Sprüche

___________________________________________________

13.

Cod. Pal. germ. 848, 419v

Universitätsbibliothek Heidelberg

Des merke unt vröu dich, hoher, werder, wiser mensch,

du sist Tiutsch, Welsch, Windesch, Ungersch oder Tensch,

von swelher hande sprache du sist Kristen,

der wirde, der dir Got besunder hat gegeben,

5

nach tode dort ein iemer werndez ewik leben,

unt hie daz din sin wunder kan verlisten.

dir dienet gar der werlte maht,

des hohsten kraft unt al diu himel wunne,

swaz bringen mak tag unde naht,

10

die mane, sternen, zirkel brehende sunne,

viur, wazzer, luft, der erden rüge,

swaz vliuget, vliuzet, wehset oder swimmet,

der winde sus, der wölken vlüge,

daz blizzen, donren, swaz stat, oder klimmet,

15

daz dient dir allez von im dar, dar ümbe in staete prise,

ouch wand er sich dir selben git

gar ane strit

vür arger geister kündekeit so hohe z'einer spise.