Der Nibelunge Nôt

39. Aventiure

___________________________________________________

Aventivre wie der herre dieterich

gventher vnde hagenen betwanch

2324

Do svocht der herre dieterich | selbe sin gewant

im half daz er sich waffente | meister hildebrant

do chlagete also sere | der chrepftige man

daz daz hus erdiezen | von sinen chrepften began

2325

do gewan er wider | rehten heldes mvt

in grimme wart gewafent | do der helt gvt

einen schilt vil vesten | nam er an di hant

si giengn dannen balde | er vnde meister hildebrant

2326

do sprach von tronege hagene | ich sihe dort her gan

hern dieterichen | der wil vns bestan

nach sinem starchem leide | daz im ist hi geschehen

man sol daz hivte chiesen | wem man des besten mvge iehen

2327

ian en dunchet sich von berne | der herre dieterich

nie so starch des libes | vnd ovch so griwelich

vnd wilz erz an vns rechen | daz im ist getan

also redete hagene | ich tar in rehte wol bestan

2328

dise rede horte | dieterich vnd ovh hildebrant

er chom da er di recken | beide stende vant

vzen vor dem huse | geleinet an den sal

sinen schilt den guten | den satzet dieterich ce tal

2329

in leidechlichen sorgen | sprach do dieterich

wi habt ir so geworben | guenther chuenech rich

wider mich ellenden | waz het ich iv getan

alles mines trostes | des pin ich hie eine bestan

2330

ivch en duhte niht der volle | an der grozen not

do ir vns ruedegeren | den helt sluget tot

nv habet ir mir erbunnen | aller miner man

ia ne het ich iv helden | soelher leide niht getan

2331

gedenchet an ivch selben | vnde an iwer leit

tot der iwern vrivnde | vnd ovch div arbeit

ob ez iv guten recken | beswaeret iht den mut

owe wi rehte vnsanpfte | mit tot der rvedgeres tvt

2332

ez geschach ce dirre werlde | nie leider manne mer

ir gedahtet vebele | an min vnd an iwer ser

swaz ich frivnde hete | di sint von iv erslagen

ia ne chan ich nimmer mere | di minen mage verchlagen

2333

ia ne sin wir niht so schvldich | sprach do hagene

ez giengen zv disem hvse | iwer degene

gewafent wol ce elize | mit einer schar so breit

mich dunchet daz div maere | iv niht rehte sin geseit

2334

waz sol ich gelovben maere | mir seitz hildebrant

do mine recken gerten | von amelvnge lant

daz ir in rvedgeren | gaebet vz dem sal

do but ir niwan spotten | den chvenen helden her ce tal

2335

do sprach der kvenech von rine | si iahen wolden tragen

rvedgeren hinnen | den hiez ich in versagen

eceln ce leide | vnd niht den dinen man

vnz daz do wolfhart | darvmbe shelten began

2336

do sprach der helt von berne | ez mvst et also sin

gventher chvenech edele | dvrch di zvht din

ergetzze mich der leide | di mir von dir sint geschehen

vnd svene iz ritter chvene | daz ich des chvenne dir geiehen

2337

ergip dich mir ce gisel | dv vnd ovch din man

so wil ich behveten | so ih allerbeste chan

daz dir cen hivnen | niemen niht en tvt

dv ne solt an mir niht vinden | niwan triwen vnde gvt

2338

daz en welle got von himele | sprah do hagene

daz sich dir ergaeben | zwene degene

di noch werliche | gewaffent gegen dir stant

vnd noch so ledechliche | vor ir vianden gant

2339

ir en svlt iz niht versprechen | so redete dieterich

gventher vnde hagene | ir habt beide mich

so ser beswaeret | daz herce vnd ovch den mvt

welt ir mich ergezzen | daz irz vil pilliche tvt

2340

ich gibe iv mine triwe | vnd sicherliche hant

daz ich mit iv rite | heim in iwer lant

ich leit ivch nach den eren | oder ich gelige tot

vnd wil durch ivch vergezzen | der minen groezlichen not

2341

nv ne muotet sin niht mere | sprach aber hagene

von vns zimet daz maere | niht wol ce sagene

daz sich iv ergaeben | zwene also chvene man

nv siht man bi iv niemen | wan eine hildebranden stan

2342

do sprach meister hildebrant | got weiz her hagene

der iv den vride bivtet | mit iv ce tragene

ez chumt noch an di stunde | daz ir moehtet nemen

di svne mines herren | moht ir iv lazen gezemen

2343

ia naeme ich di svne | sprach aber hagene

e ich so lasterliche | vze einem gademe

fluehe meister hildebrant | als ir hie habt getan

ich waene daz ir chundet | baz gein vianden stan

2344

des antwurte hildebrant | zwiv verwizet ir mir daz

nv wer was der vf einem schilde | vor dem waskensteine saz

do im von spanye walther | so uil der frivnde slvch

ovch habt ir noch ce zeigen | an iv selben genuch

2345

do sprach der herre dieterich | ez en zimt niht helde lip

daz si svln shelten | sam div alten wip

ich verbivt iv hildebrant | daz ir niht sprechet mer

mich ellenden recken | twingent grozlichiv ser

2346

lat horen sprach dieterich | recke hagene

waz ir beide spraechet | snellen degene

do ir mich gewafent | zv ziv sahet gan

ir iahet daz ir eine | mit strite woldet mich bestan

2347

ia ne lovgent iv des niemen | sprach hagen der degen

ine wellez hie versvchen | mit den starchen slegen

ez en si daz mir cebreste | daz nibelunges swert

mir ist zorn daz vnser beider | ist ce gisel hie gegert

2348

do dieterich gehorte | den grimmen hagenen mvt

den schilt vil balde zvchte | der snelle degn gvt

wi balde gein im hagene | von der stiege spranch

niblvnges swert daz gvte | vil lvt vf dieteriche erchlanch

2349

do wesse wol her dieterich | daz der chvene man

vil grimmes mvtes waere | schermen im began

der herre von berne | vor angestlichen slegen

wol erchand er hagenen | den vil zierlichen degen

2350

ovch vorht er balmungen | ein wafen starch genvch

vnder wilen dietrich | mit listen widerslvch

vnz daz er hagenen | mit strite doch betwanch

er slvch im eine wunden | div was tief vnde lanch

2351

do daht der herre dietrich | dv bist in noeten erwigen

ich hans lvecel ere | soltv tot vor mir geligen

ich wilz sus versvchen | ob ich ertwingen chan

dich mir ce einem gisel | daz wart mit sorgen getan

2352

den schilt den liez er vallen | sin sterche div was groz

hagenen von tronege | mit armen er besloz

des wart do betwungen | von im der chvene man

gventher der edele | darvmbe trvoren began

2353

hagenen bant dieterich | vnd fvrt in da er vant

di edeln kveneginne | vnd gab ir bi der hant

den chvenesten recken | der ie swert getrvch

nach ir vil starchem leide | do wart si vroelich genvch

2354

vor liebe neich dem degene | daz eceln wip

immer si dir saelich | din herce vnd ovch der lip

dv hast mich wol ergezzet | aller miner not

daz sol ich immer dienen | mich en svme danne der tot

2355

do sprach der herre dietrich | ir svlt in lan genesen

edliv chveneginne | vnd mach daz noch gewesen

wi wol er ivch ergezzet | daz er iv hat getan

ern sol des niht engelten | daz ir in seht gebvnden stan

2356

do hiez si hagenen fveren | an sin vngemach

da er lach beslozen | vnt da niemen sach

gventher der kvenech edele | rveffen do began

war chom der helt von berne | der hat mir leide getan

2357

do gie im hin engegene | der herre dietrich

daz gventheres ellen | daz was vil loblich

do ne beit ovch er niht mere | er lief her fver den sal

von ir beider swerten | huop sich ein groezlicher shal

2358

swi vil der herre dietrich | lange was gelobt

gventher was so ser | erzvernet vnd ertobt

wand er nach starchem leide | sin herce vient was

man sagt ez noch ce wunder | daz do her dietrich genas

2359

ir ellen vnd ir sterche | beider waren groz

palas vnd tvrne | von den slegen doz

do si mit swerten hiwen | vf die helme gvt

ez het der kvenech gventher | einen herlichen mvt

2360

sit twang in der von berne | sam hagenen e geschach

daz plvot man dvrch di ringe | dem helde vliezen sach

von einem sharpfen swerte | daz trvch dietrich

do het gewert her gventher | nach mvede lobeliche sich

2361

der herre wart gebvnden | von dietriches hant

swi chvenege nine solden | liden solhiv bant

er daht ob er si lieze | den kvenech vnde sinen man

alle di si fvenden | di mvesen tot von in bestan

2362

dieterich von berne | der nam in bi der hant

do fvrt er in gebunden | da er criemhilde vant

do was mit sinem leide | ir sorgen vil erwant

si sprach willechom gventher | vzer bvrgonden lant

2363

er sprach ich sol iv nigen | vil liebiv swester min

ob iwer grvezen moehte | genaedechlicher sin

ich weiz ivch kveneginne | so zornech gemvt

daz ir mich vnde hagenen | vil swache grvezen getvt

2364

do sprach der helt von berne | vil edeles chveneges wip

ez en wart gisel mere | so guter ritter lip

als ich vrowe here | iv an in gegebn han

nv svlt ir di ellenden | min vil wol geniezen lan

2365

si iach si taet iz gerne | do gi her dieterich

mit weinenden ovgen | von den helden lobelich

sit rach sich grimmechlichen | daz eceln wip

den vzerwelten degenen | nam si beiden den lip

2366

sie lie si ligen besvnder | dvrch ir vngemach

daz ir sit deweder | den andern ni gesach

vnz si ir brvder hovbet | hin fver hagenen trvch

der criemhilde rache | wart an in beiden genvch

2367

do gie div chvneginne | da si hagenen sach

wi rehte fientliche | si zv dem helde sprach

welt ir mir geben wider | daz ir mir habt genomen

so mvget ir wol lebende | heim cen bvrgonden chomen

2368

do sprach der grimme hagene | div rede ist gar verlorn

vil edliv chveneginne | ia han ich des gesworn

daz ich den hort iht zeige | di wile daz si leben

deheiner miner herren | so sol ich in niemene geben

2369

ich bringez an ein ende | so sprah daz edel wip

do hiez si ir bruder | nemen sinen vil shonen lip

slvch im ab daz hovbet | bi dem hare si ez trvch

fver den helt von tronege | do wart im leide genvch

2370

also der vngemvote | sines herren hovbet sach

wider criemhilde | do der recke sprach

dv hast iz nach dinem willen | vil gar zeinem ende braht

vnd ist ovch iv ergangen | als ich mir het gedaht

2371

nv ist von bvrgonden | der edel kvenech tot

giselher der ivnge | vnde ovch her gernot

den shaz den weiz nv niemen | wan got ane min

der sol dich valendinne | immer verborgen sin

2372

si sprach so habt ir vebele | geltes mich gewert

so wil ich doch behalten | daz sifrides swert

daz truch min holder vriedel | do ich in ivngest sach

an dem mir herceleide | von iwern shvlden geschach

2373

si zoh iz von der scheiden | daz chvnd er niht erwern

do daht si den recken | des libes wol behern

si hvb im vf daz hovbt | mit dem swerte siz ab slvch

daz sach der kvenech ecel | do was im leide genvch

2374

waffen sprach der fverste | wi ist nv tot gelegen

von eines wibes handen | der allerbeste degen

der ie chom ce stvrme | oder ie schilt getrvch

swi vient ich im waere | ez ist mir leide genvch

2375

do sprach der alte hildebrant | ia genivzet si des niht

daz si in slahen torste | swaz mir davon gesrhit

swi er mich selbe braehte | in angestliche not

idoh so wil ich recken | des chvenen tronegaeres tot

2376

hildebrant mit zorne | zv creimhilde spranch

er slvch der chveneginne | einen swaeren swert swanch

ia tet ir div sorge | von hildebrande we

waz mohte si gehelffen | daz si groezlichen shre

2377

do was gelenget aller | da der veigen lip

ze stvcken was gehowen | do daz edele wip

dieterich vnd ecel | weinen do began

si chlagten innechliche | beide mage vnd man

2378

div vil michel ere | was gelegen tot

di livte heten alle | iamer vnde not

mit leide was verendet | des kvenges hohgezit

als ie div liebe leide | zaller ivngeste git

2379

ine chan iv niht bescheiden | waz sider da geschach

wan ritter vnd vrowen | weinen man da sach

darzv di edeln knehte | ir lieben frivnde tot

da hat daz maere ein ende | diz ist der nibelunge not