ich daz het versolt

ob ir den minen vrivnden | waeret innechlichen holt

1402

do sprach der kvenich riche | getriwe was sin mvt

ich bringe ivch des wol innen | swa lip vnd gvt

den recken widerfvere | des mvese ich frevde han

wande ich von wibes minne | nie bezer frivnde gewan

1403

do sprach div chveneginne | iv ist daz wol geseit

ich han vil hoher mage | darvmbe ist mir so leit

daz mich di so selten | rvchent hie gesehen

ich hoere min div livte | niwan fver ellende iehen

1404

do sprach der chvenech ecel | vil liebiv vrowe min

divht ez si niht ce verre | so lvede ich veber rin

swelhe ir da gerne saehet | her in miniv lant

des vrevote sich div vrowe | do si den willen sin ervant

1405

si sprach welt ir mir triwe | leisten herre min

so svlt ir boten senden | ce wormez veber rin

so enbivt ich minen vrivnden | des ich da habe mvt

so chvmt vns her ce lande | vil manich edel ritter gvt

1406

er sprach swenne ir gebietet | so lazet ez geschehen

irn chvndet iwer vrivnde | so gerne niht gesehen

als ich si gesaehe | der edeln vten chint

mich muewet daz harte sere | daz si vns so lange vremde sint

1407

ob ez dir wol gevalle | vil liebiv vrowe min

so wold ich gerne senden | nach den frivnden din

di minen videlaere | in bvergonden lant

di gvten videlaere | hiez er bringen sa cehant

1408

si ilten harte balde | da der kvenech saz

bi der chveneginne | er saget in beiden daz

si solden poten werden | in bvergonden lant

do hiez er in bereiten | harte herlich gewant

1409

vier vnd zweinzech recken | bereite man div chleit

ovch wart in von dem chvenege | div boteschaft geseit

wi si dar laden solden | gventher vnd sine man

criemhilt div vrowe | si svnder sprechen began

1410

do sprach der kvenech riche | ich sage iv wi ir tvt

ich enbivte minen vrivnden | liep vnde allez gvt

daz si gervchen ritten | her in miniv lant

ich han so lieber geste | harte wenich noch bechant

1411

vnde ob si mines willen | wellen iht began

di criemhilde mage | daz si des niht en lan

si ne chomen an disem svmere | zv miner hohgecit

wand vil der minen wuenne | an minen chonemagen lit

1412

do sprach der videlaere | der stolze swemmelin

wenne sol iwer hohzit | in disen landen sin

daz wir daz ivren frivnden | chvnnen dort gesagen

do sprach der kvenech ecel | ce naehsten svnewenden tagen

1413

wir tvn swaz ir gebietet | sprach do waerbelin

in ir chemnaten | bat si div chvenegin

bringen tovgenliche | da si di boten sprach

davon vil manigem degene | sit wenich liebes gesach

1414

si sprach cen boten beiden | nv dienet michel gvt

daz ir minen willen | vil gvetlichen tvt

vnd saget swaz ich enbiete | heim in vnser lant

ich mache ivch gvtes riche | vnt gip iv herlich gewant

1415

vnde swaz ir miner frivnde | immer mvget gesehen

ze wormez bi dem rine | den svlt ir niht veriehen

daz ir noch nie gesaehet | betrvebet minen mvt

vnt saget minen dienest | den helden chvene vnde gvt

1416

bittet daz si lesten | daz in rvedger enbot

vnt mich damite scheiden | von aller miner not

di hivnen wellent waenen | deich ane vrivnde si

ob ich ein ritter waere | ich chom in etwenne bi

1417

vnde sagt ovch gernot | dem edelen brvder min

daz im zer werlde holder | niemen mvege sin

bittet daz er mir bringe | in diz lant

vnser besten frivnde | derz vns cen eren si gewant

1418

so sagt ovch giselher | daz er wol gedenche daran

daz ich von sinen schvlden | nie leides niht gewan

des saehen in vil gerne | hie div ovgen min

ich heten in hie vil gerne | dvrch di grozen triwe sin

1419

sagt ovch miner mvter | di ere di ich han

vnd ob von tronege hagene | welle dort bestan

wer si danne sold | wisen dvrch div lant

dem sint di wege von chinde | her cen hivnen wol bechant

1420

di boten nine westen | wavon daz was getan

daz si von tronege hagen | niht solden lan

beliben bi dem rine | ez wart in sider leit

mit im was manigem degene | ze grimmem tode widerseit

1421

brieve vnde botschaft | was in nv gegeben

si fvren gvtes riche | vnd mohten schone leben

vrlovb gap in ecel | vnd ovch sin schoene wip

in was von gvter waete | wol gezieret der lip