BIBLIOTHECA AUGUSTANA

 

Das Nibelungenlied

1190/1200

 

 

Der Nibelunge Nôt

 

36. Aventiure

 

___________________________________________________

 

 

Aventivre wie div chvnigin

den sal beraiten hiez

 

2081

Nv bintet ab di helme | sprach hagen der degen

ich vnde mine gesellen | wir svln iwer pflegen

vnde wellent iz noch versvchen | zv zvns di eceln man

so warne ich mine herren | so ich allerschiereste chan

2082

do entwafent daz hovbet | vil manich ritter gvt

si sazen vf di wunden | di vor in in daz plvot

waren zv dem tode | von ir handen chomen

da wart der edeln geste | vil vebele govm genomen

2083

noch vor dem abende | do shvf der kvnech daz

vnde ovch div chvneginne | daz ez versvchten baz

di hivnisschen recken | der sah man vor in stan

noch wol zweinzech tvsent | si mvsen da ce strite gan

2084

sich hvb ein stvrm herte | zv den gesten san

danchwart hagen brvder | vil snelle man

spranch von sinen herren | cen vienden fver di tver

man wande er waere erstorben | er chom gesvnder wol darfver

2085

der herte strit der werte | vnz iz div naht benam

do werten sich di geste | als gvten helden zam

den eceln mannen | den svmerlangen tach

hey waz noch chvener degene | vor in veige gelach

2086

ceinen svnewenden | daz groze mort geschach

daz div vrowe criemhilt | ir hereceleit errach

an ir naehesten magen | vnde anderem manigem man

davon der kvenech ecel | vrevde nimmer mer gewan

2087

in was des tages cervnnen | do gie in sorgen not

si gedahten daz in bezer | waere ein chvercer tot

denne lange da ce qvelne | vf vngefvegiv leit

eines vrides si do gerten | di stolcen ritter gemeit

2088

si baten daz man brehte | den kvenech zv in dar

di blvtvarwen helde | vnde ovch harnaschvar

traten vz dem hvse | di drie kvenege her

si ne wessen wem ce chlagene | div ir vil grozlichen ser

2089

ecel vnde | di chomen beide dar

daz lant daz was ir eigen | des merte sich ir schar

er sprach zv den gesten | nv saget waz welt ir min

ir waenet vride gewinnen | daz chvnde mvelich gesin

2090

vf schaden also grozen | als ir mir habt getan

ir svlt is niht geniezen vnde | sol ich min leben han

daz chint daz ir mir slvget | vnd vil der mage min

vrid vnde svne | sol iv vil gar versaget sin

2091

des antwurte gventher | des twanch vns groziv not

allez min gesinde | lach vor dinen helden tot

an der herberge | wi het ich daz versolt

ich chom zv dir vf triwe | ich wande daz mir waerest holt

2092

do sprach von bvrgonden | giselher daz chint

ir eceln helde | di noch hi lebende sint

waz wizet ir mir recken | waz han ich iv getan

wand ich vrivntliche | in diz lant geritten han

2093

si sprachen diner gvete | ist al div bvrch vol

mit iamer zv dem lande | ia gonden wir dir wol

daz dv ni chomen waerest | von wormez veber rin

daz lant habt ir verweiset | dv vnt di brvder din

2094

do sprach in zornes mvte | gventher der degen

welt ir diz starche hazen | ce einer svne legen

mit vns ellenden recken | deist beidenthalben gvt

ez ist gar ane schvlde | swaz vns ecel getvt

2095

do sprach der wirt cen gesten | min vnd iwer leit

div sint vil vngeliche | div michel arbeit

des schaden zv den schanden | di ich hie han genomen

des sol iwer deheiner | nimmer lebende hinnen chomen

2096

do sprach zv dem chvenege | der starche gernot

so sol iv got gebieten | daz ir frvemechlichen tvt

slaht vns ellenden | vnd lat vns zv ziv gan

hin nider an di wite | daz ist iv ere getan

2097

swaz vns geschehen chvenne | daz lat chverzliche ergan

ir habt so vil gesvnder | vnt tvrrens vns bestan

daz si stvermmvede | lazent niht genesen

wi lange svln wir recken | in disen arbeiten wesen

2098

di eceln recken | di hetenz nach getan

daz si si wolden lazen | fver den palas gan

daz gehorte criemhilt | ez was ir harte leit

des wart den ellenden | der vride ce gahes verseit

2099

neina hivnen recken | des ir da habt mvt

ich rat an rehten triwen | daz ir des niht en tvt

daz ir di mortraezen | lazet fver den sal

so mvsen iwer mage | liden den totlichen val

2100

ob ir nv niemen lebte | wan div vten chint

min edele brvder | vnde chomen si an den wint

erchvlent in di ringe | so sit ir alle vlorn

ez en wurden chvener degene | ni cer werld geborn

2101

do sprach der ivnge giselher | vil schoniv swester min

des trvte ich vil vebele | daz dv mich veber rin

ladetes her ce lande | in dise groze not

wi han ich an den hivnen | hi verdienet den tot

2102

ich was dir ie getriwe | ni getet ich dir leit

vf solhen gedingen | ich her ce lande reit

daz dv mir holt waerest | vil liebiv swester min

bedenche an vns genade | ez mach niht anders nv gesin

2103

ine mach iv niht genaden | vngenade ich han

mir hat von tronege hagene | so groziv leit getan

ez ist vil vnvesvenet bdi wil ich han den lip

ir mvezet es alle engelten | sprach daz eceln wip

2104

welt ir mir hagenen einen | her ce gisel geben

so ne wil ich nith versprechen | ich welli ivch lazen leben

wande ir sit mine brvder | vnde einer mvter chint

so red ich ez nach der svone | mit disen helden di hie sint

2105

nv ne welle got von himele | sprach do gernot

ob vnser tvsent waeren | wir laegen alle tot

der sippen diner mage | e wir dir einen man

gaeben hi ce gisel | ez wirdet nimmer getan

2106

wir mvesen doch ersterben | sprach do giselher

vns scheidet niemen | von ritterlicher wer

swer gerne mit vns vehte | wir sin et aber hie

wande ich deheinen minen frivnt | an den triwen ni verlie

2107

do sprach der chvne danchwart | im zaeme niht ce dagene

ia ne stet niht eine | min brvoder hagene

di hi den vride versprechent | ez mach in werden leit

des bringe ich ivch wol innen | daz si iv waerlich geseit

2108

do sprach div chvneginne | ir helde vil gemeit

nv get der stiege naher bvnde rechet miniv leit

daz wil ich immer dienen | als ich von rehte sol

der hagenen vebermvete | der gelon ich im wol

2109

lat einen vz dem hvse | niht chomen veber al

si hiez viern enden | zvenden an den sal

so werdent wol errochen | elliv miniv leit

di eceln degene | wurden schiere bereit

2110

di nahe hi vze stvnden | di tribens in den sal

mit slegen vnde mit shvezen | des wart vil groz der schal

doh wolden nie gescheiden | di fversten vnd ir man

si ne chonden vor ir triwen | einander niht verlan

2111

den sal den hiez do zvenden | daz eceln wip

do quelte man den recken | mit fiwer da den lip

daz hvs von einem winde | vil balde allez bran

ich waene daz wolch enheinez | grozzer angest nie gewan

2112

genvge rvfften drinne | owe dirre not

wir mohten michel gerner | sin in stvrme tot

ez mohte got erbarmen | wi sin wir alle vlorn

nv richet vngefvege | an vns div kveneginne ir zorn

2113

ir einer sprach darinne | wir mvezen ligen tot

waz hilffet vns daz grvezzen | daz vns der kvenech enbot

mir tvt von starcher hice | der dvrst so rehte we

des waen min leben shier | in disen sorgen cerge

2114

do sprach von tronege hagene | ir edel ritter gvt

swen twinge dvrstes not | der trinche hie daz plvt

daz ist in solher hice | bezer danne win

ez en mach an disen ziten | et nv niht bezer gesin

2115

do gie der recken einer | da er einen toten vant

er kniete im zv den wunden | den helm er ab gebant

do begond er trinchen | daz vliezende plvt

swi vngevon ers waere | ez dvhte in grozliche gvt

2116

nv lon iv got her hagene | sprach der mvede man

daz ich von iwer lere | so wol getrvnchen han

mir ist noch vil selten | geshenchet bezer win

lebe ich deheine wile | ich sol iv immer waege sin

2117

do di ander daz gehorten | daz ez in dvhte gvt

do wart ir michel mere | di trvnchen ovch daz plvt

davon gewan vil crhepfte | ir etesliches lip

des engalt an lieben frivnden | sit vil manech waetlich wip

2118

daz fiwer viel genote | vf si in den sal

do leiten siz mit schilden | von in hin ce tal

der rovch vnd ovch div hice | in taten beidiv we

ich waene den iamer immer | mer an helden erge

2119

do sprach von tronege hagene | stet zv des sals want

lat niht di brende vallen | vf iwer helm bant

tret si mit den fvzen | nider in daz plvt

ez ist ein vebel hohzit | di vns div chvneginne git

2120

in svs getanen leiden | der naht in doch ceran

noch stvnt vor dem hvse | der chvene spileman

vnde hagen sin geselle | geleinet veber rant

si warten shaden mere | von den vz eceln lant

2121

do sprach der videlaere | nv ge wir in den sal

so waenent des di hivnen | daz wir sin veber al

tot von dirre quale | div an vns ist getan

si sehent vns noh degene | in strite ir etelichen stan

2122

do sprach von bvrgonden | giselher daz chint

ich waen ez tagen welle | sich hebt ein chvler wint

nv laz vns got von himele | ein lieber zit geleben

vns hat min swester criemhilt | ein arge hohzit gegeben

2123

do sprach aber einer | ich chivse nv den tach

sit daz ez vns nv bezer | wesen niht en mach

so wafent ir ivch helde | gedenchet an den lip

ia chvemt vns aber schiere | des chvenech eceln wip

2124

der wirt der wolde waenen | di geste waren tot

von ir arbeite | vnd von des fiwers not

do lebt ir noch darinne | sehs hvndert chvener man

daz nie chvenech deheiner | bezer degene gewan

2125

der ellenden hvte | het man wol ersehen

daz noch di geste lebten | swi vil in was geschehen

ce shaden vnt ce leide | den herren vnde ir man

man sach si in dem gademe | noch vil wol gesvnde stan

2126

man sagete criemhilde | ir waere vil genesen

do sprach div chveneginne | daz chvnde nimmer wesen

daz ir deheiner lebte | von des fiwers not

ich wil des baz getruwen | daz si alle ligen tot

2127

noch genaesen gerne | di fversten vnd ir man

ob noch iemen wolde | genade an in began

di ne chvnden si niht vinden | an den von hivnen lant

da rachen si ir sterben | mit vil werlicher hant

2128

des tages wider morgen | grvezen man in bot

mit hertem vrlivge | des chomen helde in not

do wart zv zin geshozen | vil manech herter ger

sich werten ritterlichen | di recken chvene vnde her

2129

dem eceln gesinde | erwegt was der mvt

daz si wolden | daz criemhilde gvt

darzv si wolden leisten | daz in der chvenech gebot

des mvse maneger schiere | von in chiesen den tot

2130

von geheize vnde von gabe | man mohte wunder sagen

si hiez golt daz rote | darin mit schilden tragen

si gab ez swer sin rvchte | vnd ez wolde enpfan

ia ne wart nie grozer solden | mer vf viende getan

2131

ein michel chrapft der recken | darzv gewaffent gie

do sprach der chvene volker | wir sin et aber hie

ine gesach nie vf vehten | helde gerner chomen

di daz golt des chveneges | vns ce vare hant genomen

2132

do riefen da genvge | naher helde baz

daz wir da svln verdienen | vnde tvn bezite daz

hie belibet niemen | want der doh sterben sol

do sach man schier ir schilde | stechen gere schveze vol

2133

waz mach ich sagen mere | wol zwelf hvndert man

di versvchtenz vil sere | wider vnde dan

do chvlten mit den wunden | di geste wol ir mvt

ez mohte niemen gescheiden | des sach man vlizen daz plvt

2134

von verchtiefen wunden | der wart da vil geslagen

ieslichen nach sinen vrivnden | horte man sere chlagen

di biderben stvrben alle | dem richen chvnege her

des heten holde mage | nach in grozlichiv ser