BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

30. Aventiure

 

___________________________________________________

 

 

Aventivre wie die kvnige mit ir rechen slafen giengen

vnd wie in do geschach

 

1818

Der tach der hete nv ende | vnd nahet in div naht

di wegmveden rechen | ir sorge si an vaht

wanne si solden ruwen | vnd an ir bette gan

daz beredete hagene | ez wart in shiere chvnt getan

1819

gventher sprach ce dem wirte | got laz ivch wol geleben

wir wellen varn slaffen | ir svlt vns vrlovb geben

swenne ir daz gebietet | so chom wir morgen frvo

er shiet von sinen gesten | vil harte vroelichen do

1820

dringen allenthalben | di geste man do sach

volker der chvene | zv den hivnen sprach

wi getvrret ir den rechen | fver di fveze gan

vnde welt irs ivch niht miden | so wirt iv leide getan

1821

so slah ich etelichem | so swaeren gegenslalch

hat er getriwer iemen | der ez beweinen mach

wan wichet ir vns rechen | ia dvnchet ez mich gvt

ez heizent allez degene | vnde sint geliche niht gemvt

1822

do der videlaere | so zornechlichen sprach

hagen der chvene | hinder sich do sach

er sprach iv ratet rehte | der chvene spileman

ir criemhilde helde | ir svlt cen herbergen gan

1823

des ir da habt willen | ich waen iz iemen tv

welt ir ihtes beginnen | so chvmet vns morgen frv

vnde lat vns ellende | hint haben gemach

ia waene ez von helden | mit solhem willen ie geschach

1824

do brahte man di geste | in einen witen sal

den fvnden si berihtet | den recken vber al

mit vil richen betten | lanch vnd breit

in riet div vrowe crimhilt | div allergrozesten leit

1825

vil manigen kolter spaehe | von arraz man da sach

der vil liehten pfellel | vnd manech pette dach

von arabisschen siden | di beste mohten sin

darvffe lagen listen | di gaben herlichen schin

1826

div dechlachen hermin | vil manegiv man da sach

vnd von swarcem zoble | darvnder si ir gemach

des nahtes shaffen solden | vnz an den liehten tach

ein kvnech mit sinem gesinde | ni so herlich gelach

1827

owe der nahtselde | sprach giselher daz chint

vnd owe miner frivnde | di mit vns chomen sint

swi et ez vns min swester | so gvetliche erbot

ich fvrhte daz wir mvezen | von ir schvlden ligen tot

1828

nv lazet iwer sorgen | sprach hagen der degen

ich wil noch hinte selbe | der shiltwahte pflegen

ich truwe vns wol behveten | vnz chomet der tach

des sit gar an angest | so genese swer der mach

1829

do nigen si im alle | vnde sagten im des danch

si giengen zv den betten | div wile was niht lanch

daz sich geleget heten | di waetlichen man

hagen der chvene | helt sich waffen began

1830

do sprach der videlaere | wolker der degen

versmahet ez iv niht hagene | so wolde ich mit iv pflegen

der shiltwahte hinte | vnz morgen frvo

der helt vil minnechliche | danchet volkere do

1831

nv lon iv got von himele | vil lieber volker

zallen minen sorgen | son gert ich niemens mer

niwan ivch aleine | swa ich hete not

ich sol ez wol verdienen | mich en wendes der tot

1832

do garten si sich beide | in liehtez ir gewant

do nam ir ietwedere | den schilt an sine hant

vnd giengen vz dem hvse | fver di tver stan

do pflagen si der geste | daz was mit triwen getan

1833

volker der snelle | zv des sales want

sinen shilt den gvten | leit er von der hant

do gi er hin widere | di videl er genam

do diente er sinen frivnden | als ez dem helde gezam

1834

vnder di tver des hvses | saz er fver den stein

chvener videlaere | der wart ni dehein

do im der seiten doenen | so svezechlich erclanch

di stolzen ellenden | sagtens volkeren danch

1835

do chlvngen sine seiten | daz allez daz hvs erdoz

sin ellen zv der fvoge | div beidiv waren groz

ie svezer vnd svezer | er videln began

do entswebete er an den betten | vil manegen sorgenden man

1836

do si entslaffen waren | vnd er daz ervant

do nam der degen widere | den schilt an di hant

vnd gie zv dem gademe | fver den tvrn stan

vnd hvote der ellenden | vor den crimhilde man

1837

des nahtes wol emmitten | ine weiz iz e geschach

daz volker der chvene | einen helm schinen sach

verre vz einer vinster | di criemhilde man

di wolden an den gestn | gerne shaden han getan

1838

do sprach der videlaere | frivnt hagene

vns zimt disiv sorge | ensamt ce tragene

ich sihe gewaffente livte | bi dem hvse sten

als ich mich versinne | ich waene si wellent vns besten

1839

so swiget sprach do hagene | lat se vns her naher baz

e si vnser werden innen | so wirt hi helmvaz

verrvchet mit den swerten | von vnser zweier hant

si werdent criemhilde vhin wider vebele gesant

1840

ein der hivnen rechen | vil schiere daz gesach

daz div tver was behevtet | wi balde er do sprach

des wir da heten willen | ian mag es niht ergan

ich sihe den videlaere | an der schiltwahte stan

1841

der treit vf sinem hovbete | einen helm glanz

lvter vnd herte | starch vnde ganz

ovch lovhtent im di ringe | sam daz fiwer tvt

bi im stet ovch hagene | des sint di geste wol behvt

1842

zehant si cherten widere | do volker daz ersach

wider sinen gesellen | er zornechlichen sprach

nv lat mich zv den recken | vor dem hvse gan

ich wil vragen maere | der vrovn criemhilde man

1843

nein dvrch mine liebe | sprach do hagene

chomt ir von dem hvse | di snellen degene

bringent ivch mit swerten | vil lihte in soelhe not

daz ich iv mvese helfen | vnd waer iz aller miner mage tot

1844

so wir danne beide | chomen in den strit

ir zwene oder viere | in einer chvrcen zit

sprvengen zv dem hvse | vnde taeten vns div leit

an den slaffenden recken | div nimmer wuerden verchleit

1845

do sprach aber volker | so lat daz geschehen

daz wir si bringen innen | daz ich si habe gesehen

daz des iht haben lovgen | di criemhilde man

daz si vngetriweliche | vil gerne heten getan

1846

zehant do rief in volker | hin engegene

wi get ir svs gewaffent | ir snellen degene

welt ir shachen riten | ir criemhilde man

dar svlt ir mich ce helfe | vnde mine hergesellen han

1847

des antwurte im niemen | zornech was sin mvt

pfi ir zagen boese | sprach der helt gvt

wolt ir slaffende | vns enmordet han

daz ist so gvten helden | noch vil selten her getan

1848

do wart der chveneginne | vil rehte geseit

daz ir boten niht erwuorben | von schvlden was ir leit

do fvgete si ez anders | vil grimmech was ir mvt

des mvosen sit verderben | di helde chvne vnde gvt