Sprüche

___________________________________________________

3.

Cod. Pal. germ. 848, 418v

Universitätsbibliothek Heidelberg

Diu milte mit vil tugenden treit den hoehsten pris,

diu milte tiuret bluende jugent und alter gris,

diu milte uz herzen velse wirde billet;

diu milte zieret megde namen unt reinez wip,

5

diu milte wirdet hohes werdes mannes lip,

diu milte uz eren runse manigen kwillet,

diu milte balsemt edelen man,

diu milte in eren garten wirde riutet,

diu milte leitet uf die ban,

10

da reinez herze lieplich wirt getriutet,

diu milte wirdet menschen muot

diu milte Gotes zürnen staete slihtet,

diu milte herzen liutert vluot,

diu milte sich ze warer minne pflihtet;

15

diu milte uz mannes herzen gegen den wiben suoze smieret,

diu milte ist, beide, hie unt dort,

ein wernder hort:

nu wizzet, daz diu milte himel und erde hat gezieret.