BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

33. Aventiure

 

___________________________________________________

 

 

Aventivre wie die bvrgonden

mit den hevnen striten

 

1951

Also der chvene danchwart | vnder di tver getrat

daz eceln gesinde | er hoher wichen bat

mit blvte was bervnnen | allez sin gewant

ein vil starchez waffen | daz trvg er bloz an siner hant

1952

vil lvt rief do danchwart | zv dem degene

ir sitzet al ce lange | brvder hagene

iv vnde got von himele | chlag ich vnser not

ritter vnde knehte | sint in den herbergen tot

1953

er rief im hin engegene | wer hat daz getan

daz het der herre blodelin | vnde sine man

ovch hat ers ser engolten | daz wil ich iv sagen

ich han mit minen handen | im sin hovbet abe geslagen

1954

daz ist ein schade chleine | sprach aber hagene

da man saget maere | von einem degene

ob er von rechen henden | verlivset sinen lip

in svln deste ringer | chlagen waetlichiv wip

1955

nv saget mir brvder danchwart | wi sit ir so rot

ich wene ir von vinden | lidet groze not

ist er inder ime lande | derz iv hat getan

in en nert der vbel tivfel | ez mvz im an sin leben gan

1956

dv sihest mich wol gesvnden | min wat ist blvtes naz

von anderr manne wunden | ist mir geschehen daz

der ich also manegen | hivte han erslagen

ob ich es swern solde | ine chvndiz nimmer gesagen

1957

er sprach brvder danchwart | so hvetet vns der tver

vnde lat der hivnen einen | chomen niht derfver

ich wil reden mit den recken | als vns des twinget not

vnser ingesinde | lit vor in vnverdienet tot

1958

sol ich sin chameraere | sprach der chvene man

also richen chvenegen | ich gedienen chan

so pflige ich der stiegen | nach den eren min

den criemhilde degenen | chvnde leider niht gesin

1959

mich nimt des michel wunder | sprach aber hagene

waz nv hinne rvnen | di hivnen degene

si waen liht des enbaeren | der an der tvr da stat

vnt div hovemaere | gesaget den bvergonden hat

1960

ich han vernomen lange | von criemhilde sagen

daz si ir herceleide | wold niht vertragen

nv trinchen wir di minne | vnde gelten skveneges win

der ivnge vogt der hivnen | der mvz der erste sin

1961

do slvch daz chint ortlieben | hagen der helt gvt

daz im gegen der hende | ame swerte vloz daz blvt

vnt daz dem chvenege | daz hovbet spranch in di shoz

do hvb sich vnder degenen | ein mort vil grimmech vnde groz

1962

darnach slvg er dem magtzogen | einen swinden slach

mit beiden sinen henden | der des chindes pflach

daz im daz hovbet schiere | vor dem thisse nider lach

ez was ein iamerlichez lon | daz er dem magtzogen wach

1963

er sach vor eceln thisse | einen spilman

hagen in sinem zorne | gahen dar began

er slvch im vf der videlen | ab di zeswen hant

daz habe dir ce botschepfte | in der bvrgonden lant

1964

so we mir miner hende | sprach werbel der spilman

her hagen von tronege | waz het ich iv getan

ich chom vf groze triwe | in iwerr herren lant

wi chlinge ich nv di done | sit ich verlorn han di hant

1965

hagen geahtet ringe | gevidelte er nimmer mer

do frvmt er in dem hvse | div mortgrimmen ser

an den eceln rechen | der er so vil erslvch

do braht er in dem hvse | livtes ce tode genvch

1966

volker der vil snelle | von dem thisse spranch

sin videlboge im lvt | an siner hende erchlanch

do videlte vngefvge | gvntheres spilman

hey waz er im ce viende | der chvenen hivnen gewan

1967

ovch sprvngen von den thissen | di drie chvenege her

si woldenz gerne scheiden | e daz shaden geshaehe mer

si ne mohtenz mit ir sinnen | do niht vnderstan

do volker vnde hagene | so sere wueten began

1968

do sach der vogt von rine | vngescheiden den strit

do slvch der fvrste selbe | vil manige wunden wit

dvrch di liehten ringe | den vianden sin

er was ein helt cen handen | daz tet er groezliche schin

1969

do chom ovch zv dem strite | der starche gernot

ia frvmte er der hivnen | vil manegen helt tot

mit einem sharpfem swerte | daz gab im rvedeger

den eceln rechen | tet er div groezlichen ser

1970

der ivnge svn vrovn vten | zv dem strite spranch

sin waffen herlichen | dvrch di helm erchlanch

den eceln recken | vzer hivnen lant

da tet vil michel wunder | des chvenen giselheres hant

1971

swi frvm si alle waeren | di chvnege vnd alle ir man

doch sach man vor in allen | giselheren stan

gegen den vianden | er was ein helt gvt

er frvmt da mit wunden | vil manegen vallen in daz plvt

1972

ovch werten sich vil sere | di eceln man

do sach man di geste | hohwende stan

mit den vil liehten swerten | dvrh des chveneges sal

do horte man allenthalben | von wuffe grozen schal

1973

do wolden di darvz | zir frivnde sin darin

di namen an den tvernen | vil chleinen gewin

do waeren di darinne | vil gerne fver den sal

danchwart liez ir deheinen | di stiegen vf vnde ovch ce tal

1974

des hvb sich vor dem tvrne | vil starcher gedranch

vnde ovch von den swerten | grozer helmechlanch

des chom der chvene danchwart | in eine groze not

daz besorgete sin brvder | als im sin triwe daz gebot

1975

vil lvte rief do hagene | voelkeren an

seht ir dort geselle | minen brvder stan

vor hivnisschen recken | vnder starchen slegen

vrivnt nert mir den brvder | e wir vliesen den degen

1976

daz tvn ich sicherlichen | sprach der spilman

er begonde videlende | dvrch den palas gan

ein hertez swert im ofte | an siner hende erchlanch

di recken von dem rine | im sageten grozlichen danch

1977

volker der chvene | zv danchwarten sprach

ir habt erlitten hivte | vil grozen vngemach

mich bat iwer brvder | dvrch helfe zv ziv gan

welt ir nv sin darvze | so wil ich innerthalben stan

1978

danchwart der snelle | stvnt vzerthalp der tver

er werte in ir stiege | swaz ir chom darfver

des horte man waffen hellen | den helden an der hant

sam tet ovch innerthalben | volker von bvrgonden lant

1979

der chvene videlaere | rief veber di menege

der sal ist wol beslozen | min vrint her hagene

ia ist also verschranchet | div eceln tver

von zweir helde handen | den gent wol tvsent rigel fver

1980

do von tronege hagene | di tver sah so behvt

den schilt warf do ce rvke | der maere helt gvt

do begond er erste rechen | daz im was getan

do heten sine viande | cem lebene deheiner slahte wan

1981

do der vogt von rine | reht daz ersach

daz hagen der starche | so manegen helm brach

der chvenech der amelvnge | spranch vf eine banch

er sprach hie shenchet hagene | daz allerwirsiste tranch

1982

der wirt het groze sorge | als im do daz gezam

waz man im lieber vrivnde | vor sinen ovgen nam

wande er vor sinen vinden | vil chvme da genas

er saz vil angestlichen | was half in daz er kvenech was

1983

criemhilt div riche | rief dieterichen an

nv hilf mir ritter edele | mit dem leben dan

dvrch aller fversten tvgende | vzer amelvnge lant

wand erreichet mich hagene | ich han den tot an der hant

1984

wi sol ich iv nv gehelffen | sprach her dieterich

edeliv chvneginne | nv sorge ich vmbe mich

ez sint so sere erzvernet | di gvntheres man

daz ich an disen ziten | gefriden niemen chan

1985

neina herre dieterich | vil edel ritter gvt

laza hivte schinen | den tvgentlichen mvt

daz dv mir helfest hinnen | oder ich belibe tot

der sorge gie criemhilde | vil harte groezliche not

1986

daz wil versvchen | ob ich iv gehelfen chan

wande ich in manegen ziten | nie gesehen han

so bitterlich erzvernet | so manegen ritter gvt

ia sah er dvrch di helme | von swerten springen daz plvt

1987

mit krapf begonde rvfen | der degen vzerchorn

daz sin stimme erlvte | alsam ein wisentes horn

vnt daz div bvrch vil wite | von siner crapft erdoz

div sterche dieteriches | was vnmaezliche groz

1988

do gehorte gventher | rvffen disen man

in dem herten stvrme | losen er began

er sprach dieteriches stimme | ist in min ore chomen

ich waene im vnser degene | im haben etwaen hi benomen

1989

ich sih in vf dem thisse | er winchet mit der hant

ir frivnt vnde mage | von bvergonden lant

gehabt vf des strites | lat hoeren vnde sehen

waz hi dem degene | von minen mannen si geschehen

1990

do der kvenech gventher | bat vnde ovch gebot

si habten vf mit swerten | in des strites not

daz was gewalt vil grozer | daz da niemen slvch

ia vragete den von berne | der maere schiere genvch

1991

er sprach vil edel dieterich | waz ist iv hi getan

von den minen vrivnden | willen ich des han

bvze vnde svne der | bin ich iv bereit

swaz iv iemen taete | daz waer mir innechlichen leit

1992

do sprach der herre dieterich | mir ist niht getan

lat mich vz dem hvse | mit iwerem vride gan

von disem herten strite | mit dem gesinde min

daz wil ich sicherlichen | immer dienende sin

1993

wi vliehet ir so schiere | sprach do wolfrat

ia hat der videlaere | di tver ni so verspart

wir entsliezen so wite | daz wir dar fver gan

nv swiget sprach her dieterich | ir habet den tivel getan

1994

do sprach der kvenech gventher | erlovben ich iv wil

fvret vze dem hvse | lvecel oder vil

ane mine vinde | di svln hi bestan

si hant mir hi cen hivnen | so rehte leide getan

1995

do er daz gehorte | vnder arme er besloz

di edeln kveneginne | der sorge div was groz

do fvrt er anderthalben | eceln mit im dan

ovch mit dieteriche | sehs hvndert waetlicher man

1996

do sprach der margrave | der edel rvedger

sol aber vzem hvse | iemen chomen mer

di iv doch gerne dienen | daz lazet vns vernemen

so sol ovch vride staeter | den gvten vienden gezemen

1997

des antwurte giselher | von bvrgonden lant

vride vnde svne | si iv von vns bechant

sit ir sit triwen staete | ir vnde iwer man

ir svlt vnangestlichen | mit iwern vrivnden hinnen gan

1998

do rvedeger der herre | gervmete den sal

fvnfhvndert oder mere | im volgeten veber al

der von baechelaren | vrivnt vnde siner man

von dem chvenege rvedeger | schaden grozen sit gewan

1999

do sach ein hivnen recke | eceln gan

bi dieteriche nahen | genozen wold er sin han

dem gap der videlaere | einen solhen slach

daz im vor eceln fvzzen | daz hovbet schiere gelach

2000

do der wirt des landes | chom fver daz hvs gegan

do chert er sich hin widere | vnde sach volkeren an

owe mir dirre geste | dice ist ein grimmigiv not

daz alle mine recken | svln vor in wesen tot

2001

ach we der hohgezite | sprach der chvenech her

da vihtet einer inne | der heizet voelker

als ein eber wilde | vnde ist ein spilman

ich danches minem heile | daz ich dem tivel entran

2002

sine leiche lvtent vbele | sine zvege di sint rot

ia vellent sine doene | vil manigen helt tot

ine weiz niht waz vns wize | der selbe spilman

wand ich gast ni deheinen | so rehte leiden gewan

2003

si heten di si wolden | lazen fver den sal

do hvb sich innerthalben | ein grozlicher schal

di geste sere rachen | daz in e geschach

volker der vil chvene | hey waz er helme cerbrach

2004

sich cherte gegen dem schalle | gventher der kvenech her

hoert ir doene hagene | di dort volker

videlt mit den hivnen | swer zv dem tvrn gat

ez ist ein roter anstrich | den er ce dem videlbogen hat

2005

mich riwet ane maze | so sprach hagene

daz ich ie gesaz in dem hvse | vor dem degene

ich was sin geselle | vnde ovch er der min

vnd chome wir immer wider heim | daz svln wir noch mit triwen sin

2006

nv schowe kvenech here | volker ist dir holt

er dienet vlizechliche | din silber vnt din golt

sin videlboge im snidet | dvrch den herten stal

er brichet vf den helmen | div liehte schinenden mal

2007

ine gesach nie videlaere | so herlichen stan

als der degen volker | hivte hat getan

di sinen leiche hellent | dvrch helme vnd rant

ia sol er riten gutiv ross | vnde tragen herlich gewant

2008

swaz der hivnen mage | in dem sal was genesen

der en was nv deheiner | darinne me genesen

des was der schal geswiftet | daz niemen mit in streit

div swert von handen legeten | di chvenen recken gemeit