BIBLIOTHECA AUGUSTANA

 

Walther von der Vogelweide

nach 1170 - um 1230

 

Sprüche und Lieder

in chronologischer Anordnung

 

Meißnerton

(um 1212/13)

 

Nû sol der keiser hêre (105,13)

Der Mîssenære solde (105,27)

Ich hân dem Mîssenære (106,3)

 

______________________________________________________________

 

 

 

I

Nû sol der keiser hêre

(Mahnung zur Nachsicht)

L 105,13

Nû sol der keiser hêre

vur brechen dur sîn êre

des lantgraven missetât.

wan er was doch zwâre

5

sîn vîent offenbâre

die zagen truogen stillen rât:

si swuoren hie, si swuoren dort,

und pruoften ungetriuwen mort.

von Rôme fuor ir schelten.

10

ir dûf enmohte sich niht verheln,

si begunden under zwischen steln

und alle ein ander melden.

seht, diep stal diebe,

drô tet liebe.

 

 

II

Der Missenære solde

(Lobforderung)

L 105,27

Der Missenære solde

mir wandeln, ob er wolde.

mînen dienst lâz ich allez varn,

niwan mîn lop aleine.

5

daz in mîn lob iht meine,

daz kan ich schône wol bewarn.

lob ich in, sô lob er mich.

des andern alles des wil ich

in minneclîch erlâzen.

10

sîn lob daz muoz ouch mir gezemen,

oder ich wil mînez her wider nemen

ze hove und an der strâzen,

sô ich nû genuoge

warte sîner vuoge.

 

 

III

Ich hân dem Missenære

(Undank des Meißners)

L 106,3

Ich hân dem Missenære

gefüeget manic mære,

baz danne er nû gedenke mîn.

waz sol diu rede beschœnet:

5

möht ich in hân gekrœnet,

diu krône wære hiute sîn.

het er mir dô gelônet baz,

ich diente im aber etewaz,

noch kan ich schaden vertrîben.

10

er ist aber sô gefüege niht,

daz er mir biete wandels reht:

dâ lâzen wirz belîben.

waz vil verdirbet,

des man niht enwirbet!