Tristan

XVII. Das Geständnis (11875 - 12434)

__________________________________________________________________________________

11875

Die kiele stiezen aber an

und vuoren vrôlîche dan,

wan alse vil daz Minne

zwei herze dar inne

von ir strâze haete brâht.

11880

diu zwei diu wâren verdâht,

bekumberet beide

mit dem lieben leide,

daz solhiu wunder stellet.

daz honegende gellet,

11885

daz süezende siuret,

daz touwende viuret,

daz senftende smerzet,

daz elliu herze entherzet

und al die werlt verkêret.

11890

daz haete sî versêret,

Tristanden unde Îsôte.

si twanc ein nôt genôte

und in seltsaener ahte:

ir dewederez enmahte

11895

gehaben ruowe noch gemach,

wan sô ez daz andere sach.

sô s'aber ein ander sâhen,

daz gieng in aber nâhen,

wan sî enmohten under in zwein

11900

ir willen niht gehaben in ein.

daz geschuof diu vremede und diu scham,

diu in ir wunne benam.

so s'eteswenne tougen

mit gelîmeten ougen

11905

ein ander solten nemen war,

sô wart ir lîch gelîche var

dem herzen unde dem sinne.

Minne die verwaerinne

die endûhte es niht dâ mite genuoc,

11910

daz man s'in edelen herzen truoc

verholne unde tougen,

sine wolte under ougen

ouch offenbaeren ir gewalt.

der was an in zwein manicvalt.

11915

unlange in ein ir varwe schein.

ir varwe schein unlange in ein.

si wehselten genôte

bleich wider rôte;

si wurden rôt unde bleich,

11920

als ez diu Minne in understreich.

hie mite erkande ietwederez wol,

als man an solhen dingen sol,

daz eteswaz von minnen

in ietwederes sinnen

11925

zem anderen was gewant,

unde begunden ouch zehant

lieplîche in ein gebâren,

zît unde state vâren

ir rûne unde ir maere.

11930

der minnen wildenaere

leiten ein ander dicke

ir netze unde ir stricke,

ir warte unde ir lâge

mit antwürte und mit vrâge.

11935

si triben vil maere under in.

Îsôte rede und ir begin

daz was vil rehte in megede wîs.

si kam ir trût und ir amîs

alumbe her von verren an.

11940

von ende mante s'in her dan,

wie er ze Develîne

in einem schiffelîne

gevlozzen wunt und eine kam,

wie in ir muoter an sich nam

11945

und wie s'in ouch generte.

von allem dem geverte,

wie si selbe in sîner pflege

schrîben lernete alle wege,

latîne unde seitspil.

11950

der umberede der was vil,

die s'ime vür ougen leite

von sîner manheite

und ouch von dem serpande.

und wie s'in zwirnt erkande

11955

in dem mose und in dem bade.

diu rede was under in gerade,

si seite ime und er seite ir.

«â» sprach Îsôt «dô ez sich mir

ze alsô guoten staten getruoc,

11960

daz ich iuch in dem bade niht sluoc,

got hêrre, wie gewarb ich sô!

daz ich nu weiz, wiste ich ez dô,

binamen sô waere ez iuwer tôt.»

«war umbe» sprach er «schoene Îsôt?

11965

waz wirret iu? waz wizzet ir?»

«swaz ich weiz, daz wirret mir.

swaz ich sihe, daz tuot mir wê.

mich müejet himel unde sê.

lîp unde leben daz swaeret mich.»

11970

si stiurte unde leinde sich

mit ir ellebogen an in.

daz was der belde ein begin.

ir spiegelliehten ougen

diu volleten tougen.

11975

ir begunde ir herze quellen,

ir süezer munt ûf swellen,

ir houbet daz wac allez nider.

ir vriunt begunde ouch sî dar wider

mit armen umbevâhen,

11980

ze verre noch ze nâhen,

niwan in gastes wîse.

er sprach suoze unde lîse:

«ei schoene süeze, saget mir:

waz wirret iu, waz claget ir?»

11985

Der Minnen vederspil Îsôt,

«lameir» sprach sî «daz ist mîn nôt,

lameir daz swaeret mir den muot,

lameir ist, daz mir leide tuot.»

dô sî lameir sô dicke sprach,

11990

er bedâhte unde besach

anclîchen unde cleine

des selben wortes meine.

sus begunde er sich versinnen,

l'ameir daz waere minnen,

11995

l'ameir bitter, la meir mer.

der meine der dûhte in ein her.

er übersach der drîer ein

unde vrâgete von den zwein.

er versweic die minne,

12000

ir beider vogetinne,

ir beider trôst, ir beider ger.

mer unde sûr beredete er.

«ich waene» sprach er «schoene Îsôt,

mer unde sûr sint iuwer nôt.

12005

iu smecket mer unde wint.

ich waene, iu diu zwei bitter sint?»

«nein hêrre, nein! waz saget ir?

der dewederez wirret mir,

mirn smecket weder luft noch sê.

12010

lameir al eine tuot mir wê.»

dô er des wortes z'ende kam,

minne dar inne vernam,

er sprach vil tougenlîche z'ir:

«entriuwen, schoene, als ist ouch mir,

12015

lameir und ir, ir sît mîn nôt.

herzevrouwe, liebe Îsôt,

ir eine und iuwer minne

ir habet mir mîne sinne

gâr verkêret unde benomen,

12020

ich bin ûzer wege komen

sô starke und alsô sêre:

in erhol mich niemer mêre.

mich müejet und mich swaeret,

mir swachet unde unmaeret

12025

allez, daz mîn ouge siht.

in al der werlde enist mir niht

in mînem herzen liep wan ir.»

Îsôt sprach: «hêrre, als sît ir mir.»

Dô die gelieben under in

12030

beide erkanden einen sin,

ein herze und einen willen,

ez begunde in beidiu stillen

und offenen ir ungemach.

ietwederez sach unde sprach

12035

daz ander beltlîcher an:

der man die maget, diu maget den man.

vremede under in diu was dô hin.

er kuste sî und sî kust in

lieplîchen unde suoze.

12040

daz was der minnen buoze

ein saeleclîcher anevanc.

ietwederez schancte unde tranc

die süeze, diu von herzen gie.

sô sî die state gewunnen ie,

12045

sô gie der wehsel under in

slîchende her unde hin

vil tougenlîchen unde alsô,

daz nieman in der werlde dô

ir willen unde ir muot bevant

12050

wan sî, der er doch was bekant:

Brangaene diu wîse.

diu blickete dicke lîse

und vil tougenlîche dar

und nam ir tougenheite war

12055

und dâhte dicke wider sich:

«ouwê, nû verstân ich mich,

diu minne hebet mit disen an.»

vil schiere wart, daz sî began

den ernest an in beiden sehen

12060

und ûzen an ir lîbe spehen

den inneren smerzen

ir muotes unde ir herzen.

si muote ir beider ungemach,

wan sî si z'allen zîten sach

12065

ameiren unde amûren,

siuften unde trûren,

trahten und pansieren,

ir varwe wandelieren.

sin genâmen nie vor trahte war

12070

dekeiner slahte lîpnar,

biz sî der mangel und daz leit

an dem lîbe als überstreit,

daz es Brangaenen angest nam

und in die vorhte dâ von kam,

12075

ez waere ir beider ende,

und dâhte: «nû genende,

ervar, waz dirre maere sî!»

Si gesaz in eines tages bî

heinlîchen unde lîse.

12080

diu stolze, diu wîse

«hie ist nieman» sprach si «wan wir driu.

saget mir ir zwei, waz wirret iu?

ich sihe iuch z'allen stunden

mit trahte gebunden,

12085

siuften, trûren unde clagen.»

«höfschiu, getörste ich'z iu gesagen,

ich sagete ez iu» sprach Tristan.

«jâ hêrre, vil wol: sprechet an;

swaz ir welt, daz saget mir!»

12090

«saeligiu guotiu» sprach er z'ir

«in getar niht sprechen vürbaz,

irn gewisset uns ê daz

mit triuwen und mit eiden,

daz ir uns armen beiden

12095

guot unde genaedic wellet wesen.

anders sô sîn wir ungenesen.»

Brangaene bôt ir triuwe hin.

si gelobete unde gewissete in

mit ir triuwen und mit gote

12100

ze lebene nâch ir gebote.

«getriuwiu guotiu» sprach Tristan

«nu sehet got ze vorderst an

und dar nâch iuwer saelekeit.

bedenket unser zweier leit

12105

und unser angestlîche nôt.

ich armer und diu arme Îsôt,

ine weiz wie'z uns ergangen ist,

wir zwei wir sîn in kurzer vrist

unsinnic worden beide

12110

mit wunderlîchem leide.

wir sterben von minnen

und enkunnen niht gewinnen

weder zît noch state dar zuo,

ir irret uns spâte unde vruo.

12115

und sicherlîche: sterben wir,

dâst nieman schuldic an wan ir.

unser tôt und unser leben

diu sint in iuwer hant gegeben.

hie mite ist iu genuoc gesaget.

12120

Brangaene, saeligiu maget,

nu helfet unde genâdet ir

iuwerre vrouwen unde mir!»

Brangaene wider Îsôte sprach:

«vrouwe, ist iuwer ungemach,

12125

als er dâ giht, von solher nôt?»

«jâ herzeniftel!» sprach Îsôt.

Brangaene sprach: «daz riuwe got,

daz der vâlant sînen spot

mit uns alsus gemachet hât!

12130

nu sihe ich wol, es ist niht rât,

ine müeze durch iuch beide

mir selber nâch leide

und iu nâch laster werben.

ê ich iuch lâze sterben,

12135

ich wil iu guote state ê lân,

swes ir wellet ane gân.

durch mich enlât niemêre,

swes ir durch iuwer êre

niht gerne wellet lâzen.

12140

swâ ir iuch aber gemâzen

und enthaben muget an dirre tât,

dâ enthabet iuch, daz ist mîn rât.

lât diz laster under uns drîn

verswigen unde beliben sîn.

12145

breitet ir'z iht mêre,

ez gât an iuwer êre.

ervert ez ieman âne uns driu,

ir sît verlorn und ich mit iu.

herzevrouwe, schoene Îsôt,

12150

iuwer leben und iuwer tôt

diu sîn in iuwer pflege ergeben.

leitet tôt unde leben,

als iu ze muote gestê.

nâch dirre zît enhabet niemê

12155

dekeine vorhte her ze mir.

swaz iu gevalle, daz tuot ir.»

Des nahtes, dô diu schoene lac,

ir triure unde ir trahte pflac

nâch ir trûtamîse,

12160

nu kam geslichen lîse

zuo der kemenâten în

ir amîs unde ir arzatîn,

Tristan und diu Minne.

Minne diu arzatinne

12165

si vuorte ze handen

ir siechen Tristanden.

ouch vant s'Îsôte ir siechen dâ.

die siechen beide nam si sâ

und gab in ir, im sîe

12170

ein ander z'arzatîe.

wer haete ouch dise beide

von dem gemeinem leide

vereinet unde bescheiden

wan einunge an in beiden,

12175

der stric ir beider sinne?

Minne diu strickaerinne

diu stricte zwei herze an in zwein

mit dem stricke ir süeze in ein

mit alsô grôzer meisterschaft,

12180

mit alsô wunderlîcher craft,

daz si unreloeset wâren

in allen ir jâren.

Ein langiu rede von minnen

diu swaeret höfschen sinnen.

12185

kurz rede von guoten minnen

diu guotet guoten sinnen.

Swie lützel ich in mînen tagen

des lieben leides habe getragen,

des senften herzesmerzen,

12190

der innerhalp des herzen

sô rehte sanfte unsanfte tuot,

mir wîsaget doch mîn muot,

des ich im wol gelouben sol,

den zwein gelieben waere wol

12195

und sanfte in ir muote,

dô sî die leiden huote,

die wâren suht der minne,

der Minnen vîendinne

von ir stîgen haeten brâht.

12200

ich hân von in zwein vil gedâht

und gedenke hiute und alle tage.

swenne ich liebe und senede clage

vür mîniu ougen breite

und ir gelegenheite

12205

in mînem herzen ahte,

sô wahsent mîne trahte

und muot, mîn hergeselle,

als er in diu wolken welle.

swenne ich bedenke sunder

12210

daz wunder und daz wunder,

daz man an liebe vünde,

der ez gesuochen künde;

waz vröude an liebe laege,

der ir mit triuwen pflaege:

12215

sô wirt mîn herze sâ zestunt

groezer danne Setmunt

und erbarmet mich diu minne

von allem mînem sinne,

daz meistic alle, die der lebent,

12220

an minnen hangent unde clebent

und ir doch nieman rehte tuot.

wir wellen alle haben muot

und mit minnen umbe gân.

nein, minne ist niht alsô getân,

12225

als wir s'ein ander machen

mit velschlîchen sachen.

wir nemen der dinge unrehte war.

wir saejen bilsensâmen dar

und wellen danne, daz uns der

12230

liljen unde rôsen ber.

entriuwen des mac niht gewesen.

wir müezen daz her wider lesen,

daz dâ vor gewerket wirt,

und nemen, daz uns der sâme birt.

12235

wir müezen snîden unde maen

daz selbe, daz wir dar gesaen.

wir bûwen die minne

mit gegelletem sinne,

mit valsche und mit âkust

12240

und suochen danne an ir die lust

des lîbes unde des herzen.

sone birt si niuwan smerzen,

unguot und unvruht unde unart,

als ez an ir gebûwen wart.

12245

als ez uns danne riuwe birt

und innerthalp des herzen swirt

und toetet uns dar inne,

sô zîhen wir's die minne

und schuldegen sî dar an,

12250

diu schulde nie dar an gewan.

wir saejen alle valscheit,

sô snîden laster unde leit.

tuo uns daz leit iht sêre wê,

sô bedenken ez ê:

12255

saejen bezzer unde baz

unde snîden ouch daz.

wir, die zer werlde haben muot,

swie sô er sî boese oder guot,

wie tuon wir unseren tagen,

12260

die wir vertrîben und verjagen

in dem namen der minne

und vinden niht dar inne

niwan die selben arbeit,

die wir haben an sî geleit:

12265

misselinge und ungeschiht!

des guoten vinde wir dâ niht,

des unser iegelîcher gert

und des wir alle sîn entwert:

daz ist der staete vriundes muot,

12270

der staeteclîche sanfte tuot,

der die rôsen bî dem dorne treit,

die senfte bî der arbeit;

an dem ie lît verborgen

diu wunne bî den sorgen;

12275

der an dem ende ie vröude birt,

als ofte als er beswaeret wirt.

den vindet lützel ieman nuo;

alsô vorwerke wir dar zuo.

Ez ist vil wâr, daz man dâ saget:

12280

«Minne ist getriben unde gejaget

in den endelesten ort.»

wirn haben an ir niwan daz wort.

uns ist niwan der name beliben

und han ouch den alsô zetriben,

12285

alsô verwortet und vernamet,

daz sich diu müede ir namen schamet

und ir daz wort unmaeret.

si swachet unde swaeret

ir selber ûf der erde.

12290

diu êrelôse unwerde,

si slîchet under hûsen biten

und treit von lasterlîchen siten

gemanicvaltet einen sac,

in dem s'ir diube und ir bejac

12295

ir selbes munde verseit

und ez ze strâze veile treit.

ôwê! den market schaffen wir.

daz wunder trîbe wir mit ir

und wellen des unschuldic sîn.

12300

Minne, aller herzen künigîn,

diu vrîe, diu eine

diu ist umbe kouf gemeine!

wie habe wir unser hêrschaft

an ir gemachet zinshaft!

12305

wir haben ein boese conterfeit

in daz vingerlîn geleit

und triegen uns dâ selbe mite.

ez ist ein armer trügesite,

der vriunden alsô liuget,

12310

daz er sich selben triuget.

wir valschen minnaere,

der Minnen trügenaere,

wie vergânt uns unser tage,

daz wir unserre clage

12315

sô selten liebez ende geben!

wie vertuon wir unser leben

âne liep und âne guot!

nu gît uns doch daz guoten muot,

daz uns ze nihte bestât.

12320

swaz ieman schoener maere hât

von vriuntlîchen dingen,

swaz wir mit rede vür bringen

von den, die wîlent wâren

vor manegen hundert jâren,

12325

daz tuot uns in dem herzen wol

und sîn der selben state sô vol,

daz lützel ieman waere

getriuwe unde gewaere

und wider den vriunt âne âkust,

12330

ern möhte sus getâne lust

von sîn selbes sachen

in sînem herzen machen.

wan uns daz selbe z'aller zît

mit jâmer under vüezen lît,

12335

dâ von ez allez ûf erstât:

deist triuwe, diu von herzen gât.

diu treit sich uns vergebene an.

sô kêre wir daz ouge dan

und trîben die süezen

12340

unruochlîch under vüezen.

wir haben si mit unwerde

vertreten in der erde.

ob wir si gerne suohten dâ,

wirn wizzen alles gâhes wâ.

12345

sô guot, sô lônbaere

triuwe under vriunden waere,

war umbe lieben wir si niht?

ein blic, ein inneclîch gesiht

ûz herzeliebes ougen,

12350

der leschet âne lougen

hundert tûsent smerzen

des lîbes unde des herzen.

ein kus in liebes munde,

der von des herzen grunde

12355

her ûf geslichen kaeme,

ôhî waz der benaeme

seneder sorge und herzenôt!

Ich weiz wol, Tristan unde Îsot,

die gebitelôsen beide

12360

benâmen ouch ir leide

unde ir triure ein ander vil,

dô sî begriffen daz zil

gemeines willen under in.

jener gelange was dô hin,

12365

der die gedanken anget.

swes gelieben gelanget,

des triben s'under in genuoc,

sô sich diu zît alsô getruoc.

sô sî z'ir state kâmen,

12370

si gâben unde nâmen

mit getriuwelîchem sinne

in selben unde der minne

willegen zins unde zol.

in was vil inneclîche wol

12375

an der reise und an der vart.

dô diu vremede hine wart,

dô was ir heinlîche

rîlîch unde rîche.

und was daz wîsheit unde sin.

12380

wan die sich helent under in,

sît daz si sich enbârent

und danne ir schame vârent

und gestent sich an liebe,

die sint ir selber diebe.

12385

sô sî sich danne ie mêre helent,

sô s'ie mêre in selben stelent

und mischent liep mit leide.

dise gelieben beide

die enhâlen sich ze nihte.

12390

mit rede und mit gesihte

wâren si heinlîch under in.

Sus triben sî die reise hin

mit wunneclîchem lebene

und doch niht gâr vergebene:

12395

in tete diu vorvorhte wê.

sî bevorhten daz ê

dâ ez ouch sider zuo kam,

daz in sît vröude vil benam

und brâhte sî ze maneger nôt:

12400

daz was daz, daz diu schoene Îsôt

dem manne werden solte,

dem sî niht werden wolte.

ouch twanc si beidiu noch ein leit:

daz was Îsôte wîpheit.

12405

hier umbe was in leide.

diz leidete si beide.

doch was in disiu swaere

lîht unde tragebaere,

wan sî ir willen under in zwein

12410

vrîlîche haeten in ein

dicke und ze manegem mâle.

nu daz si Curnewâle

gevuoren alsô nâhen,

daz sî daz lant wol sâhen,

12415

des vröuten sî sich alle dô.

si wâren sîn alle vrô

wan eine Tristan unde Îsôt.

der angest was ez unde ir nôt.

der wille waere der geschehen,

12420

sine haeten niemer lant gesehen.

diu vorhte ir beider êren

diu begunde ir herze sêren.

sine kunden sich berâten nie,

waz sî getaeten oder wie,

12425

daz Îsôte wîpheit

dem künege würde verseit.

und doch swie unrâtbaere

kindesche minnaere

in ir kintheite sint,

12430

der rât geviel doch an daz kint.

Sô minne an tumben kinden

ir spil gerâtet vinden,

sô muge wir an den kinden

witze unde liste vinden.