BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

27. Aventiure

 

___________________________________________________

 

 

Aventivre wie der marchrave die kvnige mit ir rechen

in sin hvs enpfie vnd wier ir sit pflach

 

1650

Do gie der margrave | da er di vrovn vant

sin wip mit siner tohter | vnt sagete in zehant

div vil lieben maere | div er het vernomen

daz in ir frovn brvder | dar ce hvse solden chomen

1651

vil liebiv trvettinne | sprach do rvedger

ir svlt vil wol enpfahen | di edelen chvenige her

so si mit ir gesinde | her ce hove gan

ir svlt ovch schone grvezen | hagen gventheres man

1652

mit in chvmt ovch einer | der heizet danchwart

der ander heizet volker | an zvehten wol bewart

di sehse svlt ir chvessen | vnt div tohter min

vnde svlt ovch bi den recken | in zvehten gvetliche sin

1653

daz lobten do di vrowen | vnd warn sin bereit

si svchten vz den chisten | div herlichen chleit

darinne si engegene | den recken wolden gan

da wart vil michel vlizen | von schoenen wiben getan

1654

gevelshet frovn varwe | vil lvecel man da vant

si trvgen vf ir hovbete | von golde liehtiv bant

daz waren shapel riche | daz in ir schoene har

cefvrten niht di winde | daz ist an den triwen war

1655

in solhen vnmvzen | svl wir di vrowen lan

hi wart vil michel gahen | veber velt getan

von rvedgeres vrivnden | da man di fversten vant

si wurden wol enpfangen | in des margraven lant

1656

do si der margrave | zv zim chomen sach

rvedger der snelle | vil vroeliche sprach

sit willechomen ir herren | vnd ovch iwer man

hie in minem lande | vil gern ich ivh gesehen han

1657

do nigen im di recken | mit triwen ane haz

daz er in willech waere | vil wol erzeigete er daz

besvnder grvzte er hagenen | den het er e bechant

alsam tet er volkern | vzer bvrgonden lant

1658

er enpfie ovch danchwarten | do sprach der chvene degen

sit ir vns wilt bervchen | nv wer sol danne pflegen

des vnsern ingesindes | daz wir haben braht

do sprach der margrave | ir svlt haben gvte naht

1659

vnd allez iwer gesinde | swaz ir in daz lant

habt mit iv gefveret ross | vnd ovch gewant

dem shaffe ich soelhe hvte | daz sin niht verlorn

daz iv ce shaden bringe | gegen enigem sporn

1660

spannet vf ir knehte | di hvetten an daz velt

swaz ir hie verlieset | des wil ich wesen gelt

ziehet ab di zovme | div ross lazet gan

daz het in wirt deheiner | davor vil selten getan

1661

des vroevten sich di geste | do daz geshaffen was

di herren riten dannen | sich leiten an daz gras

vber al di knehte | si heten gvt gemach

ich waene in an dirre verte | ni so sanfte geshach

1662

div edele margravinne | was di fver di bvrch gegan

mit ir vil schoenen tohter | do sah man bi ir stan

di minnechlichen vrowen | vnd manige shoen meit

di trvgen vil der bovge | vnd ovch herlichiv chleit

1663

daz edel gesteine | lvhte verre dan

vz ir vil richen waete | si waren wolgetan

do chomen ovch di geste | vnd erbeizten sa cehant

hey waz man grozer zvehte | an den bvrgonden vant

1664

sehs vnt drizech maegde | vnt manich ander wip

den was wol ce wunshe | geshaffen gar der lip

di giengen in engegene | mit manigem chvenem man

da wart ein shoene grvezen | von edeln vrowen getan

1665

div edele margravinne | chvste di kvenige alle dri

alsam tet ir mvter | da stvnt ovch hagen bi

ir vater hiez in chvessen | do blichte si in an

er dvhte si so vorhtlich | daz siz vil gerne hete lan

1666

do mvste si daz leisten | daz ir der wirt gebot

gemisschet wart ir varwe | bleich vnde rot

si chvste ovch danchwarten | darnach den spileman

dvrch sines libes ellen | wart im daz grvzen getan

1667

div ivnge margravinne | div nam bi der hant

giselher den recken | von bvrgonden lant

alsam tet ovch ir mvter | gventher der chvenen man

si giengen mit den helden | vil harte vroliche dan

1668

der wirt gi bi gernote | in einen witen sal

ritter vnd vrowen | gesazen da ce tal

do hiez man balde shenchen | den gesten gvten win

ia ne dorften nimmer helde | baz gehandelet sin

1669

mit lieben ovgenblicken | wart gesehen an

div rvedgeres tohter | div was so wolgetan

ia trvtes in den sinnen | vil manich ritter gvt

daz chonde ovch si verdienen | si was hohe gemvt

1670

si dahten swes si wolden | des en mohte aver niht geshehen

hin vnd her wider | wart da vil gesehen

an mageden vnd an vrowen | der saz da genvch

der edel videlaere | dem wirte holden willen trvch

1671

nach gewonheite | so schieden si sich da

ritter vnd vrowen | di giengen anderswa

do rihte man di tisshe | in dem sale wit

den vnchvnden gesten | diente man herliche sit

1672

dvrch der geste liebe | hin ce tisshe gie

div edele margravinne | ir tohter si do lie

beliben bi den chinden | da si von rehte saz

di geste ir niht en sahen | si mvte waerliche daz

1673

do si getrvnchen heten | vnd gezen veber al

do wiste man di schoenen | wider in den sal

gaemelicher sprveche | wart da niht verdeit

der redete vil do volker | ein degen chven vnt gemeit

1674

do sprach offenlichen | der edel spilman

richer margrave | got hat an iv getan

vil genaedechlichen | wand er iv hat gegeben

ein wip so rehte schoene | darzv ein wunnechlichez leben

1675

ob ich ein fverste waere | sprach der spilman

vnd solde ich tragen chrone | ce wibe wold ich han

di iwern schoenen tohter | des wuensshet mir der mvt

div ist minnechlich ce sehen | darzv edel vnd gvt

1676

do sprach der margrave | wi moehte daz gesin

daz immer kvenech gerte | der lieben tohter min

wir sin hi ellende | beide ich vnd min wip

waz hilfet groziv schoene | an der ivnchvrowen lip

1677

des antwurte gernot | der wolgezogen man

vnd sold ich trivttinne | nach minem willen han

so wold ich solhes wibes | immer wesen vro

des antwurte hagene | vil harte gvetlichen do

1678

nv sol min herre giselher | doch nemen ein wip

ez ist so hoher mage | der margravinne lip

daz wir gerne dienten | ich vnde sine man

vnd soldes vnder chrone | da cen bvrgonden gan

1679

div rede rvedgeren | dvhte harte gvt

vnd ovch gotelinde | ia frevte sich in der mvt

do trvgen an di helde | daz si ce wibe nam

giselher der edele | als ez wol chvenege gezam

1680

swaz sich sol gefvegen | wer moeht daz vndersten

man bat di ivnchvrowen | hin ce hove gen

do swuor man im ze gebene | daz wuennechliche wip

do lobt ovch er ce minnen | den ir vil minnechlichen lip

1681

man beshiet der ivnchvrowen | bverge vnde lant

des sicherte da mit eiden | des edeln chveniges hant

vnde ovch der herre gernot | daz wurde daz getan

do sprach der margrave | sit ich der bverge nine han

1682

so sol ich iv mit triwen | immer wesen holt

ich gibe ce miner tohter | silber vnde golt

so hvndert sovmaere | meiste mvegen tragen

daz ich des heldes magen | nach eren mvege wol behagen

1683

do hiez man si beide | sten an einen rinch

nach gewonheite | vil manich ivngelinch

in vroelichem mvte | in cegegen stvnt

si gedahten in ir sinnen | so noch di tvmmen gerne tvnt

1684

do man begonde vragen | di minnechlichen meit

ob si den recken wolde | ein teil was ez ir leit

vnt dahte doch ce nenemne | den waetlichen man

si shamte sich der vrage | so manich magt hat getan

1685

ir riet ir vater rvedger | daz si spreche ia

vnt daz si in gerne naeme | vil schiere do was da

mit sinen wizen handen | der si vmbesloz

giselher der edele | swi lvecel si sin doch genoz

1686

do sprach der margrave | ir edele chvenege rich

als ir nv wider ritet | daz ist gewonlich

heim hin zen bvrgonden | so gip ich iv min chint

daz ir si mit iv fveret | daz gelobten si sint

1687

swaz man do shalles horte | den mvsen si do lan

man hiez di ivnchvrowen | cer kemnaten gan

vnd ovch di geste slaffen | vnd ruwen an den tach

do bereite man di spise | der wirt ir gvetliche pflach

1688

do si enbizzen waren | si wolden dannen varn

gegen der hivnen landen | daz heiz ich wol bewarn

sprach der wirt vil edele | ir svlt ovch hi bestan

wand ich so lieber geste | selten hie iht gewunnen han

1689

des antwurte danchwart | ia ne mag es niht gesin

wa nemt ir di spise | daz brot vnd ovch den win

daz ir so manigen recken | noch hinte mveset han

do daz der wirt gehorte | er sprach ir svlt di rede lan

1690

mine vil lieben herren | ir svlt mir niht versagen

ia gebe ich iv di spise | ce vierzehen tagen

mit allem iwerem gesinde | daz mit iv her ist chomen

mir hat der kvenech ecel | noch vil wenich iht genomen

1691

swi sere si sich werten | si mvsen da bestan

vnz an den vierden morgen | do wart da getan

von des wirtes milte | daz verre wart geseit

er gap den sinen gesten | beidiv ross vnd chleit

1692

ez en chvnde niht wern langer | si mvsen dannen varn

rvedger der chvene | vil wenich iht gesparn

chond vor siner milte | swes iemen gerte nemen

daz versagete er niemen | ez mvse in allen gezemen

1693

ir edel ingesinde | brahte fver daz tor

gesatelt vil der moere | do chom zv zin davor

vil der vremden recken | si trvgen schilde enhant

wande si wolden ritten | in daz eceln lant

1694

der wirt do sine gabe | bot veber al

e daz di edeln geste | choemen fvr den sal

er chonde miltechliche | mit grozen eren leben

die sine tohter shoene | di het er giselher gegeben

1695

do gap er gvnthere | dem helde lobelich

daz wol trvch mit eren | der edel fvrste rich

swi selten er gabe enpfienge | ein wafenlich gewant

darnah neich do gventher | des edeln rvedgeres hant

1696

do gap er gernote | ein waffen gvt genvch

daz er sit in stvrme | vil herlichen trvch

der gabe im vil wol gonde | des margraven wip

davon der gvte rvedger | sit mvse vliesen den lip

1697

gotelint bot hagenen | als ir vil wol gezam

ir minnechlichen gabe | sit si der kvnech nam

daz er ovh an ir stivre | zv der hohgecit

von ir varn niht solde | doh widerredete er iz sit

1698

alles des ich ie gesach | sprach do hagene

so ne gert ich niht mere | hinnen ce tragene

niwan ienes shildes | dort an iener want

den wolde ich gerne fveren | in daz eceln lant

1699

do div margravinne | hagen rede vernam

ez mante si ir leides | weinen si gezam

do gedahte si vil tivre | an nvodvnges tot

den het erslagen witege | davon so het si iamers not

1700

si sprach zv dem degene | den schilt wil ich iv geben

daz wolde got von himele | daz er noch solde leben

der in da trvch enhende | der lag in stvrme tot

den mvoz ich imer weinen | des gat mir armem wibe not

1701

div edele margravinne | von dem sedele gie

mit ir vil wizen handen | si den schilt gevie

div vrowe trvg in hagenen | er nam in an di hant

div gabe was mit eren | an den recken gewant

1702

ein hvlft von liehtem pfelle | ob siner varwe lach

bezzern shilt deheinen | belvhte ni der tach

von edelm gesteine | swer sin hete gegert

ce chovffen an der choste | was er wol tvsent marche wert

1703

den schilt hiez do hagene | tragen vor im dan

do begonde danchwart | hin ce hove gan

dem gap vil richiv kleider | des margraven chint

div trvch er cen hivnen | vil harte herliche sint

1704

allez daz der gabe | von in wart genomen

in ir deheines hende | waer ir niht bechomen

wan dvrh des wirtes liebe | derz in so schone bot

sit wurdens im so vient | daz si in mvsen slahen tot

1705

volker der snelle | mit siner videlen dan

gie gezogenliche | fver gotelinde stan

er videlte sveze doene | vnd sanch ir siniv liet

damit nam er vrlovp | do er von bechelarn schiet

1706

ir hiez div margravinne | eine lade tragen

von frivntlicher gabe | mveget ir horen sagen

darvz nam si zwelf povge | vnde spiens im an di hant

di svlt ir hinnen fveren | in daz eceln lant

1707

vnde svlt dvrh minen willen | si ce hove tragen

swenne ir wider wendet | daz man mir mvege sagen

wi ir mir habt gedienet | da cer hohgecit

des div vrowe gerte | vil wol leist er daz sit

1708

do sprach der wirt cen gesten | ir svlt deste sanfter varn

ich wil ivch selbe leiten | vnd heizen wol bewarn

daz iv vf der straze | niemen mvge geschaden

do wurden sine sovme | harte schiere geladen

1709

der wirt wart wol bereitet | mit fvnfhvndert man

mit rossen vnd mit chleidern | di fvrt er mit im dan

vil harte herlichen | zv der hohgezit

der einer mit dem lebene | chom ni ze bechelaren sit

1710

mit chvsse minnechliche | der wirt do dannen schiet

also reit ovch giselher | als im sin tvgent riet

mit vmbslozen armen | si trvten schoniv wip

daz mvse sit beweinen | vil maniger ivnchvrowen lip

1711

do wurden allenthalben | div venster vf getan

der wirt mit sinen mannen | cen rossen wolde gan

ich waen ir herce in sagete | div crefftechlichen leit

da weinte manich vrowe | vnd manich waetlichiv meit

1712

nach ir lieben frivnden | genvge heten ser

di si ce bechelaren | gesahen nimmer mer

doch riten si mit vrevden | nider vber sant

ce tal bi tvnowe | vz in daz hivnisshe lant

1713

do sprach cen bvrgonden | der ritter vil gemeit

rvedger der edele | ian svln niht verdeit

wesen vnser maere | daz wir zen hivnen chomen

im hat der kvenich ecel | ni so libes niht vernomen

1714

ze tal dvrch osterriche | der bote balde reit

den livten allenthalben | wart daz wol geseit

daz di helde chomen | von wormez veber rin

des kveneges ingesinde | chonde ez niht lieber gesin

1715

di boten fver strichen | mit den maeren

daz di nibelvnge | zen hivnen waeren

dv solt si wol enpfahen | criemhilt vrowe min

dir choment nach vil grozen eren | di vil lieben brvder din

1716

criemhilt div vrowe | in ein venster stvnt

si warte nach den magen | so noch frivnde nach frivnden tvnt

von ir vaterlande | sach si manigen man

der kvenich vriehs ovch div maere | vor liebe er lachen began

1717

nv wol mich miner vrevden | sprach do criemhilt

hi bringent mine mage | vil manigen niwen schilt

von halsperge wiz | swer nemen welle golt

der gedenche miner leide | vnd wil im immer wesen holt