Tristan

XXI. List wider List (13673 - 14234)

__________________________________________________________________________________

Jedoch versuohte ez Marke

anclîchen unde starke

13675

und wartete es naht unde tac.

eines nahtes, dô er bî ir lac

und sî zwei triben under in

ir wehselrede her unde hin,

er rihtete unde leite

13680

mit einer kündekeite

einen stric der küniginne

und vienc si ouch dar inne.

«nu vrouwe» sprach er «saget mir,

wie dunket iuch, wie râtet ir?

13685

ich wil in kurzen zîten

in beteverte rîten

und bin vil lîhte lange in wege.

in wes huote und in wes pflege

welt ir al die wîle sîn?»

13690

«got segene!» sprach diu künigîn

«durch nôt sprechet ir daz!

in wes huote waere ich baz

und iuwer liut und iuwer lant

danne in iuwers neven hant,

13695

der unser wol gepflegen kan?

iuwer swestersun, hêr Tristan,

der ist manhaft unde wîs

und wol bedaehtic alle wîs.»

Die rede begunde Marke

13700

bewaenen harte starke

und misseviel im harte.

sîne lâge und sîne warte

leite er ir aber mê unde mê

und huote ir aber mê dan ê

13705

und seite dem truhsaezen sâ,

als er ez haete ervunden dâ.

der truhsaeze antwurte im dô

«zewâre hêrre, im ist alsô.

ir muget hie selbe merken an,

13710

daz sî sich niht gehelen kan

der grôzen liebe, die s'im treit,

und ist ein michel tumpheit,

daz ir in lîdet dâ bî.

als liep iu wîp und êre sî,

13715

so enlîdet in nimêre.»

diz muote Marken sêre.

der zwîvel unde der arcwân,

den er zem neven solte hân,

der tôte in z'allen stunden,

13720

und in ouch unervunden

und unervaren haete

an aller slahte untaete.

Diu betrogen Îsôt diu was dô vrô.

si seite Brangaenen dô

13725

vil vrôlîche lachende

und michel vröude machende

von ir hêrren betevart,

und ouch wie sî gevrâget wart,

in wes pflege si wolte sîn.

13730

Brangaene sprach dô: «vrouwe mîn,

lieget mir niht und saget mir,

sô helfe iu got, wen ieschet ir?»

Îsôt seite ir die wârheit,

rehte alse ez dâ wart ûf geleit.

13735

«â tumbe!» sprach Brangaene dô

«war umbe sprâchet ir alsô?

swaz sô hier an geredet ist,

daz hoere ich wol, daz ist ein list,

und weiz vür wâr, daz disen rât

13740

der truhsaeze ûf geleget hât.

hie mite sô wellent s'iuch ervarn.

ir sult iuch her nâch baz bewarn.

gewehene er's iu iht mêre,

sô tuot, als ich iuch lêre.

13745

sprechet sus unde sô.»

ir vrouwen lêrte si dô,

waz antwürte ir gebaere

ze disen listen waere.

Hier under was ie Marke

13750

bekumbert harte starke

mit zweier hande leide:

in leideten beide

der zwîvel unde der arcwân,

den er haete und muose hân.

13755

er arcwânde genôte

sîn herzeliep Îsôte.

er zwîvelte an Tristande,

an dem er niht erkande,

daz valsche gebaere

13760

und wider den triuwen waere.

sîn vriunt Tristan, sîn vröude Îsôt

diu zwei wâren sîn meistiu nôt.

si twungen ime herze unde sin.

er arcwânde sî und in

13765

und zwîvelte sî ouch beide.

dem gebeidetem leide

dem gieng er rehte nâch dem site

und nâch dem billîche mite.

wan alse er an Îsolde

13770

der liebe dienen wolde,

sô wante es in der arcwân.

dem wolte er danne ie nâch gân

und volgen ûf die wârheit.

als ime diu danne wart verseit,

13775

sô tete im aber der zwîvel wê,

sô was ez aber rehte als ê.

Waz mag ouch liebe nâher gân

dan zwîvel und arcwân?

waz anget liebe gernden muot

13780

sô sêre, sô der zwîvel tuot?

dâ mite enweiz er, war er sol;

wan iezuo sô geswüere er wol

von eteslîcher ungeschiht,

die er gehoeret oder gesiht,

13785

er waere ûf dem ende.

ê man die hant gewende,

sô widerwirfet sich daz

und gesiht aber eteswaz,

daz im aber zwîvel birt,

13790

dâ von er aber verirret wirt.

wan daz ez al diu werlt tuot,

sô ist ez ein harte unwîser muot

und ist ein michel tumpheit,

daz man an liebe zwîvel treit.

13795

wan nieman ist mit liebe wol,

an dem er zwîvel haben sol.

so ist aber noch sêrre missetân,

swer sô den zwîvel unde den wân

ûf die gewisheit bringet.

13800

wan swanne er daz erringet,

daz er den zwîvel wâren weiz,

swes er sich ie dâ vor gevleiz

ze pirsene ûf die wârheit,

daz ist im danne ein herzeleit

13805

vor allem herzeleide.

diu vorderen beide,

diu im ê beswaereten den muot,

diu diuhten in danne guot.

möhte er si danne wider hân,

13810

sô naeme er zwîvel unde wân,

daz er der wâren künde

niemer niht bevünde.

sus kumet, daz übel übele vrumet,

biz daz daz ergere kumet.

13815

sô daz danne wirs tuot,

sô diuhte danne übel guot.

swie swaere an liebe zwîvel sî,

ern ist nie sô swaere bî,

man lîde in vil und verre baz

13820

dan den bewaereten haz.

ouch mag daz nieman verbern,

diu liebe müeze zwîvel bern.

zwîvel sol an liebe wesen.

mit dem muoz liebe genesen.

13825

die wîle sî den zwîvel hât,

die wîle mag ir werden rât.

sô sî die wârheit ersiht,

zehant enist ir dinges niht.

ouch hât diu liebe einen site,

13830

dâ sî sich allermeiste mite

verwirret und verworren hât:

swâ ir dinc nâch ir willen stât,

dane wil si keiner staete warn,

dâ lât si harte lîhte varn.

13835

und swâ sô sî den zwîvel siht,

dâ von enscheidet sî sich niht,

dar ist ir nôt unde gâch.

dem gât si lâgende nâch

und strebet noch mêre durch daz dar,

13840

daz sî herzeleit ervar

dan durch die lust, die sî dar an

ervinden unde gehaben kan.

dem selben sinnelôsen site

dem gieng ouch Marke vaste mite.

13845

er wante spâte unde vruo

allen sînen sin dar zuo,

daz er den zwîvel unde den wân

gerne haete hin getân

und daz er mit der wârheit

13850

ûf sîn herzeclîchez leit

vil gerne komen waere.

des was er gevaere.

Aber kam ez eines nahtes sô,

als er ez unde Marjodô

13855

ensamet haeten ûf geleit,

daz er aber sîne kündekeit

Îsolde vür leite

und sî mit kündekeite

gerne haete ervaren baz.

13860

dô verkêrte sich daz.

den stric, den er ir rihtete

und ûf ir schaden tihtete,

dâ vie diu küniginne

den künec ir hêrren inne

13865

mit ir Brangaenen lêre.

dâ half Brangaene sêre.

dâ vrumete in beiden samet, daz list

wider list gesetzet ist.

der künec der twanc die künigîn

13870

vil nâhen an daz herze sîn

und kuste sî ze maneger stunt

in ir ouge und in ir munt.

«schoene» sprach er «nû enist mir

niht herzeclîche liep wan ir.

13875

und ich von iu nu scheiden sol,

daz wizze got von himele wol,

daz nimet mir mîne sinne.»

diu gelêrte küniginne

si stiez sin wider sin.

13880

siuftende sprach si wider in:

«ôwê mir, inneclîche ôwê!

ôwê! nu wânde ich allez ê,

daz diz vertâne maere

durch schimpf gesprochen waere.

13885

nu hoere ich unde weiz ez wol,

daz ez ein ernest wesen sol.»

si huob an unde begunde

mit ougen und mit munde

leitlîche clage erscheinen,

13890

sô clegelîche weinen,

daz sî dem einvalten man

sînen zwîvel allen an gewan

und wol gesworen haete,

daz sî'z von herzen taete.

13895

wan an den vrouwen allen

enist nimêre gallen,

also man ûz ir munde giht,

noch enhabent dekeiner trüge niht

noch aller valsche keinen,

13900

wan daz si kunnen weinen

âne meine und âne muot,

als ofte sô si dunket guot.

Îsôt diu weinde starke.

der geloubege Marke

13905

«schoene» sprach er «saget mir,

waz wirret iu, waz weinet ir?»

«ich mag wol weinen» sprach Îsôt

«clage ich, daz tuot mir michel nôt.

ich bin ein ellende wîp

13910

und hân nimê wan einen lîp

und sô vil sinne, sô ich hân.

diu zwei hân ich sô gâr verlân

an iuch und iuwer minne,

daz ich in mînem sinne

13915

niht dinges kan gemeinen

noch geminnen wan iuch einen.

mirn ist niht rehte liep wan ir

und weiz daz wârez, daz ir mir

sô holdez herze niht entraget,

13920

als ir gebâret unde saget.

daz ir den muot gewunnet ie,

daz ir hin vüeret und mich hie

in dirre vremede soltet lân,

dâ bî mac ich mich wol enstân,

13925

daz ich iu vil unmaere bin.

des sol mîn herze und mîn sin

vil selten iemer werden vrô.»

«war umbe, schoene?» sprach er dô

«ir habet doch z'iuwerre hant

13930

beidiu liute unde lant,

diu sint iuwer unde mîn.

dar über sît gebietaerîn.

daz sol z'iuwerm gebote stân.

swaz ir gebietet, deist getân.

13935

die wîle ouch ich bin under wegen,

die wîle sô müeze iuwer pflegen,

der iuwer wol gepflegen kan:

mîn neve der höfsche Tristan.

der ist bedaehtic unde wîs,

13940

der vlîzet sich in alle wîs,

wie er iu vröude und êre

gemach unde gemêre.

dem getrûwe ich alse wol,

als ich von grôzem rehte sol.

13945

dem sît ir liep, alsô bin ich.

der tuot ez durch iuch und durch mich.»

«Hêr Tristan?» sprach diu schoene Îsôt

«zewâre ich waere gerner tôt

und ê wolt ich begraben sîn,

13950

ê danne ich mit dem willen mîn

in sîner pflege waere.

der selbe lôsaere,

der ist mir z'allen zîten

gelîchsende an der sîten

13955

und allez smeichende bî

und giht, wie liep ich im sî.

iedoch weiz got wol sînen muot,

in welhen triuwen er ez tuot.

ouch weiz ich's selbe genuoc.

13960

wan er mir mînen oeheim sluoc

und an mir vürhtet den haz,

durch die vorhte und umbe daz

ist er mich allez streichende,

listende unde smeichende

13965

in einem velschlîchem site

und waenet allez dâ mite

erwerben mîne vriuntschaft.

nu hât ez aber arme craft,

sîn smeichen hilfet cleine.

13970

und weizgot wan ir eine,

daz ich durch iuch noch mêre

dan durch mîn selbes êre

vriuntlîche dar gebâre,

sone gesaehe ich in zewâre

13975

mit vriundes ougen niemer an.

und sît ich niht verberen kan,

ine müeze in hoeren unde sehen,

sô sol ez aber alsô geschehen,

daz mînes herzen dâ bî

13980

und mîner triuwen lützel sî.

ich hân, daz ist unlougen,

mit herzelôsen ougen,

mit lügelîchem munde

dicke und ze maneger stunde

13985

an in gewendet mînen vlîz

niuwan durch den itewîz.

man sprichet von den vrouwen daz,

si tragen ir manne vriunden haz.

durch daz hân ich im dicke

13990

mit manegem lüggem blicke,

mit herzelôsem munde

betrogen sîne stunde,

daz er wol gesworen haete,

daz ich'z von herzen taete.

13995

Hêrre, enlât iuch niht dar an.

iuwer neve, mîn hêr Tristan

dern gepfliget mîn niemer tac.

ob ich's iuch erbiten mac,

ir müezet mîn zwâre under wegen,

14000

ob ir gebietet, selbe pflegen.

swar ir wellet, dar wil ich,

ir eine enwendet es mich

und es enirre mich der tôt.»

sus lôsete diu lôse Îsôt

14005

wider ir hêrren unde ir man,

biz daz si'm lôsend an gewan

beidiu zwîvel unde zorn

und er wol haete gesworn,

daz ir ernest waere.

14010

Marke der zwîvelaere

der was dâ wider ze wege komen.

sîn gesellîn diu haete ime benomen

beidiu zwîvel unde wân.

ez was allez wol getân,

14015

daz sî gesprach unde getete.

der künec der seite sâ ze stete

dem truhsaezen von grunde,

so er ebeneste kunde,

ir antwürte unde ir maere,

14020

und an ir dingen waere

dekeiner slahte valscheit.

diz was dem truhsaezen leit

und tete im in dem herzen wê.

iedoch lêrte er in aber dô mê

14025

und seite im, wie er Îsolde

aber versuochen solde.

Des nahtes, dô Marke aber lac,

sîner bettemaere mit ir pflac,

er leite ir aber mit vrâge

14030

sîne stricke und sîne lâge

unde betrouc si aber dar în.

«seht» sprach er «vrouwe künigîn,

ich waene, es muoz uns nôt geschehen.

nu lât mich kiesen unde sehen,

14035

wie vrouwen kunnen lant bewarn.

vrouwe, ich muoz von dem lande varn,

und ir hie derbî bestân

bî mînen vriunden, die ich hân.

ez sî der mâc, ez sî der man,

14040

der mir dekeines guotes gan,

der muoz iu guot und êre bern,

als ir an in es wellet gern.

und swer iu niht vil senfte bî

und liep in iuwern ougen sî

14045

under vrouwen unde mannen,

die scheidet alle dannen.

irn sult wider iuwerm muote

an liuten noch an guote

niht weder hoeren noch gesehen,

14050

dar an iu leide müge geschehen.

ine wil ouch niht des minnen

von herzen noch von sinnen,

dem ir unholdez herze traget.

daz sî iu vür wâr gesaget.

14055

weset ir vrô unde vruot

und lebet, swie iuch dunke guot.

dâ habet ir mînen willen an.

und sît mîn neve Tristan

unsenfte in iuwerm herzen ist,

14060

sô scheide ich in in kurzer vrist

von hove und von gesinde,

swie ich die vuoge vinde.

er sol ze Parmenîe varn

und sol sîn selbes dinc bewarn.

14065

des ist im unde dem lande nôt.»

«Genâde hêrre» sprach Îsôt

«ir redet getriulîche unde wol.

sît ich an iu nu wizzen sol,

daz ir daz gerne unmaeret,

14070

daz mînem herzen swaeret,

sô dunket ouch mich reht dâ bî,

swaz iuwern ougen senfte sî

und iuwerm muote lîche,

daz ich dar an entwîche,

14075

sô ich verreste müge.

und swaz iu z'iuwern êren tüge,

daz ich dâ spâte unde vruo

rât unde helfe biete zuo.

und seht ir, hêrre, waz ir tuot.

14080

ez enwirt mîn rât noch mîn muot

weder hiute noch niemer,

daz ir iuwern neven iemer

von iuwerm hove gekêret,

wan sô waere ich g'unêret.

14085

dâ mite sô seite man zehant

über hof und über lant,

ich haete iu gerâten daz

durch die schulde und durch den haz,

daz er mînen oeheim sluoc.

14090

dâ würde rede von genuoc,

diu mir lasterbaere

und iu kein êre waere.

ine gevolge es niemer,

daz ir durch mich iemer

14095

iuwer vriunt gunmaeret

oder ieman beswaeret

und hazzet durch den willen mîn,

dem ir genaedic sület sîn.

Ouch sult ir iuch versinnen:

14100

und kêret ir von hinnen,

wer beschirmet iuwer zwei lant?

diu enstânt in eines wîbes hant

noch wol noch vridelîche.

swer zweier künicrîche

14105

reht und nâch êren pflegen sol,

der bedarf sinne und herzen wol.

so enist in disen zwein landen

âne mînen hêrn Tristanden

kein hêrre, lâzet ir'n dâ bî,

14110

daz er den landen vrume sî.

âne in sô kumet dâ nieman zuo,

durch den man lâze oder tuo.

ist daz urliuges nôt geschiht,

des man sich alle tage versiht

14115

und z'allen zîten muoz versehen,

sô mag ez lîhte alsô geschehen,

daz uns dâ misselinget an.

sô wirt mir mîn hêr Tristan

mit itewîze und mit archeit

14120

dicke under ougen geleit.

sô wirt des maeres vil gelesen:

«waere Tristan hie gewesen,

uns enwaere niht ze dirre vrist

sô misselungen, alse ez ist.»

14125

und werdent mir dan alle

mit gemeinem schalle

gebende die schulde,

ich habe im iuwer hulde

iu und in ze schaden verlorn.

14130

hêrre, ez ist bezzer verborn.

versinnet iuch der dinge baz.

bedenket diz unde daz.

eintweder lât mich mit iu varn

oder heizet in diu lant bewarn.

14135

swie sô mîn herze hin z'im sî,

erst mir doch lieber dâ bî,

danne ob uns ein ander man

sûme unde velle dar an.

Der künec enstuont sich al zehant,

14140

daz al ir herze was gewant

ze Tristandes êren,

und begunde ouch iesâ kêren

an zwîvel unde an wân als ê.

hie von sô was er aber dô mê

14145

versunken und vervallen

wider in die zorngallen.

Îsôt tet ouch Brangaenen kunt

ir beider rede unz ûf den grunt

und seite ir wider diz unde daz,

14150

daz sî nie wortes vergaz.

diz was Brangaenen sêre leit,

daz s'alsô haete geseit

und daz diu rede ergangen was.

einen niuwen brief s'ir aber dô las,

14155

waz aber ir rede solte sîn.

Des nahtes, dô diu künigîn

z'ir hêrren aber slafen kam,

under ir arme sî in nam.

si halseten, si kusten,

14160

z'ir senften linden brusten

twanc sî'n vil harte nâhen

und begunde aber dô vâhen

wider an ir wortlâge

mit antwürte und mit vrâge.

14165

«hêrre» sprach si «saget mir

durch mînen willen: habet ir

von rehtem ernest ûf geleit

iuwer dinc, als ir mir habet geseit

von mînem hêrn Tristande,

14170

daz ir in wider ze lande

welt senden durch den willen mîn?

möhte ich der rede gewis sîn,

ich wolte es iu genâde sagen

hiute unde in allen mînen tagen.

14175

hêrre, ich getrûwe iu harte wol,

als ich wol mac und alse ich sol.

doch ist mîn vorhte hie bî,

daz ez gâr ein versuochen sî.

und wiste ich es gewisheit,

14180

als ir mir habet vür geleit,

daz ir mir woltet vremeden daz,

dem ich waere gehaz,

sô erkande ich an dem maere,

daz ich iu liep waere.

14185

ich haete lange mîne bete,

wan daz ich ez ungerne tete,

hier umbe gerne an iuch gewant.

wan mir ist harte wol bekant,

waz mir von ime mac ûf erstân,

14190

sol ich sîn lange künde hân.

nu hêrre, nû bedenket daz

und iedoch niht durch mînen haz:

sol er nu dirre lande pflegen,

die wîle und ir sît underwegen,

14195

ist daz iu danne missegât,

als lîhte an verten ûf erstât,

sô nimet er mir êre unde lant.

nu habet ir ez gâr erkant,

daz mir an ime gewerren kan.

14200

nû gedenket ouch dar an

ze guote und alse der vriunt sol,

und loeset mich, sô tuot ir wol,

von mînem hêrn Tristande.

schicket in wider ze lande

14205

oder schaffet, daz er mit iu var

und mich die wîle bewar

der truhsaeze Marjodô.

stüende aber iuwer muot alsô,

daz ir mich mit iu liezet varn,

14210

ich lieze hie diu lant bewarn

und berihten, swer der wolte,

et daz ich mit iu solte.

über daz allez sô tuot ir

mit den landen und mit mir,

14215

reht alse iuch selbe dunke guot.

daz ist mîn wille und mîn muot.

et ich gedenke dar zuo,

daz ich iuwern willen tuo,

ich lâze ez allez z'einer hant

14220

beidiu liute unde lant.»

Sus gie s'ir hêrren lôsende an,

biz daz si'm aber an gewan,

daz er den zwîvel aber lie

und aber von dem wâne gie

14225

ir muotes unde ir minne

und aber die küniginne

mitalle unschuldic haete

vor aller slahte untaete.

den truhsaezen Marjodô

14230

den haete er aber mitalle dô

ze einem lügenaere,

doch er'm diu wâren maere

und die rehten wârheit

von ir haete geseit.