Parzival

Buch V

__________________________________________________________________________________

224

Swer ruochet hœren war nu kumt

den âventiur hât ûz gefrumt,

der mac grôziu wunder

merken al besunder.

5

lât rîten Gahmuretes kint.

swâ nu getriwe liute sint,

die wünschn im heils: wan ez muoz sîn

daz er nu lîdet hôhen pîn,

etswenne ouch freude und êre.

10

ein dinc in müete sêre,

daz er von ir gescheiden was,

daz munt von wîbe nie gelas

noch sus gesagte mære,

diu schœnr und bezzer wære.

15

gedanke nâch der künegin

begunden krenken im den sin:

den müeser gar verloren hân,

wærz niht ein herzehafter man.

mit gewalt den zoum daz ros

20

truog über ronen und durchez mos:

wandez wîste niemens hant.

uns tuot diu âventiure bekant

daz er bî dem tage reit,

ein vogel hetes arbeit,

25

solt erz allez hân erflogen.

mich enhab diu âventiure betrogen,

sîn reise unnâch was sô grôz

des tages do er Ithêren schôz,

unt sît dô er von Grâharz

30

kom in daz lant ze Brôbarz.

225

Welt ir nu hœrn wiez im gestê?

er kom des âbnts an einen sê.

dâ heten geankert weideman:

den was daz wazzer undertân.

5

dô si in rîten sâhen,

si wârn dem stade sô nâhen

daz si wol hôrten swaz er sprach.

einen er im schiffe sach:

der het an im alsolch gewant,

10

ob im dienden elliu lant,

daz ez niht bezzer möhte sîn.

gefurriert sîn huot was pfâwîn.

den selben vischære

begunder vrâgen mære,

15

daz er im riete durch got

und durch sîner zühte gebot,

wa er herberge möhte hân.

sus antwurte im der trûric man.

er sprach «hêr, mirst niht bekant

20

daz weder wazzer oder lant

inre drîzec mîln erbûwen sî.

wan ein hûs lît hie bî:

mit triwen ich iu râte dar:

war möht ir tâlanc anderswar?

25

dort an des velses ende

dâ kêrt zer zeswen hende.

so'r ûf hin komet an den grabn,

ich wæn dâ müezt ir stille habn.

bit die brüke iu nider lâzen

30

und offen iu die strâzen.»

226

Er tet als im der vischer riet,

mit urlouber dannen schiet.

er sprach «komt ir rehte dar,

ich nim iwer hînt selbe war:

5

sô danket als man iwer pflege.

hüet iuch: dâ gênt unkunde wege:

ir muget an der lîten

wol misserîten,

deiswâr des ich iu doch niht gan.»

10

Parzivâl der huop sich dan,

er begunde wackerlîchen draben

den rehten pfat unz an den graben.

dâ was diu brükke ûf gezogen,

diu burc an veste niht betrogen.

15

si stuont reht als si wære gedræt.

ez enflüge od hete der wint gewæt,

mit sturme ir niht geschadet was.

vil türne, manec palas

dâ stuont mit wunderlîcher wer.

20

op si suochten elliu her,

sine gæben für die selben nôt

ze drîzec jâren niht ein brôt.

ein knappe des geruochte

und vrâgte in waz er suochte

25

od wann sîn reise wære.

er sprach «der vischære

hât mich von im her gesant.

ich hân genigen sîner hant

niwan durch der herberge wân.

30

er bat die brükken nider lân,

227

und hiez mich zuo ziu rîten în.»

«hêrre, ir sult willekomen sîn.

sît es der vischære verjach,

man biut iu êre unt gemach

5

durch in der iuch sande widr,»

sprach der knappe und lie die brükke nidr.

In die burc der küene reit,

ûf einen hof wît unde breit.

durch schimpf er niht zetretet was

10

(dâ stuont al kurz grüene gras:

dâ was bûhurdiern vermiten),

mit baniern selten überriten,

alsô der anger z'Abenberc.

selten frœlîchiu werc

15

was dâ gefrümt ze langer stunt:

in was wol herzen jâmer kunt.

wênc er des gein in enkalt.

in enpfiengen ritter jung unt alt.

vil kleiner junchêrrelîn

20

sprungen gein dem zoume sîn:

ieslîchez für dez ander greif.

si habten sînen stegreif:

sus muoser von dem orse stên.

in bâten ritter fürbaz gên:

25

die fuorten in an sîn gemach.

harte schiere daz geschach,

daz er mit zuht entwâpent wart.

dô si den jungen âne bart

gesâhen alsus minneclîch,

30

si jâhn, er wære sælden rîch.

228

Ein wazzer iesch der junge man,

er twuoc den râm von im sân

undern ougen unt an handen.

alt und junge wânden

5

daz von im ander tag erschine.

sus saz der minneclîche wine.

gar vor allem tadel vrî

mit pfelle von Arâbî

man truoc im einen mantel dar:

10

den legt an sich der wol gevar;

mit offenre snüere.

ez was im ein lobs gefüere.

dô sprach der kamerære kluoc

«Repanse de schoye in truoc,

15

mîn frouwe de künegîn:

ab ir sol er iu glihen sîn:

wan iu ist niht kleider noch gesniten.

jâ mohte ich sis mit êren biten:

wande ir sît ein werder man,

20

ob ichz geprüevet rehte hân.»

«got lôn iu, hêrre, daz irs jeht.

ob ir mich ze rehte speht,

sô hât mîn lîp gelücke erholt:

diu gotes kraft gît sölhen solt.»

25

man schancte im unde pflac sîn sô,

die trûregen wâren mit im vrô.

man bôt im wirde und êre:

wan dâ was râtes mêre

denne er ze Pelrapeire vant,

30

die dô von kumber schiet sîn hant.

229

Sîn harnasch was von im getragen:

daz begunder sider klagen,

da er sich schimpfes niht versan.

ze hove ein redespæher man

5

bat komn ze vrävellîche

den gast ellens rîche

zem wirte, als ob im wære zorn.

des het er nâch den lîp verlorn

von dem jungen Parzivâl.

10

dô er sîn swert wol gemâl

ninder bî im ligen vant,

zer fiuste twanger sus die hant

daz dez pluot ûzen nagelen schôz

und im den ermel gar begôz.

15

«nein, hêrre,» sprach diu ritterschaft,

«ez ist ein man der schimpfes kraft

hât, swie trûrc wir anders sîn:

tuot iwer zuht gein im schîn.

ir sultz niht anders hân vernomn,

20

wan daz der vischær sî komn.

dar gêt: ir sît im werder gast:

und schütet ab iu zornes last.»

si giengen ûf ein palas.

hundert krône dâ gehangen was,

25

vil kerzen drûf gestôzen,

ob den hûsgenôzen,

kleine kerzen umbe an der want.

hundert pette er ligen vant

(daz schuofen dies dâ pflâgen):

30

hundert kulter drûffe lâgen.

230

Ie vier gesellen sundersiz,

da enzwischen was ein underviz.

derfür ein teppech sinewel,

fil li roy Frimutel

5

mohte wol geleisten daz.

eins dinges man dâ niht vergaz:

sine hete niht betûret,

mit marmel was gemûret

drî vierekke fiwerrame:

10

dar ûffe was des fiwers name,

holz hiez lign alôê.

sô grôziu fiwer sît noch ê

sach niemen hie ze Wildenberc:

jenz wâren kostenlîchiu werc.

15

der wirt sich selben setzen bat

gein der mitteln fiwerstat

ûf ein spanbette.

ez was worden wette

zwischen im und der vröude:

20

er lebte niht wan töude.

in den palas kom gegangen

der dâ wart wol enpfangen,

Parzivâl der lieht gevar,

von im der in sante dar.

25

er liez in dâ niht langer stên:

in bat der wirt nâher gên

und sitzen, «zuo mir dâ her an.

sazte i'uch verre dort hin dan,

daz wære iu alze gastlîch.»

30

sus sprach der wirt jâmers rîch.

231

Der wirt het durch siechheit

grôziu fiur und an im warmiu kleit.

wît und lanc zobelîn,

sus muose ûze und inne sîn

5

der pelliz und der mantel drobe.

der swechest balc wær wol ze lobe:

der was doch swarz unde grâ:

des selben was ein hûbe dâ

ûf sîme houbte zwivalt,

10

von zobele den man tiure galt.

sinwel arâbsch ein borte

oben drûf gehôrte,

mitten dran ein knöpfelîn,

ein durchliuhtic rubîn.

15

dâ saz manec ritter kluoc,

dâ man jâmer für si truoc.

ein knappe spranc zer tür dar în.

der truog eine glævîn

(der site was ze trûren guot):

20

an der snîden huop sich pluot

und lief den schaft unz ûf die hant,

deiz in dem ermel wider want.

dâ wart geweinet unt geschrît

ûf dem palase wît:

25

daz volc von drîzec landen

möhtz den ougen niht enblanden.

er truoc se in sînen henden

alumb zen vier wenden,

unz aber wider zuo der tür.

30

der knappe spranc hin ûz derfür.

232

Gestillet was des volkes nôt,

als in der jâmer ê gebôt,

des si diu glævîn het ermant,

die der knappe brâhte in sîner hant.

5

wil iuch nu niht erlangen,

sô wirt hie zuo gevangen

daz ich iuch bringe an die vart,

wie dâ mit zuht gedienet wart.

zende an dem palas

10

ein stählîn tür entslozzen was:

dâ giengen ûz zwei werdiu kint.

nu hœrt wie diu geprüevet sint,

daz si wol gæben minnen solt,

swerz dâ mit dienste het erholt.

15

daz wâren juncfrouwen clâr.

zwei schapel über blôziu hâr

blüemîn was ir gebende.

iewederiu ûf der hende

truoc von golde ein kerzstal.

20

ir hâr was reit lanc unde val.

si truogen brinnendigiu lieht.

hie sule wir vergezzen nieht

umbe der juncfrowen gewant,

dâ man se kumende inne vant.

25

de grævîn von Tenabroc,

brûn scharlachen was ir roc:

des selben truoc ouch ir gespil.

si wâren gefischieret vil

mit zwein gürteln an der krenke,

30

ob der hüffe ame gelenke.

233

Nâch den kom ein herzogîn

und ir gespil. zwei stöllelîn

si truogen von helfenbein.

ir munt nâch fiwers rœte schein.

5

die nigen alle viere:

zwuo satzten schiere

für den wirt die stollen.

dâ wart gedient mit vollen.

die stuonden ensamt an eine schar

10

und wâren alle wol gevar.

den vieren was gelîch ir wât.

seht wâ sich niht versûmet hât

ander frouwen vierstunt zwuo.

die wâren dâ geschaffet zuo.

15

viere truogen kerzen grôz:

die andern viere niht verdrôz,

sine trüegen einen tiuren stein,

dâ tages de sunne lieht durch schein.

dâ für was sîn name erkant:

20

ez was ein grânât jâchant,

beide lanc unde breit.

durch die lîhte in dünne sneit

swer in zeime tische maz;

dâ obe der wirt durch rîchheit az.

25

si giengen harte rehte

für den wirt al ehte,

gein nîgen si ir houbet wegten.

viere die taveln legten

ûf helfenbein wîz als ein snê,

30

stollen die dâ kômen ê.

234

Mit zuht si kunden wider gên,

zuo den êrsten vieren stên.

an disen aht frouwen was

röcke grüener denn ein gras,

5

von Azagouc samît,

gesniten wol lanc unde wît.

dâ mitten si zesamne twanc

gürteln tiur smal unde lanc.

dise ahte juncfrouwen kluoc,

10

ieslîchiu ob ir hâre truoc

ein kleine blüemîn schapel.

der grâve Iwân von Nônel

unde Jernîs von Rîl,

jâ was über manege mîl

15

ze dienst ir tohter dar genomn:

man sach die zwuo fürstîn komn

in harte wünneclîcher wât.

zwei mezzer snîdende als ein grât

brâhten si durch wunder

20

ûf zwein twehelen al besunder.

daz was silber herte wîz:

dar an lag ein spæher vlîz:

im was solch scherpfen niht vermiten,

ez hete stahel wol versniten.

25

vorm silber kômen frouwen wert,

der dar ze dienste was gegert:

die truogen lieht dem silber bî;

vier kint vor missewende vrî.

sus giengen se alle sehse zuo:

30

nu hœrt was ieslîchiu tuo.

235

Si nigen. ir zwuo dô truogen dar

ûf die taveln wol gevar

daz silber, unde leitenz nidr.

dô giengen si mit zühten widr

5

zuo den êrsten zwelven sân.

ob i'z geprüevet rehte hân,

hie sulen ahzehen frouwen stên.

âvoy nu siht man sehse gên

in wæte die man tiure galt:

10

daz was halbez plîalt,

daz ander pfell von Ninnivê.

dise unt die êrsten sehse ê

truogen zwelf röcke geteilt,

gein tiwerr kost geveilt.

15

nâch den kom diu künegîn.

ir antlütze gap den schîn,

si wânden alle ez wolde tagen.

man sach die maget an ir tragen

pfellel von Arâbî.

20

ûf einem grüenen achmardî

truoc si den wunsch von pardîs,

bêde wurzeln unde rîs.

daz was ein dinc, daz hiez der Grâl,

erden wunsches überwal.

25

Repanse de schoy si hiez,

die sich der grâl tragen liez.

der grâl was von sölher art:

wol muoser kiusche sîn bewart,

die sîn ze rehte solde pflegn:

30

die muose valsches sich bewegn.

236

Vorem grâle kômen lieht:

diu wârn von armer koste nieht;

sehs glas lanc lûter wolgetân,

dar inne balsem der wol bran.

5

dô si kômen von der tür

ze rehter mâze alsus her für,

mit zühten neic diu künegîn

und al diu juncfröwelîn

die dâ truogen balsemvaz.

10

diu küngîn valscheite laz

sazte für den wirt den grâl.

dez mære giht daz Parzivâl

dicke an si sach unt dâhte,

diu den grâl dâ brâhte:

15

er het och ir mantel an.

mit zuht die sibene giengen dan

zuo den ahzehen êrsten.

dô liezen si die hêrsten

zwischen sich; man sagte mir,

20

zwelve iewederthalben ir.

diu maget mit der krône

stuont dâ harte schône.

swaz ritter dô gesezzen was

über al den palas,

25

den wâren kamerære

mit guldîn becken swære

ie viern geschaffet einer dar,

und ein junchêrre wol gevar

der eine wîze tweheln truoc.

30

man sach dâ rîcheit genuoc.

237

Der taveln muosen hundert sîn,

die man dâ truoc zer tür dar în.

man sazte ieslîche schiere

für werder ritter viere:

5

tischlachen var nâch wîze

wurden drûf geleit mit vlîze.

der wirt dô selbe wazzer nam:

der was an hôhem muote lam.

mit im twuoc sich Parzivâl.

10

ein sîdîn tweheln wol gemâl

die bôt eins grâven sun dernâch:

dem was ze knien für si gâch.

swâ dô der taveln keiniu stuont,

dâ tet man vier knappen kuont

15

daz se ir diens niht vergæzen

den die drobe sæzen.

zwêne knieten unde sniten:

die andern zwêne niht vermiten,

sine trüegen trinkn und ezzen dar,

20

und nâmen ir mit dienste war.

hœrt mêr von rîchheite sagen.

vier karrâschen muosen tragen

manec tiwer goltvaz

ieslîchem ritter der dâ saz.

25

man zôhs zen vier wenden.

vier ritter mit ir henden

mans ûf die taveln setzen sach.

ieslîchem gieng ein schrîber nâch,

der sich dar zuo arbeite

30

und si wider ûf bereite,

238

Sô dâ gedienet wære.

nu hœrt ein ander mære.

hundert knappen man gebôt:

die nâmn in wîze tweheln brôt

5

mit zühten vor dem grâle.

die giengen al zemâle

und teilten für die taveln sich.

man sagte mir, diz sag ouch ich

ûf iwer ieslîches eit,

10

daz vorem grâle wære bereit

(sol ich des iemen triegen,

sô müezt ir mit mir liegen)

swâ nâch jener bôt die hant,

daz er al bereite vant

15

spîse warm, spîse kalt,

spîse niwe unt dar zuo alt,

daz zam unt daz wilde.

esn wurde nie kein bilde,

beginnet maneger sprechen.

20

der wil sich übel rechen:

wan der grâl was der sælden fruht,

der werlde süeze ein sölh genuht,

er wac vil nâch gelîche

als man saget von himelrîche.

25

in kleiniu goltvaz man nam,

als ieslîcher spîse zam,

salssen, pfeffer, agraz.

dâ het der kiusche und der vrâz

alle gelîche genuoc.

30

mit grôzer zuht manz für si truoc.

239

Môraz, wîn, sinôpel rôt,

swâ nâch den napf ieslîcher bôt,

swaz er trinkens kunde nennen,

daz mohter drinne erkennen

5

allez von des grâles kraft.

diu werde geselleschaft

hete wirtschaft vome grâl.

wol gemarcte Parzivâl

die rîcheit unt daz wunder grôz:

10

durch zuht in vrâgens doch verdrôz.

er dâhte «mir riet Gurnamanz

mit grôzen triwen âne schranz,

ich solte vil gevrâgen niht.

waz op mîn wesen hie geschiht

15

die mâze als dort pî im?

âne vrâge ich vernim

wiez dirre massenîe stêt.»

in dem gedanke nâher gêt

ein knappe, der truog ein swert:

20

des palc was tûsent marke wert,

sîn gehilze was ein rubîn,

ouch möhte wol diu klinge sîn

grôzer wunder urhap.

der wirt ez sîme gaste gap.

25

der sprach «hêrre, ich prâhtz in nôt

in maneger stat, ê daz mich got

ame lîbe hât geletzet.

nu sît dermit ergetzet,

ob man iwer hie niht wol enpflege.

30

ir mugetz wol füeren alle wege:

240

Swenne ir geprüevet sînen art,

ir sît gein strîte dermite bewart.»

ôwê daz er niht vrâgte dô!

des pin ich für in noch unvrô.

5

wan do erz enpfienc in sîne hant,

dô was er vrâgens mit ermant.

och riwet mich sîn süezer wirt,

den ungenande niht verbirt,

des im von vrâgn nu wære rât.

10

genuoc man dâ gegeben hât:

dies pflâgen, die griffenz an,

si truognz gerüste wider dan.

vier karrâschen man dô luot.

ieslîch frouwe ir dienest tuot,

15

ê die jungsten, nu die êrsten.

dô schuofen se abr die hêrsten

wider zuo dem grâle.

dem wirte und Parzivâle

mit zühten neic diu künegîn

20

und al diu juncfröwelîn.

si brâhten wider în zer tür

daz si mit zuht ê truogen für.

Parzivâl in blicte nâch.

an eime spanbette er sach

25

in einer kemenâten,

ê si nâch in zuo getâten,

den aller schœnsten alten man

des er künde ie gewan.

ich magez wol sprechen âne guft,

30

er was noch grâwer dan der tuft.

241

Wer der selbe wære,

des freischet her nâch mære.

dar zuo der wirt, sîn burc, sîn lant,

diu werdent iu von mir genant,

5

her nâch sô des wirdet zît,

bescheidenlîchen, âne strît

unde ân allez für zogen.

ich sage die senewen âne bogen.

diu senewe ist ein bîspel.

10

nu dunket iuch der boge snel:

doch ist sneller daz diu senewe jaget.

ob ich iu rehte hân gesaget,

diu senewe gelîchet mæren sleht:

diu dunkent ouch die liute reht.

15

swer iu saget von der krümbe,

der wil iuch leiten ümbe.

swer den bogen gespannen siht,

der senewen er der slehte giht,

man welle si zer biuge erdenen

20

sô si den schuz muoz menen.

swer aber dem sîn mære schiuzet,

des in durch nôt verdriuzet:

wan daz hât dâ ninder stat,

und vil gerûmeclîchen pfat,

25

zeinem ôren în, zem andern für.

mîn arbeit ich gar verlür,

op den mîn mære drunge:

ich sagte oder sunge,

daz ez noch paz vernæme ein boc

30

odr ein ulmiger stoc.

242

Ich wil iu doch paz bediuten

von disen jâmerbæren liuten.

dar kom geriten Parzivâl,

man sach dâ selten freuden schal,

5

ez wære buhurt oder tanz:

ir klagendiu stæte was sô ganz,

sine kêrten sich an schimphen niht.

swâ man noch minner volkes siht,

den tuot etswenne vreude wol:

10

dort wârn die winkel alle vol,

und ouch ze hove dâ man se sach.

der wirt ze sîme gaste sprach

«ich wæn man iu gebettet hât.

sît ir müede, so ist mîn rât

15

daz ir gêt, leit iuch slâfen.»

nu solt ich schrîen wâfen

umb ir scheiden daz si tuont:

ez wirt grôz schade in beiden kuont.

vome spanbette trat

20

ûfen tepch an eine stat

Parzivâl der wol geslaht:

der wirt bôt im guote naht.

diu rîterschaft dô gar ûf spranc.

ein teil ir im dar nâher dranc:

25

dô fuorten si den jungen man

in eine kemenâten sân.

diu was alsô gehêret

mit einem bette gêret,

daz mich mîn armuot immer müet,

30

sît d'erde alsölhe rîchheit blüet.

243

Dem bette armuot was tiur.

alser glohte in eime fiur,

lac drûffe ein pfellel lieht gemâl.

die ritter bat dô Parzivâl

5

wider varen an ir gemach,

do'r dâ niht mêr bette sach.

mit urloube se fuoren dan.

hie hebt sich ander dienst an.

vil kerzen unt diu varwe sîn

10

die gâbn ze gegenstrîte schîn:

waz möhte liehter sîn der tac?

vor sînem bette ein anderz lac,

dar ûfe ein kulter, da er dâ saz.

junchêrren snel und niht ze laz

15

maneger im dar nâher spranc:

si enschuohten bein, diu wâren blanc.

ouch zôch im mêr gewandes abe

manec wol geborner knabe.

vlætec wârn diu selben kindelîn.

20

dar nâch gienc dô zer tür dar în

vier clâre juncfrouwen:

die solten dennoch schouwen

wie man des heldes pflæge

und ober sanfte læge.

25

als mir diu âventiure gewuoc,

vor ieslier ein knappe truoc

eine kerzen diu wol bran.

Parzivâl der snelle man

spranc underz declachen.

30

si sagten «ir sult wachen

244

Durch uns noch eine wîle.»

ein spil mit der île

het er unz an den ort gespilt.

daz man gein liehter varwe zilt,

5

daz begunde ir ougen süezen,

ê si enpfiengen sîn grüezen.

ouch fuogten in gedanke nôt,

daz im sîn munt was sô rôt

unt daz vor jugende niemen dran

10

kôs gein einer halben gran.

dise vier juncfrouwen kluoc,

hœrt waz ieslîchiu truoc.

môraz, wîn unt lûtertranc

truogen drî ûf henden blanc:

15

diu vierde juncfrouwe wîs

truog obz der art von pardîs

ûf einer tweheln blanc gevar.

diu selbe kniete ouch für in dar.

er bat die frouwen sitzen.

20

si sprach «lât mich bî witzen.

sô wært ir diens ungewert,

als mîn her für iuch ist gegert.»

süezer rede er gein in niht vergaz:

der hêrre tranc, ein teil er az.

25

mit urloube se giengen widr:

Parzivâl sich leite nidr.

ouch sazten junchêrrelîn

ûfen tepch die kerzen sîn,

dô si in slâfen sâhen:

30

si begunden dannen gâhen.

245

Parzivâl niht eine lac:

geselleclîche unz an den tac

was bî im strengiu arbeit.

ir boten künftigiu leit

5

sanden im in slâfe dar,

sô daz der junge wol gevar

sîner muoter troum gar widerwac,

des si nâch Gahmurete pflac.

sus wart gesteppet im sîn troum

10

mit swertslegen umbe den soum,

dervor mit maneger tjoste rîch.

von rabbîne hurteclîch

er leit in slâfe etslîche nôt.

möhter drîzecstunt sîn tôt,

15

daz heter wachende ê gedolt:

sus teilt im ungemach den solt.

von disen strengen sachen

muos er durch nôt erwachen.

im switzten âdern unde bein.

20

der tag ouch durch diu venster schein.

dô sprach er «wê wâ sint diu kint,

daz si hie vor mir niht sint?

wer sol mir bieten mîn gewant?»

sus wart ir der wîgant,

25

unz er anderstunt entslief.

nieman dâ redete noch enrief:

si wâren gar verborgen.

umbe den mitten morgen

do erwachte aber der junge man:

30

ûf rihte sich der küene sân.

246

Ufem teppech sach der degen wert

ligen sîn harnasch und zwei swert:

daz eine der wirt im geben hiez,

daz ander was von Gaheviez.

5

dô sprach er zim selben sân

«ouwê durch waz ist diz getân?

deiswâr ich sol mich wâpen drîn.

ich leit in slâfe alsölhen pîn,

daz mir wachende arbeit

10

noch hiute wætlîch ist bereit.

hât dirre wirt urliuges nôt,

sô leist ich gerne sîn gebot

und ir gebot mit triuwen,

diu disen mantel niuwen

15

mir lêch durch ir güete.

wan stüende ir gemüete

daz si dienst wolde nemn!

des kunde mich durch si gezemn,

und doch niht durch ir minne:

20

wan mîn wîp de küneginne

ist an ir lîbe alse clâr,

oder fürbaz, daz ist wâr.»

er tet alser tuon sol:

von fuoz ûf wâpent er sich wol

25

durch strîtes antwurte,

zwei swert er umbe gurte.

zer tür ûz gienc der werde degen:

dâ was sîn ors an die stegen

geheftet, schilt unde sper

30

lent derbî: daz was sîn ger.

247

E Parzivâl der wîgant

sich des orses underwant,

mangez er der gadem erlief,

sô daz er nâch den liuten rief.

5

nieman er hôrte noch ensach:

ungefüege leit im dran geschach.

daz het im zorn gereizet.

er lief da er was erbeizet

des âbents, dô er komen was.

10

dâ was erde unde gras

mit tretenne gerüeret

untz tou gar zerfüeret.

al schrînde lief der junge man

wider ze sîme orse sân.

15

mit pâgenden worten

saz er drûf. die porten

vander wît offen stên,

derdurch ûz grôze slâ gên:

niht langer er dô habte,

20

vast ûf die brükke er drabte.

ein verborgen knappe'z seil

zôch, daz der slagebrüken teil

hetz ors vil nâch gevellet nidr.

Parzivâl der sach sich widr:

25

dô wolter hân gevrâget baz.

«ir sult varen der sunnen haz,»

sprach der knappe. «ir sît ein gans.

möht ir gerüeret hân den flans,

und het den wirt gevrâget!

30

vil prîss iuch hât betrâget.»

248

Nâch den mæren schrei der gast:

gegenrede im gar gebrast.

swie vil er nâch geriefe,

reht alser gênde sliefe

5

warp der knappe und sluoc die porten zuo.

dô was sîn scheiden dan ze fruo

an der flustbæren zît

dem der nu zins von freuden gît:

diu ist an im verborgen.

10

umbe den wurf der sorgen

wart getoppelt, do er den grâl vant,

mit sînen ougen, âne hant

und âne würfels ecke.

ob in nu kumber wecke,

15

des was er dâ vor niht gewent:

ern hete sich niht vil gesent.

Parzivâl der huop sich nâch

vast ûf die slâ dier dâ sach.

er dâht «die vor mir rîten,

20

ich wæn die hiute strîten

manlîch um mîns wirtes dinc.

ruochten sis, sô wære ir rinc

mit mir niht verkrenket.

dane wurde niht gewenket,

25

ich hulfe in an der selben nôt,

daz ich gediende mîn brôt

und ouch diz wünneclîche swert,

daz mir gap ir hêrre wert.

ungedient ich daz trage.

30

si wænent lîhte, ich sî ein zage.»

249

Der valscheite widersaz

kêrt ûf der huofslege kraz.

sîn scheiden dan daz riwet mich.

alrêrst nu âventiurt ez sich.

5

do begunde krenken sich ir spor:

sich schieden die dâ riten vor.

ir slâ wart smal, diu ê was breit:

er verlôs se gar: daz was im leit.

mær vriesch dô der junge man,

10

dâ von er herzenôt gewan.

do erhôrte der degen ellens rîch

einer frouwen stimme jæmerlîch.

ez was dennoch von touwe naz.

vor im ûf einer linden saz

15

ein magt, der fuogte ir triwe nôt.

ein gebalsemt ritter tôt

lent ir zwischenn armen.

swenz niht wolt erbarmen,

der si sô sitzen sæhe,

20

untriwen ich im jæhe.

sîn ors dô gein ir wante

der wênic si bekante:

si was doch sîner muomen kint.

al irdisch triwe was ein wint,

25

wan die man an ir lîbe sach.

Parzivâl si gruozte unde sprach

«frouwe, mir ist vil leit

iwer senelîchiu arebeit.

bedurft ir mînes dienstes iht,

30

in iwerem dienste man mich siht.»

250

Si danct im ûz jâmers siten

und vrâgt in wanne er kœme geriten.

si sprach «ez [ist] widerzæme

daz iemen an sich næme

5

sîne reise in dise waste.

unkundem gaste

mac hie wol grôzer schade geschehn.

ich hânz gehôrt und gesehn

daz hie vil liute ir lîp verlurn,

10

die werlîche'n tôt erkurn.

kêrt hinnen, ob ir welt genesn.

saget ê, wâ sît ir hînt gewesn?»

«dar ist ein mîle oder mêr,

daz ich gesach nie burc sô hêr

15

mit aller slahte rîchheit.

in kurzer wîle ich dannen reit.»

si sprach «swer iu getrûwet iht,

den sult ir gerne triegen niht.

ir traget doch einen gastes schilt.

20

iuch möht des waldes hân bevilt,

von erbûwenem lande her geritn.

inre drîzec mîln wart nie versnitn

ze keinem bûwe holz noch stein:

wan ein burc diu stêt al ein.

25

diu ist erden wunsches rîche.

swer die suochet flîzeclîche,

leider der envint ir niht.

vil liute manz doch werben siht.

ez muoz unwizzende geschehen,

30

swer immer sol die burc gesehen.

251

Ich wæn, hêr, diust iu niht bekant.

Munsalvæsche ist si genant.

der bürge wirtes royâm,

Terre de Salvæsche ist sîn nam.

5

ez brâhte der alte Tyturel

an sînen sun. rois Frimutel,

sus hiez der werde wîgant:

manegen prîs erwarp sîn hant.

der lac von einer tjoste tôt,

10

als im diu minne dar gebôt.

der selbe liez vier werdiu kint.

bî rîcheit driu in jâmer sint:

der vierde hât armuot,

durch got für sünde er daz tuot.

15

der selbe heizet Trevrizent.

Anfortas sîn bruoder lent:

der mac gerîten noch gegên

noch geligen noch gestên.

der ist ûf Munsalvæsche wirt:

20

ungenâde in niht verbirt.»

si sprach «hêr, wært ir komen dar

zuo der jæmerlîchen schar,

sô wære dem wirte worden rât

vil kumbers den er lange hât.»

25

der Wâleis zer meide sprach

«grœzlîch wunder ich dâ sach,

unt manege frouwen wol getân.»

bî der stimme erkante si den man.

Dô sprach sie «du bist Parzivâl.

30

nu sage et, sæhe du den grâl

252

unt den wirt freuden lære?

lâ hœren liebiu mære.

ob wendec ist sîn freise,

wol dich der sælden reise!

5

wan swaz die lüfte hânt beslagen,

dar ob muostu hœhe tragen:

dir dienet zam unde wilt,

ze rîcheit ist dir wunsch gezilt.»

Parzivâl der wîgant

10

sprach «wâ von habt ir mich erkant?»

si sprach «dâ bin ichz diu magt

diu dir ê kumber hât geklagt,

und diu dir sagte dînen namn.

dune darft dich niht der sippe schamn,

15

daz dîn muoter ist mîn muome.

wîplîcher kiusche ein bluome

ist si, geliutert âne tou.

got lôn dir daz dich dô sô rou

mîn friwent, der mir zer tjost lac tôt.

20

ich hânn alhie nu prüeve nôt

die mir got hât an im gegebn,

daz er niht langer solde lebn.

er pflac manlîcher güete

sîn sterben mich dô müete:

25

och hân ich sît von tage ze tage

fürbaz erkennet niwe klage.»

«ôwê war kom dîn rôter munt?

bistuz Sigûne, diu mir kunt

tet wer ich was, ân allen vâr?

30

dîn reideleht lanc prûnez hâr,

253

Des ist dîn houbet blôz getân.

zem fôrest in Brizljân

sah ich dich dô vil minneclîch,

swie du wærest jâmers rîch.

5

du hâst verlorn varw unde kraft.

dîner herten geselleschaft

verdrüzze mich, solt ich die haben:

wir sulen disen tôten man begraben.»

dô natzten d'ougen ir die wât.

10

ouch was froun Lûneten rât

ninder dâ bî ir gewesen.

diu riet ir frouwen «lât genesen

disen man, der den iweren sluoc:

er mag ergetzen iuch genuoc.»

15

Sigûne gerte ergetzens niht,

als wîp die man bî wanke siht,

manege, der ich wil gedagn.

hœrt mêr Sigûnen triwe sagn.

diu sprach «sol mich iht gevröun,

20

daz tuot ein dinc, ob in sîn töun

læzet, den vil trûrgen man.

schiede du helflîche dan,

sô ist dîn lîp wol prîses wert.

du füerst och umbe dich sîn swert:

25

bekennestu des swertes segen,

du maht ân angest strîtes pflegen.

Sîn ecke ligent im rehte:

von edelem geslehte

worhtez Trebuchetes hant.

30

ein brunne stêt pî Karnant,

254

dar nâch der künec heizet Lac.

daz swert gestêt ganz einen slac,

am andern ez zevellet gar:

wilt duz dan wider bringen dar,

5

ez wirt ganz von des wazzers trân.

du muost des urspringes hân,

underm velse, ê in beschin der tac.

der selbe brunne heizet Lac.

sint diu stücke niht verrêrt,

10

der se reht zein ander kêrt,

sô se der brunne machet naz,

ganz unde sterker baz

wirt im valz und ecke sîn

und vliesent niht diu mâl ir schîn.

15

daz swert bedarf wol segens wort:

ich fürht diu habestu lâzen dort:

hâts aber dîn munt gelernet,

sô wehset unde kernet

immer sælden kraft bî dir:

20

lieber neve, geloube mir,

sô muoz gar dienen dîner hant

swaz dîn lîp dâ wunders vant:

ouch mahtu tragen schône

immer sælden krône

25

hôhe ob den werden:

den wunsch ûf der erden

hâstu volleclîche:

niemen ist sô rîche,

der gein dir koste mege hân,

30

hâstu vrâge ir reht getân.»

255

Er sprach «ich hân gevrâget niht.»

«ôwê daz iuch mîn ouge siht,»

sprach diu jâmerbæriu magt,

«sît ir vrâgens sît verzagt!

5

ir sâhet doch sölch wunder grôz:

daz iuch vrâgens dô verdrôz!

aldâ ir wârt dem grâle bî;

manege frouwen valsches vrî,

die werden Garschiloyen

10

und Repans de schoyen,

und snîdnde silbr und bluotec sper.

ôwê waz wolt ir zuo mir her?

gunêrter lîp, verfluochet man!

ir truogt den eiterwolves zan,

15

dâ diu galle in der triuwe

an iu bekleip sô niuwe.

iuch solt iur wirt erbarmet hân,

an dem got wunder hât getân,

und het gevrâget sîner nôt.

20

ir lebt, und sît an sælden tôt.»

dô sprach er «liebiu niftel mîn,

tuo bezzeren willen gein mir schîn.

ich wandel, hân ich iht getân.»

«ir sult wandels sîn erlân,»

25

sprach diu maget. «mirst wol bekant,

ze Munsalvæsche an iu verswant

êre und rîterlîcher prîs.

iren vindet nu decheinen wîs

decheine geinrede an mir.»

30

Parzivâl sus schiet von ir.

256

Daz er vrâgens was sô laz,

do'r bî dem trûregen wirte saz,

daz rou dô grœzlîche

den helt ellens rîche.

5

durch klage und durch den tac sô heiz

begunde netzen in der sweiz.

durch den luft von im er bant

den helm und fuort in in der hant.

er entstricte die vinteilen sîn:

10

durch îsers râm was lieht sîn schîn.

er kom ûf eine niwe slâ.

wandez gienc vor im aldâ

ein ors daz was wol beslagen,

und ein barfuoz pfäret daz muose tragen

15

eine frouwen die er sach.

nâch der ze rîten im geschach.

ir pfärt gein kumber was verselt:

man het im wol durch hût gezelt

elliu sîniu rippe gar.

20

als ein harm ez was gevar.

ein bästîn halfter lac dar an.

unz ûf den huof swanc im diu man.

sîn ougen tief, die gruoben wît.

ouch was der frouwen runzît

25

vertwâlet unde vertrecket,

durch hunger dicke erwecket.

ez was dürre als ein zunder.

sîn gên daz was wunder:

wandez reit ein frouwe wert,

30

diu selten kunrierte pfert.

257

Dâ lac ûf ein gereite,

smal ân alle breite,

geschelle und bogen verrêret,

grôz zadel dran gemêret.

5

der frouwen trûrec, niht ze geil,

ir surzengel was ein seil:

dem was sie doch ze wol geborn.

ouch heten die este und etslich dorn

ir hemde zerfüeret:

10

swa'z mit zerren was gerüeret,

dâ saher vil der stricke:

dar unde liehte blicke,

ir hût noch wîzer denn ein swan.

sine fuorte niht wan knoden an:

15

swâ die wârn des velles dach,

in blanker varwe er daz sach:

daz ander leit von sunnen nôt.

swiez ie kom, ir munt was rôt:

der muose alsölhe varwe tragen,

20

man hete fiwer wol drûz geslagen.

swâ man se wolt an rîten,

daz was zer blôzen sîten:

[nantes iemen vilân,

der het ir unreht getân:]

25

wan si hete wênc an ir.

durch iwer zuht geloubet mir,

si truoc ungedienten haz:

wîplîcher güete se nie vergaz.

ich saget iu vil armuot:

30

war zuo? diz ist als guot.

doch næme ich sölhen blôzen lîp

für etslîch wol gekleidet wîp.

258

Dô Parzivâl gruoz gein ir sprach,

an in si erkenneclîchen sach.

er was der schönste übr elliu lant;

dâ von sin schiere het erkant.

5

si sagete «ich hân iuch ê gesehn.

dâ von ist leide mir geschehn:

doch müez iu freude unt êre

got immer geben mêre

denn ir um mich gedienet hât.

10

des ist nu ermer mîn wât

denn ir si jungest sâhet.

wært ir niht genâhet

mir an der selben zît,

sô het ich êre âne strît.»

15

dô sprach er «frouwe, merket baz,

gein wem ir kêret iwern haz.

jane wart von mîme lîbe

iu noch decheinem wîbe

laster nie gemêret

20

(sô het ich mich gunêret)

sît ich den schilt von êrst gewan

und rîters fuore mich versan.

mirst ander iwer kumber leit.»

al weinde diu frouwe reit,

25

daz si begôz ir brüstelîn,

als sie gedræt solden sîn.

diu stuonden blanc hôch sinewel:

jane wart nie dræhsel sô snel

der si gedræt hete baz.

30

swie minneclîch diu frouwe saz,

259

si muose in doch erbarmen.

mit henden und mit armen

begunde si sich decken

vor Parzivâl dem recken.

5

Dô sprach er «frouwe, nemt durch got

ûf rehten dienst sunder spot

an iwern lîp mîn kursît.»

«hêrre, wær daz âne strît

daz al mîn freude læge dran,

10

so getörst ichz doch niht grîfen an.

welt ir uns tœtens machen vrî,

sô rîtet daz i'u verre sî.

doch klagte ich wênec mînen tôt,

wan daz ich fürhte ir komts in nôt.»

15

«frouwe, wer næm uns ez lebn?

daz hât uns gotes kraft gegebn:

ob des gerte ein ganzez her,

man sæhe mich für uns ze wer.»

si sprach «es gert ein werder degen:

20

der hât sich strîtes sô bewegen,

iwer sehse kœmns in arbeit.

mirst iwer rîten bî mir leit.

ich was etswenne sîn wîp:

nune möhte mîn vertwâlet lîp

25

des heldes dierne niht gesîn:

sus tuot er gein mir zürnen schîn.»

dô sprach er zuo der frouwen sân

«wer ist hie mit iwerem man?

wan flühe ich nu durch iwern rât,

30

daz diuht iuch lîhte ein missetât.

260

swenne ich fliehen lerne,

sô stirb ich als gerne.»

Dô sprach diu blôze herzogîn

«er hât hie niemen denne mîn.

5

der trôst ist kranc gein strîtes sige.»

niht wan knoden und der rige

was an der frouwen hemde ganz.

wîplîcher kiusche lobes kranz

truoc si mit armüete:

10

si pflac der wâren güete

sô daz der valsch an ir verswant.

die finteiln er für sich pant,

gein strîter wolde füeren

den helm er mit den snüeren

15

eben ze sehne ructe.

innen des daz ors sich pucte,

gein dem pfärde ez schrîen niht vermeit.

der vor Parzivâl dâ reit

und vor der blôzen frouwen,

20

der erhôrtz und wolde schouwen

wer bî sîme wîbe rite.

daz ors warf er mit zornes site

vaste ûz dem stîge.

gein strîteclîchem wîge

25

hielt der herzoge Orilus

gereit zeiner tjost alsus,

mit rehter manlîcher ger,

von Gaheviez mit eime sper:

daz was gevärwet genuoc,

30

reht als er sîniu wâpen truoc.

261

Sînen helm worhte Trebuchet.

sîn schilt was ze Dôlet

in Kailetes lande

geworht dem wîgande:

5

rant und buckel heten kraft.

zAlexandrîe in heidenschaft

was geworht ein pfellel guot,

des der fürste hôch gemuot

truoc kursît und wâpenroc.

10

sîn decke was ze Tenabroc

geworht ûz ringen herte:

sîn stolzheit in lêrte,

der îserînen decke dach

was ein pfellel, des man jach

15

daz der tiwer wære.

rîch und doch niht swære

sîne hosen, halsperc, hersnier:

und in îserîniu schillier

was gewâpent dirre küene man,

20

geworht ze Bêâlzenân

in der houbetstat zAnschouwe.

disiu blôziu frouwe

fuort im ungelîchiu kleit,

diu dâ sô trûric nâh im reit:

25

dane hete sis niht bezzer state.

ze Sessûn was geslagen sîn plate;

sîn ors von Brumbâne

de Salvâsche ah muntâne:

mit einer tjost rois Lähelîn

30

bejagetez dâ, der bruoder sîn.

262

Parzivâl was ouch bereit:

sîn ors mit walap er reit

gein Orilus de Lâlander.

ûf des schilde vander

5

einen trachen als er lebte.

ein ander trache strebte

ûf sîme helme gebunden;

an den selben stunden

manec guldîn trache kleine

10

(mit mangem edelen steine

muosen die gehêret sîn:

ir ougen wâren rubîn)

ûf der decke und ame kursît.

dâ wart genomn der poynder wît

15

von den zwein helden unverzagt.

newederhalp wart widersagt:

si wârn doch ledec ir triuwe.

trunzûne starc al niuwe

von in wæten gein den lüften.

20

ich wolde mich des güften,

het ich ein sölhe tjost gesehen

als mir diz mære hât verjehen.

dâ wart von rabbîne geriten,

ein sölch tjoste niht vermiten:

25

froun Jeschûten muot verjach,

schœner tjost si nie gesach.

diu hielt dâ, want ir hende.

si freuden ellende

gunde enwederm helde schaden.

30

diu ors in sweize muosen baden.

263

Prîss si bêde gerten.

die blicke von den swerten,

und fiwer daz von helmen spranc,

und manec ellenthafter swanc,

5

die begunden verre glesten.

wan dâ wâren strîts die besten

mit hurte an ein ander kumen,

ez gê ze schaden odr ze frumen

den küenen helden mæren.

10

swie willec d'ors in wæren,

dâ sî bêde ûf sâzen,

der sporn si niht vergâzen,

noch ir swerte lieht gemâl.

prîs gedient hie Parzivâl,

15

daz er sich alsus weren kan

wol hundert trachn und eines man.

ein trache wart versêret,

sîne wunden gemêret,

der ûf Orilus helme lac.

20

sô durchliuhtec daz der tac

volleclîche durch in schein,

wart drab geslagen manc edel stein.

daz ergienc zorse und niht ze fuoz.

froun Jeschûten wart der gruoz

25

mit swertes schimphe aldâ bejagt,

mit heldes handen unverzagt.

mit hurt si dicke ein ander schuben,

daz die ringe von den knien zestuben,

swie si wæren îserîn.

30

ruocht irs, si tâten strîtes schîn.

264

Ich wil iu sagen des einen zorn.

daz sîn wîp wol geborn

dâ vor was genôtzogt:

er was iedoch ir rehter vogt,

5

sô daz si schermes wart an in.

er wânde, ir wîplîcher sin

wær gein im verkêret,

unt daz si gunêret

het ir kiusche unde ir prîs

10

mit einem andern âmîs.

des lasters nam er pflihte.

ouch ergienc sîn gerihte

über si, daz grœzer nôt

wîp nie gedolte âne tôt,

15

unde ân alle ir schulde.

er möht ir sîne hulde

versagen, swenner wolde:

nieman daz wenden solde,

ob [der] man des wîbes hât gewalt.

20

Parzivâl der degen balt

Oriluses hulde gerte

froun Jeschûten mit dem swerte.

des hôrt ich ie güetlîche bitn:

ez kom dâ gar von smeiches sitn.

25

mich dunket si hân bêde reht.

der beidiu krump unde sleht

geschuof, künner scheiden,

sô wender daz an beiden,

deiz âne sterben dâ ergê.

30

si tuont doch sus ein ander wê.

265

Da ergienc diu scharpfe herte.

iewederr vaste werte

sînen prîs vor dem ander.

duc Orilus de Lâlander

5

streit nâch sîme gelêrten site.

ich wæne ie man sô vil gestrite.

er hete kunst unde kraft:

des wart er dicke sigehaft

an maneger stat, swiez dâ ergienc.

10

durch den trôst zuo zim er vienc

den jungen starken Parzivâl.

der begreif ouch in dô sunder twâl

unt zucte in ûz dem satel sîn:

als ein garbe häberîn

15

vastern under de arme swanc:

mit im er von dem orse spranc,

und dructe in über einen ronen.

dâ muose schumpfentiure wonen

der sölher nôt niht was gewent.

20

«du garnest daz sich hât versent

disiu frouwe von dîm zorne.

nu bistu der verlorne,

dune lâzest sî dîn hulde hân.»

«daz enwirt sô gâhes niht getân»

25

sprach der herzoge Orilus:

«ich pin noch niht bedwungen sus.»

Parzivâl der werde degen

druct in an sich, daz bluotes regen

spranc durch die barbiere.

30

dâ wart der fürste schiere

266

bedwungen swes man an in warp.

er tet als der ungerne starp.

Er sprach ze Parzivâle sân

«ôwê küene starker man,

5

wa gedient ich ie dise nôt

daz ich vor dir sol ligen tôt?»

«jâ lâze ich dich vil gerne lebn»

sprach Parzivâl, «ob tu wilt gebn

dirre frouwen dîne hulde.»

10

«ich entuons niht: ir schulde

ist gein mir ze grœzlîch.

si was werdekeite rîch:

die hât si gar verkrenket

und mich in nôt gesenket.

15

ich leiste anders swes du gerst,

op du mich des lebens werst.

daz het ich etswenn von gote:

nu ist dîn hant des worden bote

daz ichs danke dîme prîse.»

20

sus sprach der fürste wîse.

«mîn leben kouf ich schône.

in zwein landen krône

treit gewaldeclîche

mîn bruoder, der ist rîche:

25

der nim dir swederz du wellest

daz du mich tôt niht vellest.

ich pin im liep, er lœset mich

als ich gedinge wider dich.

Dar zuo nim ich mîn herzentuom

30

von dir, dîn prîslîcher ruom

267

hât werdekeit an mir bezalt.

nu erlâz mich, küener degen balt,

suone gein disem wîbe,

und gebiut mîme lîbe

5

anders swaz dîn êre sîn.

gein der gunêrten herzogîn

mag ich suone gepflegen niht,

swaz halt anders mir geschiht.»

Parzivâl der hôch gemuot

10

sprach «liute, lant, noch varnde guot,

der decheinez mac gehelfen dir,

dune tuost des sicherheit gein mir,

daz du gein Bertâne varst,

unt die reise niht langer sparst,

15

zeiner magt, die blou durch mich

ein man, gein dem ist mîn gerich

âne ir bete niht verkorn.

du solt der meide wol geborn

sichern und mîn dienest sagen:

20

oder wirt alhie erslagen.

sage Artûse und dem wîbe sîn,

in beiden, von mir dienest mîn,

daz si mîn dienst sus letzen,

[und] die magt ir slege ergetzen.

25

dar zuo wil ich schouwen

in dînen hulden dise frouwen

mit suone âne vâre:

ode du muost ein bâre

tôt hinnen rîten,

30

wiltu michs widerstrîten.

268

Merc diu wort, unt wis der werke ein wer:

des gib mir sicherheit alher.»

dô sprach der herzoge Orilus

zem künege Parzivâl alsus.

5

«mac niemen dâ für niht gegebn,

sô leist ichz: wande ich wil noch lebn.»

durch die vorhte von ir man

frou Jeschût diu wol getân

strîtscheidens gar verzagte:

10

ir vîndes nôt si klagte.

Parzivâl in ûf verliez

do'r froun Jeschûten suone gehiez.

der betwungene fürste sprach

«frowe, sît diz durch iuch geschach,

15

in strît diu schumpfentiure mîn,

wol her, ir sult geküsset sîn.

ich hân vil prîss durch iuch verlorn:

waz denne? ez ist doch verkorn.»

diu frouwe mit ir blôzem vel

20

was zem sprunge harte snel

von dem pfärde ûf den wasen.

swie dez pluot von der nasen

den munt im hete gemachet rôt,

si kust in dô er kus gebôt.

25

dâ wart niht langer dô gebitn,

si bêde und ouch diu frouwe ritn

für ein klôsen in eins velses want.

eine kefsen Parzivâl dâ vant:

ein gemâlet sper derbî dâ lent.

30

der einsidel hiez Trevrizent.

269

Parzivâl dô mit triwen fuor:

er nam daz heiltuom, drûf er swuor.

sus stabter selbe sînen eit.

er sprach «hân ich werdekeit:

5

ich hab se odr enhab ir niht,

swer mich pîme schilde siht,

der prüevet mich gein rîterschaft.

des namen ordenlîchiu kraft,

als uns des schildes ambet sagt,

10

hât dicke hôhen prîs bejagt:

ez ist ouch noch ein hôher name.

mîn lîp gein werltlîcher schame

immer sî gewenket

und al mîn prîs verkrenket.

15

dirre worte sî mit werken pfant

mîn gelücke vor der hœhsten hant:

ich hânz dâ für, die treit got.

nu müeze ich flüsteclîchen spot

ze bêden lîben immer hân

20

von sîner kraft, ob missetân

disiu frouwe habe, dô diz geschach

daz i'r fürspan von ir brach.

och fuort ich mêr goldes dan.

ich was ein tôre und niht ein man,

25

gewahsen niht pî witzen.

vil weinens, dâ bî switzen

mit jâmer dolte vil ir lîp.

sist benamn ein unschuldic wîp.

dâne scheide ich ûz niht mêre:

30

des sî pfant mîn sælde und êre.

270

Ruocht irs, si sol unschuldec sîn.

sêt, gebt ir widr ir vingerlîn.

ir fürspan wart sô vertân

daz es mîn tôrheit danc sol hân.»

5

die gâbe enpfienc der degen guot.

dô streich er von dem munde'z pluot

und kuste sînes herzen trût.

ouch wart verdact ir blôziu hût.

Orilus der fürste erkant

10

stiez dez vingerl wider an ir hant,

und gap ir an sîn kursît:

die was von rîchem pfelle, wît,

mit heldes hant zerhouwen.

ich hân doch selten frouwen

15

wâpenroc an gesehen tragn,

die wære in strîte alsus zerslagn:

von ir krîe wart ouch nie turnei

gesamliert noch sper enzwei

gestochen, swâ daz solde sîn.

20

der guote knappe und Lämbekîn

die tjost zesamne trüegen baz.

sus wart diu frouwe trûrens laz.

dô sprach der fürste Orilus

aber ze Parzivâle alsus.

25

«helt, dîn unbetwungen eit

gît mir grôz liep und krankez leit.

ich hân schumpfentiure gedolt,

diu mir freude hât erholt.

jâ mac mit êren nu mîn lîp

30

ergetzen diz werde wîp,

271

Daz ich se hulde mîn verstiez.

dô ich die süezen eine liez

waz mohte si, swaz ir geschach?

dô se aber von dîner schœne sprach,

5

ich wând dâ wære ein friuntschaft bî.

nu lôn dir got, sist valsches vrî.

ich hân unfuoge an ir getân.

fürz fôrest in Brizljân

reit ich dô in jûven poys.»

10

Parzivâl diz sper von Troys

nam und fuortez mit im dan.

des vergaz der wilde Taurîân,

Dodines bruoder, dâ.

nu sprechet wie oder wâ

15

die helde des nahtes megen sîn.

helm unde ir schilde heten pîn:

die sah man gar verhouwen.

Parzivâl zer frouwen

nam urloup unt zir âmîs.

20

dô ladete in der fürste wîs

mit im an sîne fiwerstat:

daz half in niht, swie vil ers pat.

aldâ schieden die helde sich,

diu âventiur wert mære mich.

25

dô Orilus der fürste erkant

kom dâ er sîn poulûn vant

und sîner messenîe ein teil,

daz volc was al gelîche geil

daz suone was worden schîn

30

gein der sældebernden herzogîn.

272

Daz wart niht langer dô gespart,

Orilus entwâpent wart,

bluot und râm von im er twuoc.

er nam die herzoginne kluoc

5

und fuorte se an die suonstat

und hiez bereiten in zwei bat.

dô lac frou Jeschûte

al weinde bî ir trûte,

vor liebe, unt doch vor leide niht,

10

als guotem wîbe noch geschiht.

ouch ist genuogen liuten kunt,

weindiu ougn hânt süezen munt.

dâ von ich mêr noch sprechen wil.

grôz liebe ist freude und jâmers zil.

15

swer von der liebe ir mære

treit ûf den seigære,

oberz immer wolde wegn,

ez enkan niht anderr schanze pflegn.

da ergienc ein suone, des wæn ich.

20

dô fuorn si sunder baden sich.

zwelf clâre juncfrouwen

man mohte bî ir schouwen:

die pflâgen ir, sît si gewan

zorn ân ir schult von liebem man.

25

si hete ie snahtes deckekleit,

swie blôz si bîme tage reit.

die batten dô mit freuden sie.

ruochet ir nu hœren (wie

Orilus des innen wart)

30

âventiur von Artûses vart?

273

Sus begund im ein rîter sagen.

«ich sach ûf einen plân geslagen

tûsent poulûn oder mêr.

Artûs der rîche künec hêr,

5

der Berteneise hêrre,

lît uns hie niht verre

mit wünneclîcher frouwen schar.

ungevertes ist ein mîle dar.

da ist ouch von rîtern grœzlîch schal.

10

bî dem Plimizœl ze tal

ligents an iewederm stade.»

dô gâhte vaste ûzem bade

der herzoge Orilus.

Jeschûte und er gewurben sus.

15

diu senfte süeze wol getân

gieng ouch ûz ir bade sân

an sîn bette: dâ wart trûrens rât.

ir lide gedienden bezzer wât

dan si dâ vor truoc lange.

20

mit nâhem umbevange

behielt ir minne freuden prîs,

der fürstîn und des fürsten wîs.

juncfrouwen kleitn ir frouwen sân.

sîn harnasch truoc man dar dem man.

25

Jeschûten wât man muose lobn.

vogele gevangen ûf dem klobn

si mit freuden âzen,

dâ se an ir bette sâzen.

frou Jeschûte etslîchen kus

30

enpfienc: den gab ir Orilus.

274

Dô zôch man der frouwen wert

starc wol gênde ein schœne pfert,

gesatelt unt gezoumet wol.

man huop si drûf, diu rîten sol

5

dannen mit ir küenen man.

sîn ors wart gewâpent sân,

reht als erz gein strîte reit.

sîn swert, dâ mit ers tages streit,

man vorn an den satel hienc.

10

von fuoz ûf gewâpent gienc

Orilus zem orse sîn:

er spranc drûf vor der herzogîn.

Jeschûte und er fuoren dan.

sîne mässenîe sân

15

gein Lâlant bat er alle kêren.

wan ein rîter solt in lêren

gein Artûse rîten:

er bat daz volc des bîten.

si kômen Artûs sô nâhen,

20

daz si sîniu poulûn sâhen

vil nâhe ein mîle dez wazzer nidr.

der fürste sant den rîter widr,

der in gewîset hete dar:

frou Jeschût diu wol gevar

25

was sîn gesinde, unt niemen mêr.

der unlôse Artûs niht ze hêr

was gegangen, dô ers âbents gaz,

ûf einen plân. umb in dâ saz

Diu werde massenîe.

30

Orilus der valsches vrîe

275

kom an den selben rinc geritn.

sîn helm sîn schilt was sô versnitn

daz niemen dran kôs keiniu mâl:

die slege frumte Parzivâl.

5

vom orse stuont der küene man:

frou Jeschûte enpfiengez sân.

vil junchêrrn dar nâher spranc:

umb in und si was grôz gedranc.

si jâhn «wir suln der orse pflegn.»

10

Orilus der werde degn

leit schildes schirben ûfez gras.

nâch ir, durch die er komen was,

begunder vrâgen al zehant.

froun Cunnewâren de Lâlant

15

zeigte man im, wâ diu saz.

ir site man gein prîse maz.

gewâpent er sô nâhe gienc.

der künec, diu küngîn, in enpfienc:

er dancte in, bôt fîanze sân

20

sîner swester wol getân.

bî den trachen ûfem kursît

erkande sin wol, wan ein strît:

si sprach «du bist der bruoder mîn,

Orilus, od Lähelîn.

25

ich nim iur dweders sicherheit.

ir wârt mir bêde ie bereit

ze dienste als ich iuch gebat:

mir wære ûf den triwen mat,

solt ich gein iu kriegen,

30

[und] mîn selber zuht betriegen.»

276

Der fürste kniete vor der magt.

er sprach «du hâst al wâr gesagt:

ich pinz dîn bruoder Orilus.

der rôte rîter twanc mich sus

5

daz ich dir sicherheit muoz gebn:

dâ mit erkoufte ich dô mîn lebn.

die enphâch: sô wirt hie gar getân

als ich gein im gelobet hân.»

do enpfienc si triwe in wîze hant

10

von im der truoc den serpant,

unt liez in ledec. dô daz geschach,

dô stuont er ûf unde sprach

«ich sol und muoz durch triwe klagen.

ôwê wer hât dich geslagen?

15

dîne slege tuont mir nimmer wol:

wirts zît daz ich die rechen sol,

ich ginre den, swerz ruochet sehen,

daz mir grôz leit ist dran geschehen.

ouch hilft mirz klagen der küenste man

20

den muoter ie zer werlt gewan:

der nennet sich der rîter rôt.

hêr künec, frou küngîn, er enbôt

iu beiden samt dienest sîn,

dar zuo benamn der swester mîn.

25

er bitet sîn dienst iuch letzen,

[und] dise magt ir slege ergetzen.

och het ichs dô genozzen

gein dem helde unverdrozzen,

wesser wie si mich bestêt

30

und mir ir leit ze herzen gêt.»

277

Keie erwarp dô niwen haz,

von rittern, frouwen, swer dâ saz

ame stade bî dem Plimizœl.

Gâwân und Jofreit fîz Idœl,

5

unt des nôt ir habt gehœret ê,

der gevangene künec Clâmidê,

und anders manec werder man

(ir namn ich wol genennen kan,

wan daz ichz niht wil lengen),

10

die begunden sich dô mengen.

ir dienst mit zühten wart gedolt.

frou Jeschûte wart geholt

ûf ir pfärde, aldâ si saz.

der künec Artûs niht vergaz,

15

und ouch diu künegîn sîn wîp,

si enpfiengen Jeschûten lîp.

von frouwen dâ manc kus geschach.

Artûs ze Jeschûten sprach

«iwern vater, den künec von Karnant,

20

Lacken, hân ich des erkant,

daz ich iwern kumber klagte

sît man mirn zem êrsten sagte.

ouch sît ir selb sô wol getân,

es solt iuch friwent erlâzen hân.

25

wan iwer minneclîcher blic

behielt den prîs ze Kanedic:

durch iwer schœne mære

bleip iu der sparwære,

Iwer hant er dannen reit.

30

swie mir von Oriluse leit

278

geschæhe, in gunde iu trûrens niht,

noch engetuon swa'z geschiht.

mirst liep daz ir die hulde hât,

unt daz ir frowenlîche wât

5

tragt nâch iwer grôzen nôt.»

si sprach «hêr, daz vergelt iu got:

dar an ir hœhet iwern prîs.»

Jeschûten unt ir âmîs

frou Cunnewâre de Lâlant

10

dannen fuorte sâ zehant.

einhalp an des küneges rinc

über eins prunnen ursprinc

stuont ir poulûn ûf dem plân,

als oben ein trache in sînen klân

15

hets ganzen apfels halben teil.

den trachen zugen vier wintseil,

reht alser lebendec dâ flüge

untz poulûn gein den lüften züge.

dâ bî erkandez Orilus:

20

wan sîniu wâpen wâren sus.

er wart entwâpent drunde.

sîn süeziu swester kunde

im bieten êre unt gemach.

über al diu messenîe sprach,

25

des rôten rîters ellen

næm den prîs zeime gesellen.

Des jâhen se âne rûnen.

Kei bat Kingrûnen

Orilus dienn an sîner stat.

30

er kundez wol, den ers dâ bat:

279

wander hetes vil getân

vor Clâmidê ze Brandigân.

Kei durch daz sîn dienst liez:

unsælde ins fürsten swester hiez

5

ze sêre âlûnn mit eime stabe:

durch zuht entweich er diens abe.

ouch was diu schulde niht verkorn

von der meide wol geborn.

doch schuof er spîse dar genuoc:

10

Kingrûnz für Orilusen truoc.

Cunnewâr diu lobes wîse

sneit ir bruoder sîne spîse

mit ir blanken linden hant.

frou Jeschûte von Karnant

15

mit wîplîchen zühten az.

Artûs der künec niht vergaz,

ern kœm dâ diu zwei sâzen

und friwentlîchen âzen.

dô sprach er «gezt ir übele hie,

20

ez enwart iedoch mîn wille nie.

irn gesâzt nie über wirtes brôt,

derz iu mit bezzerem willen bôt

sô gar ân wankes vâre.

mîn frou Cunnewâre,

25

ir sult iurs bruoder hie wol pflegn.

guote naht geb iu der gotes segn.»

Artûs fuor slâfen dô.

Orilus wart gebettet sô

daz sîn frou Jeschûte pflac

30

geselleclîch unz an den tac.