BIBLIOTHECA AUGUSTANA

 

Gottfried von Straßburg

um 1210

 

Tristan

 

III. Rual di Foitenant (1791 - 2148)

 

__________________________________________________________________________________

 

 

 

Riuwe unde staetiu triuwe

nâch vriundes tôde ie niuwe,

dâ ist der vriunt ie niuwe:

daz ist diu meiste triuwe.

 

1795

Swer nâch dem vriunde riuwe hât,

nâch tôde triuwe an ime begât,

daz ist vor allem lône,

deist aller triuwe ein crône.

mit der selben crône was

1800

gecroenet dô, als ich ez las,

der marschalc und sîn saelec wîp,

die beide ein triuwe unde ein lîp

got unde der werlde wâren,

des sî guot bilde bâren

1805

beidiu der werlde unde gote,

wan sî wol nach gotes gebote

ganzlîcher triuwe wielten

und ouch die wol behielten

âne alle missewende

1810

unz an ir beider ende.

solt ieman ûf der erden

von triuwen halben werden

künic oder künigîn,

binamen daz möhten sî wol sîn,

1815

als ich iu von in beiden

waerlîche mag bescheiden,

wie er gevuor und sî gewarp.

dô Blanscheflûr, ir vrouwe, erstarp

und Riwalîn begraben was,

1820

des weisen dinc, der dô genas,

das gevuor nâch ungenaden wol

als des, der vürbaz komen sol:

der marschalc und diu marschalkîn

nâmen daz cleine weiselîn

1825

und burgen ez vil tougen

den liuten von den ougen.

si sageten unde hiezen sagen,

ir vrouwe haete ein kint getragen,

daz waere in ir und mit ir tôt.

1830

von der gedrîeten nôt

wart aber des landes clage dô mê;

ir clage wart aber dô mê dan ê:

clage, daz Riwalîn erstarp,

clage, daz Blanscheflûr verdarp,

1835

clage umbe ir beider kindelîn,

an dem ir trôst dô solte sîn,

daz daz verdorben waere.

zuo aller dirre swaere

gieng in diu starke vorhte,

1840

die Morgân an in worhte,

als nâhen alse ir hêrren tôt.

wan diz daz ist diu meiste nôt,

die man zer werlde haben mac:

swâ sô der man naht unde tac

1845

den tôtvînt vor ougen hât,

daz ist diu nôt, diu nâhen gât,

und ist ein lebelîcher tôt.

in aller dirre lebenden nôt

wart Blanscheflûr ze grabe getragen.

1850

michel jâmer unde clagen

daz wart begangen ob ir grabe.

ir muget wol wizzen, ungehabe

der was dâ vil und alze vil.

nune sol ich aber noch enwil

1855

iuwer ôren niht beswaeren

mit z'erbermeclîchen maeren,

wan ez den ôren missehaget,

swâ man von clage ze vil gesaget;

und ist vil lützel iht sô guot,

1860

ez enswache, der's ze vil getuot.

von diu sô lâzen langez clagen

und vlîzen uns, wie wir gesagen

umbe daz verweisete kint,

von dem diu maere erhaben sint.

 

1865

Sich treit der werlde sache

vil ofte z'ungemache

und aber von ungemache

wider ze guoter sache.

 

Reht in den noeten sol der vrome,

1870

ze swelhem ende ez danne kome,

bedenken, wie sîn werde rât.

die wîle und er daz leben hât,

sô sol er mit den lebenden leben,

im selben trôst ze lebene geben.

1875

als tete der marschalc Foitenant.

wan ez ime ze sorgen was gewant,

dô bedâhte er mitten in der nôt

des landes schaden, sîn selbes tôt.

wan ime diu wer niht tohte

1880

noch sich mit wer enmohte

wider den vînt gevristen,

dô vriste er sich mit listen.

er sprach die hêrren al zehant

über allez sînes hêrren lant

1885

und brâhte sî ze suone.

wan in was niht ze tuone

wan vlêhen unde sich ergeben.

sie ergâben guot unde leben

an Morgânes hulde.

1890

die hazlîchen schulde

under Morgâne und under in

die legeten sî mit listen hin

und nerten ir liut unde ir lant.

Der getriuwe marschalc Foitenant

1895

vuor heim und sprach sîn saelic wîp

und bevalch ir verre und an den lîp,

daz sî sich in leite

nâch der gewonheite,

als ein wîp kindes inne lît,

1900

und daz sî nâch der selben zît

jaehe unde jehende waere,

daz sî daz kint gebaere,

daz ir junchêrre solte sîn.

diu saelege marschalkîn,

1905

diu guote, diu staete,

diu reine Floraete,

diu wîbes êre ein spiegelglas

und rehter güete ein gimme was,

diu was des lîhte gemant,

1910

daz ir doch z'êren was gewant.

sie stalte ir muot und al ir lîp

ze clage und rehte alse ein wîp,

diu eines kindes sol genesen.

si hiez ir kamere unde ir wesen

1915

stellen unde machen

ze heinlîchen sachen.

und wande s'ouch erkande wol,

wie man hie zuo gebâren sol,

dô nam si'r willeclage hier abe.

1920

si gelîchsente grôz ungehabe

an muote unde an lîbe

gelîch einem wîbe,

diu ze solhen noeten gât,

diu al ir dinc gestellet hât

1925

ze sus getâner arbeit.

sus wart daz kint zuo z'ir geleit

vil tougenlîche unde alsô,

daz ez vil lützel ieman dô

âne eine ir ammen bevant.

1930

hie wart ein maere sâ zehant,

diu guote marschalkinne

laege eines sunes inne.

ez was ouch wâr, sie tete alsô:

si lag des sunes inne dô,

1935

der ir sunlîcher triuwe pflac

unz an ir beider endetac.

daz selbe süeze kint truoc ir

als süezelîche kindes gir,

als ein kint sîner muoter sol.

1940

und was daz billîch unde wol.

si leite ouch allen ir sin

mit muoterlîcher liebe an in

und was des alsô staete,

als ob sî'n selbe ie haete

1945

under ir brüsten getragen.

als wir daz maere hoeren sagen,

sone geschach ez weder sît noch ê,

daz ein man unde ein wîp ie mê

mit solher liebe ir hêrren zugen.

1950

als wir her nâch erkennen mugen

an disem selben maere,

wie veterlîche swaere

und wie vil manege arbeit

der getriuwe marschalc durch in leit.

 

1955

Nu daz diu guote marschalkîn

der noete genesen solte sîn

und nâch ir sehs wochen,

als den vrouwen ist besprochen,

des suns ze kirchen solte gân,

1960

von dem ich her gesaget hân,

si selbe in an ir arm nam

und truog in suoze, als ir gezam,

mit ir zem gotes hûse alsô.

und als si ir înleite dô

1965

gotelîche haete enpfangen

und was von opfer gangen

mit schoenem ingesinde,

dô was dem cleinen kinde

der heilege touf bereit,

1970

durch daz ez sîne cristenheit

in gotes namen enpfienge,

swie'z ime dar nâch ergienge,

daz ez doch cristen waere.

nu daz sîn toufaere

1975

alles sînes dinges was bereit,

nâch touflîcher gewonheit

er vrâgete umb daz kindelîn,

wie sîn name solte sîn.

diu höfsche marschalkîn gie dan

1980

und sprach vil tougenlîche ir man

und vrâgete in, wie er wolte,

daz man ez nennen solte.

der marschalc der sweic lange.

er trahte ange und ange,

1985

waz namen ime gebaere

nâch sînen dingen waere.

hier under sô betrahte er

des kindes dinc von ende her,

rehte alse er haete vernomen,

1990

wie sîn dinc allez dar was komen:

«seht» sprach er «vrouwe, als ich vernam

von sînem vater, wie'z dem kam

umbe sîne Blanschefliure,

mit wie vil maneger triure

1995

ir gernder wille an ime ergie,

wie sî diz kint mit triure enpfie,

mit welher triure sî'z gewan,

sô nenne wir in Tristan.»

nu heizet triste triure,

2000

und von der âventiure

sô wart daz kint Tristan genant,

Tristan getoufet al zehant.

von triste Tristan was sîn nam.

der name was ime gevallesam

2005

und alle wîs gebaere.

daz kiesen an dem maere.

sehen wir trûreclîch ez was,

dâ sîn sîn muoter genas.

sehen wie vruo im arbeit

2010

und nôt ze rucke wart geleit.

sehen wie trûreclîch ein leben

ime ze lebene wart gegeben.

sehen an den trûreclîchen tôt,

der alle sîne herzenôt

2015

mit einem ende beslôz

daz alles tôdes übergenôz

und aller triure ein galle was.

diz maere, der daz ie gelas,

der erkennet sich wol, daz der nam

2020

dem lebene was gehellesam.

er was reht alse er hiez ein man

und hiez reht alse er was: Tristan.

und swer nu gerne haete erkant,

durch welhe liste Foitenant

2025

daz hieze sagen ze maere,

daz Tristan daz kint waere

von der gebürteclîchen nôt

in sîner tôten muoter tôt,

den suln wir ez wizzen lân:

2030

ez wart durch triuwe getân.

der getriuwe tete ez umbe daz:

er vorhte Morgânes haz.

ob er daz kint dâ wiste,

daz er ez sô mit liste

2035

sô mit gewalt verdarpte,

daz lant an ime entarpte.

durch daz nam der getriuwe man

ze kinde sich den weisen an

und zôch ez alsô schône,

2040

daz ime diu werlt ze lône

des gotes genâden wünschen sol.

daz verdiente er an dem weisen wol.

 

Nu daz daz kint getoufet wart,

nâch cristenlîchem site bewart,

2045

diu tugende rîche marschalkîn

nam aber ir liebez kindelîn

in ir vil heinlîche pflege.

si wolte wizzen alle wege

und sehen, ob ime sîn sache

2050

stüende ze gemache.

sîn süeziu muoter leite an in

mit alsô süezem vlîze ir sin,

daz s'ime des niht engunde,

daz er ze keiner stunde

2055

unsanfte nider getraete.

Nu sî daz mit im haete

getriben unz an sîn sibende jâr,

daz er wol rede und ouch gebâr

vernemen kunde und ouch vernam,

2060

sîn vater der marschalc in dô nam

und bevalch in einem wîsen man.

mit dem sante er in iesâ dan

durch vremede sprâche in vremediu lant.

und daz er aber al zehant

2065

der buoche lêre an vienge

und den ouch mite gienge

von aller slahte lêre.

daz was sîn erstiu kêre

ûz sîner vrîheite.

2070

dô trat er in daz geleite

betwungenlîcher sorgen,

die ime dâ vor verborgen

und vor behalten wâren.

in den ûf blüenden jâren,

2075

dô al sîn wunne solte enstân,

dô er mit vröuden solte gân

in sînes lebenes begin,

dô was sîn beste leben hin.

dô er mit vröuden blüen began,

2080

dô viel der sorgen rîfe in an,

der maneger jugent schaden tuot,

und darte im sîner vröuden bluot.

in sîner êrsten vrîheit

wart al sîn vrîheit hin geleit.

2085

der buoche lêre und ir getwanc

was sîner sorgen anevanc.

und iedoch dô er ir began,

dô leite er sînen sin dar an

und sînen vlîz sô sêre,

2090

daz er der buoche mêre

gelernete in sô kurzer zît

danne ie kein kint ê oder sît.

Under disen zwein lernungen

der buoche unde der zungen

2095

sô vertete er sîner stunde vil

an iegelîchem seitspil.

dâ kêrte er spâte unde vruo

sîn emezekeit sô sêre zuo,

biz er es wunder kunde.

2100

er lernete alle stunde

hiute diz, morgen daz,

hiure wol, ze jâre baz.

über diz allez lernet er

mit dem schilte und mit dem sper

2105

behendeclîche rîten,

daz ors ze beiden sîten

bescheidenlîche rüeren,

von sprunge ez vreche vüeren,

turnieren und leisieren,

2110

mit schenkeln sambelieren

rehte und nâch ritterlîchem site.

hie bankete er sich ofte mite.

wol schirmen, starke ringen,

wol loufen, sêre springen,

2115

dar zuo schiezen den schaft,

daz tete er wol nâch sîner craft.

ouch hoere wir diz maere sagen,

ezn gelernete birsen unde jagen

nie kein man sô wol sô er,

2120

ez waere dirre oder der.

aller hande hovespil

diu tete er wol und kunde ir vil.

ouch was er an dem lîbe,

daz jungelinc von wîbe

2125

nie saeleclîcher wart geborn.

sîn dinc was allez ûz erkorn

beide an dem muote und an den siten.

nu was aber diu saelde undersniten

mit werndem schaden, als ich ez las,

2130

wan er leider arbeitsaelic was.

 

Nu sîn vierzehende jâr vür kam,

der marschalc in hin heim dô nam

und hiez in z'allen zîten

varn unde rîten,

2135

erkunnen liute unde lant,

durch daz im rehte würde erkant,

wie des landes site waere.

diz tete der lobebaere

sô lobelîchen unde alsô,

2140

daz in den zîten unde dô

in allem dem rîche

nie kint sô tugentlîche

gelebete alse Tristan.

al diu werlt diu truog in an

2145

vriundes ouge und holden muot,

als man dem billîche tuot

des muot niwan ze tugende stât,

der alle untugende unmaere hât.