bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Wolfram von Eschenbach

1170/75 - nach 1220

	Willehalm Buch VIII
__________________________________________________________________________________
362	Diz kunden si ze bêder sît. sus samelierte sich der strît. die tjostiure ûz fünf scharn und der schêtîs kom gevarn,
5	und der künec von Tandarnas, und swer dâ mit in beiden was, an den künec von Falfundê. Halzebiere was vor jâmer wê um Pînels tôt von Ahsim.
10	des manlîch her reit dâ bî im geflôrt mit maneger koste: der getouften tjoste umb gelt wart von in genomn. mit Halzebier was ze orse komn
15	der mêr, die tjoste ouch gerten, die Gyburge werten ze Oransche deheiner strîte: an des marcrâven kümfte zîte si dûhte, ir râche hête prîs.
20	der künec Nöupatrîs von Oraste Gentesîn wart mit speren roerîn manlîche dâ gerochen. sô diu sper wârn zebrochen,
25	der trunzûn schilt noch harnasch meit: des rôres scherpfe beidiu sneit. swer solhe tjoste wolde urborn, der bedorfte wol der sporn, und daz ûz dem kalopeyz
30	von rabîn waer sîn puneyz.
363	Des küneges her von Kânach man sô bî Halzebiere sach, ir strît tet den getouften wê. ir hêrre, der künec Galafrê,
5	dem von Vivîanzes hant sîn werlîch sterben wart erkant, hôhe fürsten, sîne man, die gedâhten nu dar an: ir râche gap dâ sterbens lôn.
10	von Sêres rois Eskalibôn, dem ouch der junge Vivîanz sîn leben nam ûf Alitschanz, der wart mit maneger tjost geklagt, und ouch mit swerten, sô man sagt.
15	die von Boctâne wol striten ûf dem plâne under Halzebieres vanen: sine dorfte niemen râche manen umb ir hêrren Thalimônen:
20	sine kunden niemens schônen. do enphienc des schêtîses her von den gesten über mer grôzen kumber schiere: der sînen soldiere
25	und der massenî von Tandarnas wart vil gevellet ûf daz gras. Halzebier dâ selbe streit: swaz der getouften im gereit, die nâmn von sîner hende
30	ûf den gotes solt ir ende.
364	Nu kom rois Tîbalt von Cler mit wol geflôriertem her, unt des sun von Todjerne. si kêrten dâ der sterne
5	schein ûz des marcrâven vanen. Ehmereiz begunde manen künege unde fürsten gar, die dâ riten an sîner schar, daz si gedaehten an ir prîs,
10	si kêrten an den markîs. die stolzen Franzoyse fürriten die Arâboyse, die zuo srîches vanen wârn geschart. der starke junge Rennewart
15	ûf der heiden orsen sach von pfellen manec tiwer dach. Tybalt und die sîne, Ehmereizes Sarrazîne fuorten an ir lîben
20	des man danken sol den wîben. bî Ehmereizes kursît der heide glanz ins meien zît mit touwe behenket an prîse waere verkrenket:
25	sô clâr was er gemachet, daz die bluomen waern verswachet. der pfellel hiez pôfûz. al sîniu eier het ein strûz derbî wol ûz gebrüetet,
30	waerns anders wol behüetet.
365	Gybôez der schahteliur von Cler pflac des vanen in Tybaldes her. dô der gehôrte unde ersach wie man dâ sluoc unde stach,
5	in müete daz sîns hêrren schar niht streit vor den andern gar, wand er wol strît getorste tuon. Trohazzabê von Karkassuon Ehmereizes vanen fuorte,
10	des herze nie geruorte sölch site dâ von ein man verzagt: der wart nie von im gesagt. swelhes tages er keinen vîent sach, bî vriunden het er ungemach,
15	sô si die vanen geneigten unt ze bêder sît erzeigten die helde dar unde, wer getorste und kunde lîp und êre aldâ gewern
20	und ûf sîn selbes verch gezern. nu hoert waz Rennewart nu tuo. wackerlîchen greif er zuo, er sluoc beidiu ross unt man, wand er sich rehte niht versan
25	gein wem erz solte wâgen: dô sô tiwer pfellel lâgen ûf der heiden râvîten, er wânde solde strîten mit den orsn als mit den liuten.
30	ine mac niht wol bediuten
366	Wie dâ wart gefohten, manec poynder geflohten hurteclîchen in ein ander. daz werc von salamander,
5	ist iht wîzers danne der snê, het ich daz gehoeret ê, sô möht ich wol gelîchen dar daz Tybalt an im hête gar. salamander was sîns schildes dach,
10	swaz man an im obem îser sach, kursît und kovertiure: ân der wîbe stiure was sîn wâpenkleit mit kost. er was selbe ouch gein der tjost
15	für komen ûf dem plân. der grâve von Schampân, der hôch gemuote Schampânoys kom gein dem milten Arâboys, Gandalûz der fürste rîche.
20	mir ist gesaget, rîterlîche wart dâ diu tjost von in getân, des si bêde prîs müezen hân. innen des streit Ehmereiz. Tybaldes grôzer pungeiz
25	was niht volleclîchen komn her nâch, die den man rotte jach, amazûre und eskelîre. zwischen Wîzsant und Stîre niht sô manec rîter wâpen tregt,
30	sô Tybalt het ûf ze orse erwegt,
367	Die von sîn eines ringe riten ûf den gedinge daz Gyburc diu künegîn dannoch ir vrouwe müese sîn,
5	daz si phant dar umbe erwurben oder bî ir hêrren ersturben. nâch phande durch âventiur Gybôez der schahteliur mit dem vanen punierte:
10	manlîch er kundewierte die nâch Gyburge striten, daz si mit hurte kômn geriten. si wânden daz rois Lôys dâ waere durch den markîs.
15	dâ wart unverdrozzen durchriten und umbeslozzen von Sarrazîn des rîches schar. sich samelierten dicke dar aber die Franzoyse widr
20	und valten manegen rîter nidr. der herzoge Trohazzabê was an die Franzoyser ê mit Ehmereizes vanen komn. dâ wart Ehmereiz genomn
25	in den zoum und dan geleitet ûz. der tiure phellel pôfûz gap gein der sunnen sölhez prehen, daz des küneges kumber muosen sehen diu fluot der Sarrazîne:
30	doch beschutten in die sîne.
368	Manec unverzaget kristen hant dâ wurben umbe sölhiu pfant die Berhtram möhte machen quît dâ warp ouch Ehmereizes strît
5	nâch phande umb die diu in gebar. dô kom Synagûn mit schar, der punjûr und der stanthart. oug noch ôr nie innen wart daz sîn herze ie'nphienge wanc,
10	daz er gelernete den gedanc der sich dem prîse virret. er was des unverirret, sîn hant, sîn swert, sîn lanze het im die drî schanze
15	dicke ertoppelt sêre, und anders manec êre. ein schanze daz was miltekeit, diu ander ellen swâ er streit, diu dritte manlîch güete.
20	sus stuont sîn gemüete. von im seit d'âventiure mier, sîn ors hiez Passilivrier. daz was snel und trachenvar, als im mit fiwers vanken gar
25	gefurriert waeren sîniu mâl: ez gienc mit sprungen sunder twâl under im vor sîner schar. swelh wîp in hête dar mit ir werschaft gesendet,
30	ir bote was ungeschendet.
369	Von Bailîe Sînaguon, der künec getorste wol getuon daz scharpfer strît ist noch benant: dâ für sîn manheit was bekant.
5	er kêrte ouch gein der herte, dâ lîp und êre werte und Gyburge minne und des landes gewinne der marcrâve als er kunde,
10	und Arnalt von Gerunde: die zwêne heten eine schar. Synagûn strebte allez dar da der sterne mit sîm glaste sô rîlîchen vaste
15	ûzes marcrâven vanen schein. dâ für habe daz iwer dehein, daz ez der sterne waere von dem man sagt daz maere, der die drî künege leite:
20	dirre stern alhie bereite vil tjost die Sarrazîne. Synagûn, der manege pîne durch wîbe grüezen dolte, ein tjost ze vorderst holte
25	ûf Passilivrier: daz ors was sneller denne ein tier. ein grâve ûz Arnaldes lant (Gyffleyz was der genant) die tjost von dem künege nam
30	als ez in bêden wol gezam.
370	Dô Synagûn kom mit scharn gein dem markyse gevarn, bî der zweir schar houbetman wart sô mit rîterschaft getân,
5	dês got sol danken und diu wîp. manec hôchgemüetic lîp und doch niht vor jâmer vrî, die riten Synagûne bî, die rehten jâmers tag erkurn
10	dô si hêrrn und mâge verlurn. daz selbe ouch dise klageten; dâ von si bejageten ze bêder sît noch flüste mêr und aber niwe herzesêr
15	von den diez tuon getorsten. man hôrt ûz manegen vorsten den walt dâ sêre krachen. die sper kunden machen, die waeren nütze dâ gewesen:
20	si mugen ab sus vil baz genesen dâ si die schefte schiften drîn: soltens in dem puneiz sîn, ir wurde minr von in geworht. manec rîter unervorht
25	ûz sehs künege landen sich bewarten dâ vor schanden. Synagûns geselleschaft von manegem fürsten hête kraft, der flust an sîme hêrren kôs
30	und ouch sich selben nu verlôs.
371	Dâ tet vil scharpfer râche schîn daz her ûz Naroclîîn umbe ir hêrrn rois Tampastê: und daz her ûz Falturmîê,
5	daz Turpîûn brâhte dar, wol streit in Sînagûnes schar. wol râchen Fausabrên aldâ die fürstn ûz Alamansurâ, den Terramêrs swester suon.
10	da getorste ein her wol râche tuon, des milten Turkandes und des süezen Arfiklandes: von Turkânîe wâren die. des sehsten künec ich nenne hie,
15	des her bî Synagûne ouch reit und wol gein den getouften streit, von Ingalîe Poufemeiz, von dem dise âventiure weiz daz sîn jugent, die wîle er lebte,
20	ie nâch hôhem prîse strebte. die getouften muosen kumber doln und diu zweir slahte lôn erholn. die ir leben dannen brâhten, werdiu wîp in lôns gedâhten:
25	die aber dâ nâmn ir ende, die fuoren gein der hende diu des soldes hât gewalt, der für allen solt ist gezalt. diu selbe hant ein voget ist
30	unde ein scherm fürs tievels list.
372	Ine mac niht wol benennen gar an den ruoft der heiden sunderschar, waz si kreiierten sô si pungierten.
5	Munschoy wart ouch dâ niht verdagt. nu kom manlîch und unverzagt Gyburge bruoder alle zehn. hôhe küneg nâch grôzem lêhn reit bî Terramêrs kinden vil,
10	und esklîre an der fürsten zil, und emerâle ungezalt. alrêrst nu donret der walt von lanzen krache und der sper. dâ kom in galopeyze her
15	von den zehen künegen jungen manec storje umbetwungen von aller zageheite: hôchmuot was ir geleite. Bernart von Brubant,
20	der ie genendic was bekant, und Buove von Cumarzî, die riten einem vanen bî. Fâbors von Meckâ kom für durch tjostieren dâ:
25	Glorjax, Malarz und Utreiz kom vor dem grôzen puneiz. die geflôrten künege viere, iu enmöhte niemen schiere ir zimierde benennen:
30	die muost man tiure erkennen.
373	Der starke grâve Landrîs bürt den vanen hôh durch sînen prîs. der herzoge Bernart mit grôzem poynder ungespart
5	kêrte gein den kinden: er wolte gîsel vinden für sînen sun Berhtram. die tjost von Fâbors er nam, unde greif in in den zoum.
10	daz ors truoc einen werden soum, daz Bernart zôch an der hant: in dûhte, er hete gaebez pfant für sîne mâge und für den suon. waz mugen die Sarrazîn nu tuon,
15	si beschüten Fâborsen? allez sîn flôrsen ûf helme und ûf kursîte wart von des poynders strîte mit swerten gar zerhouwen,
20	er kouftz odz gaeben vrouwen. hurtâ, wie die getouften borgeten und verkouften mangen wehsel âne tumbrel. etslîches wâge was sô snel,
25	daz sin sancte nidr unz in den tôt. ze bêder sît si dolten nôt, Sarrazîne und ouch die kristen. dane kunden niht gevristen des werden Buoven hende
30	der heiden hôch gebende.
374	Diu kint sint dâ bestanden von den die ûz banden gerne lôsten Gybelîn, Berhtramen und Gaudîn,
5	mit andern ir mâgen, die dâ gevangen lâgen. daz wart versuochet sêre. nu sult ir Terramêre danken, daz er ê beriet
10	sîniu kint mit wer die niemen schiet von in mit den swerten. die selben ouch dâ gerten râche um daz in was getân. Arofel der Persân
15	was in ûf Alitschanz erslagn. die sîne begunden in dâ klagn mit den ekkn und mit dem dône. ir krîe Samargône in manegem poynder wart geschrît:
20	Arofels wart in dem strît von den sînen manlîch gedâht, der si selbe dicke hête brâht an die vînde werdeclîche. ûz Arofels rîche
25	vil fürsten dâ mit kreften sint: sîn selbes darbten doch diu kint, wand er ir ander vater was. weder starp noch genas getriwer künec nie dehein,
30	den tages lieht ie überschein.
375	Dâ wart manec helm versniten von den die manlîche striten bî Terramêrs kinden. sölch suochen unde vinden
5	was dâ ze bêder sît genuoc: ein poynder stach, der ander sluoc. turkople wurdens ouch enein, von in wart manec slehter zein durch den schuz unz an den phîl gezogn:
10	da begunden snateren die bogn sô die storche im neste. dô der strît scharpf und veste was ûf dem plâne, Poydjus von Griffâne
15	dâ kom mit hers flüete (die getouften got behüete!), der ouch künec dâ ze Frîende was: Tasmê, Trîande und Kaukasas dienden sîner hende gar.
20	sus kom mit krefteclîcher schar Terramêrs tohter sun. sînen vanen fuorte Tedalûn, der burgrâve von Tasmê. über den walt Lignalôê
25	der selbe ouch forstmeister was: er hete den slac an Kaukasas, den zehndn an manger wilden habe. swaz dâ goldes wart gezerret abe von der grîfen füezen,
30	daz kund im armuot büezen.
376	Dâ wart von Poydjuses schar daz velt wol überliuhtet gar von manegem pfellel tiure: von sunnen noch ûz fiure
5	dorfte groezer blic niht gên. man moht an sîme her verstên daz er dâ heime rîcheit phlac, wand in grôze kosten ringe wac, Poydjus. der selbe truoc
10	an sîme lîbe des genuoc, daz ich der kost niht tar gesagen: sus kan mîn armuot verzagen. ob ers geruocht, ein rîcher munt solt iu diz maere machen kunt,
15	wie sunder was gazierep, iip kost ah q¢berwieret, daz dach ob sîme harnasch. ander kost dâ bî derlasch. von den füezen unz anz houbet,
20	niemen mirz geloubet, waz er hete an sîme lîbe. ob im von guotem wîbe solh zimierde wart gesant, ob daz gediende niht sîn hant,
25	het er ir minne künde, dâ mite erwarb er sünde, tet er durh si niht sölhe tât die man noch für hôhez ellen hât. Poydjus der künec unervorht,
30	sîn helm mit listen was geworht
377	ûz dem steine antraxe. grôz koste ringe wac se, sîn volc hôchmüetic unde gogel. nu seht, ob funde ein antvogel
5	ze trinken in dem Bodemsê, trünkern gar, daz taet im wê. sus prüeve ich Poydjuses her, daz dar kom über daz fünfte mer: soltens alle ir rîcheit
10	hân gelegt an ir wâpenkleit, sô möhten d'ors si niht getragn. von Frîende hoer ich sagn, swaz man in dem lande der wazzer bekande,
15	die dâ vliezent von Kaukasas, ieslîchez gefurrieret was mit edelen steinen maneger slaht: eteslîcher tagete bî der naht mit sîme liehte daz er gap.
20	maneger rîcheit urhap het der künec von Griffâne: guldîne muntâne im dienden. stüende sô mîn muot, ich möht ein loubînen huot
25	wol erwerben inme Spehtshart, so der meie waere rehte bewart mit touwe und süezem lufte: wer jaeh mir des ze gufte? iht mêr daz Poydjusen wac,
30	swenne er grôzer koste phlac.
378	Ob sich der walt nu swende von den von Frîende, von tjost ûf dem plâne, und von den von Griffâne,
5	des hât ir rîcheit êre. in truoc wol vor die lêre grôz her daz zuo zin was geschart, vor aller zageheite bewart. die Gyburge ze Oransche vride
10	gâbn, die ruorten hie diu lide: si dûhte, ir strît hête prîs nu gein der kumft des markîs. daz was Thesereizes her, der ie gein schanden was ze wer,
15	unt dem diu minne nam den lîp. noch solten gerne guotiu wîp mit triwen âne wenken sîner werdekeit gedenken, sît daz sîn herze nie verdrôz,
20	sîn dienest waer gein in sô grôz, daz vor andern sînn genôzen was gezilt und gestôzen sîn hôher prîs sô verre für: bî sîner zît an lobes kür
25	man jach dem stolzen Latriseten daz er gewünne nie geweten der im sô geziehen möhte dazz gein sînem prîse iht töhte. er vlôs ouch wîbe hulde
30	nie mit valschlîcher schulde.
379	Durch rîcheit unde ouch sus durch ruom ûz mangem wîten herzentuom und ouch von maneger marke Poydjus der starke
5	manegen fürsten fuorte, der her die hende ruorte dô si kômen in den strît; des in nu widerwehsel gît Bertram und Gybert:
10	die sint noch strîtes ungewert. hurtâ, waz in nu strîtes kumt! wie ze bêder sît dâ wart gevrumt trunzûne sprîzen in den luft, durh wîbe lôn od sus durch guft!
15	daz tâten tjostiure. weder vert noch hiure, wil ich der wârheite jehen, sone hân ich ninder gesehen sô manegen gezimierten man
20	sô guote rîterschaft getân. war umbe solt ich des verzagn? ich getarz als wol gesagn, sô si den strît getorsten tuon. der goldes rîche Tedaluon,
25	von Lignalôê der fôrehtier, fuorte ecidemôn daz tier, des Feyrafîz ze wâppen pflac: in Poydjus vanen daz lac, mit grôzer koste dar gesniten.
30	der vane mit hurte kom geriten
380	In des küenen Tedalûnes hant. der warp nâch Gyburge umbe pfant, diu sînes hêrren muome was. ze bêder sît wart ûfez gras
5	manec rîter dâ gevellet. die schar hânt sich gesellet mit hazze zein ander. swer daz suocht, daz vander, ein puneiz slac, der ander stich.
10	nâch Vivîanze wart gerich von dem kristen her erzeiget, der nimmer sô geveiget daz sîn lop müg ersterben. swer saelde welle erwerben,
15	der sol dich êren, Vivîanz. vor got du bist lieht unde glanz. wie mich dîn tôt erbarmet, swie doch nimer erwarmet dîn sêle in hellefiure!
20	sölh kumber ist dir tiure, du sun sîner swester, Berhtrams von Berbester, und des manlîchen Gybert. des wart erklenget manec swert
25	von ir zweier massenîe. hêrre und âmîe sölhes strîtes solten lônen, op si triwe kunden schônen, der dâ ze bêder sît geschach,
30	als uns diz maere wider jach.
381	Dâ lac vil sper zebrochen. dâ wart ouch wol gerochen an der selben wîle der clâre süeze Mîle
5	al nâch der heiden herzesêr, den der hôhe rîche Terramêr mit der tjoste sluoc ûf Alyschans: der was muomen sun Vivîans. si begiengen an den liuten,
10	ob si stocke solten riuten, sine dorften harter houwen niht. den getouften henden man des giht, von Frîende ab den gesten ir tiweren pfellel glesten
15	manec swertes ekke aldâ begôz, dazz pluot über die blicke flôz: si wurdn almeistic rôt gevar. der getouften schûr nu kom mit schar, von Ganfassâsche Aropatîn.
20	swaz junge und alt dâ mohten sîn durh got und durh der wîbe lôn und durh des sun von Narbôn, wol hete Aropatîn gestritn (mit sölher kraft er kom geritn)
25	al des marcrâven helfe. nu müeze in als Welfe, dô der Tüwingen ervaht, gelingen aller sîner maht: sô scheit er dannen âne sige.
30	alsus ich sîn mit wunsche phlige.
382	Ich waene, alsus ergêt ez doch. in sînem vanen stuont ein roch: daz bedûte sînen wîten grif, daz im diu erde unt diu schif
5	volleclîche gâben rîchen zins. zwischen Gêôn und Poynzaclîns diu lant wârn dem jungen dienstlîch gar betwungen; dar zuo sîn houbet krône
10	vor manegem fürsten schône von arde in Ganfassâsche truoc: des het er rîter dâ genuoc. waz busîn vor im erklanc! wie man vor im ûf mit künste swanc
15	manec rotumbes mit zunel! dâ wârn ouch floytierre hel. sîn schar, des künec Aropatîn, mit koste geflôret muoste sîn mit maneger sunderzierde.
20	in selben kondewierde sîn manlîch herze und des gedanc, daz er nâch wîbe gruoze ranc: er fuor ir lône ouch wol gelîch. nu was der alde Heimrîch
25	mit sîner krefteclîchen schar strîts dannoch erlâzen gar. Mit Aropatîne was aldâ der künec von Scandinâvîâ und der künec von Ascalôn.
30	die kômn an den von Narbôn,
383	des küenen marcrâven vatr. die sîne gein dem strîte batr, als ers ê dicke het ermant. dâ von wart harnasch zetrant
5	mit tjost von maneger lanzen: vil schilde der ganzen wurden dâ zerfüeret, manec helm alsô gerüeret daz diu swert derdurch klungen.
10	Aropatîn den jungen sus enpfiengen die von Narbôn, und den stolzen künec Glorîôn, und den staeten Matribleiz, mit manegem starken puneiz.
15	den von Ganfassâsche Mahmeten karrâsche mac lîhte sîn ze verre: seht ob in daz iht werre. dâ streich der alte Heimrîch
20	mit swerten den wiserîch, der im dicke was gewerbet. der alte hete gerbet sîne süne mit sölhen urborn: sît er ze sune het erkorn
25	einen andern denn die sîne, des gâben unde nâmen pîne in andern landen sîniu kint. die von Ganfassâsche sint in kumber mit der mêrren kraft
30	von Heimrîches geselleschaft.
384	Seht ob der rîche Aropatîn strîts gewert müge sîn. er het ouch dâ besunder mit der zal der storje ein wunder.
5	sîn hôhez herze in lêrte daz er selbe kêrte immer swâ diu herte was. blanke bluomen und daz grüene gras wurden rôt von sîner slâ.
10	daz her ûz Scandinâvîâ wol streit, und daz von Ascalôn. man hôrt dâ manegen kraches dôn, swa der grôze puneiz ergienc. swem dâ schilt ze halse hienc,
15	der in ze rehte fuorte durh den stoup unz in die huorte, schildes ampt er tet sîn reht. ûf Alischanz dem velde sleht sölh strît mit swerten geschach,
20	swaz man von Etzeln ie gesprach, und ouch von Ermenrîche, ir strît wac ungelîche. ich hoer von Witegen dicke sagn daz er eins tages habe durchslagn
25	ahtzehen tûsnt, als einen swamp, helme. der als manec lamp gebunden für in trüege, ob ers eins tages erslüege, sô waer sîn strît harte snel,
30	ob halt beschoren waern ir vel.
385	Man sol dem strîte tuon sîn reht: dâ von diu maere werdent sleht. wan urliuge und minne bedurfen beidiu sinne.
5	einz hât semfte unde leit, daz ander gar unsemftekeit. swer wîbe lôn ze reht erholt, eteswenne er grôzen kumber dolt: ob denne der minne süeze
10	sölhen kumber büeze, swâ der site wirt begangen, dâ ist der minne solt enphangen. Heimrîch der alde fürste wol was in der getürste
15	daz er den jungen minne riet. mit sîme râte nie geschiet von wîbe gruoze werder man. von den sînen wartz dâ sô getân, solt ez ein keiser gelten,
20	sölhe soldier funde er selten, die sich schüben in sô starke nôt werlîche an der wîbe gebot. dâ was gemezzen niht der vride. die sîne'rswungen wol diu lide
25	gein maneger krî die man dâ schrei. von Kizzingen ein turnei het unhôhe aldâ gewegn: man muoses dort anders pflegn mit den ekken bluotvar.
30	ze bêder sît die helde gar.
386	Ane gevaterschaft dâ sint. nu was Matusaleses kint, der minne gerende Josweiz, zorse komn. des puneiz
5	was von maneger storje starc. beidiu heide unde sarc wart getrett al gelîche. Matusales der rîche. mit kraft ûz sande sînen sun
10	von Hippipotiticûn. ein fürste fuorte sînen vanen: dar inne sah man einen swanen, gesniten mit kosteclîchem vlîz. der swan was anderswâ al wîz,
15	wan snabel und füeze rabenvar; durh daz, Matusales was gar an velle unde an hâre blanc: ein Moerinne ûz Jetakranc Josweiz bî im gebar.
20	der swan ist zweier slahte gevar: alsô was ouch Josweizes art: durch daz die selben hervart Josweizes dern swanen truoc, und landes hêrrn mit im genuoc
25	mit dem wâpen was bevangen. ze halse gehangen zwelf fürsten sîne schilte truogen durch sîn milte, durch rîchtuom und durch edelkeit.
30	selbe fümfte künege er dâ zuo reit.
387	Josweiz von Amatiste, mit kostlîchem liste was sîn schilt, sîn helm, sîn kursît. diz maere giht daz gein dem strît
5	in twunge hôhiu minne. het ich nu die sinne, daz ich sîner clârheit, sîner jugent, sîner milte und ander sîner tugent gespraeche ir reht, sît âne vâr
10	sô stuonden sîner zîte jâr daz sîn herze was genendec! sîne schar ouch wârn unbendec: ez wart sô sêr von in gestrebt. ir decheiner doch bî mir nu lebt,
15	dem ichz ze liebe kôse. der künec von Valpinôse mit den sînen ûz der schar dâ brach. nâch dem künege man dô varen sach von Janfûse Korsant.
20	nâch dem künec fuor al zehant von Nourîente Rubbûâl. nâch dem künege fuor dô sunder twâl der stolze künec Pohereiz mit krefteclîchem puneiz:
25	der was von Ethnîse und warp dâ wol nâch prîse. dar nâch fuor dô Josweizes schar, al die sîn mit swerten bar: sît die tjoste wârn von in verlegn,
30	der sper wolt ir decheiner phlegn.
388	Josweizen müete sêre daz er Terramêre gevolget hete, daz sehs schar vor im gestriten hêten gar.
5	mit zorne er fuor bî sînem vanen: ob im man sah den tiweren swanen blicken wîz sô den snê. er kêrte dâ Trohazzabê ob Ehmereize was verladn.
10	dâ heten ungefüegen schadn die stolzen Franzoyse gein Tybalde dem Arâboyse und gein Ehmereize begangen. Rennewart mit sîner stangen
15	sich selben het ergetzet, daz er dicke was geletzet manger wirde in Francrîche. er tet wol dem gelîche daz er der heiden hête haz.
20	swer im dâ zorse vor gesaz, zeime hûfen er den sluoc. da beleip der heidenschaft genuoc tôt von Rennewartes hant. er warp niht anders umbe phant:
25	Berhtram was im sippe niht. Rennewarten man dort siht vor sînen schargenôzen. mit starken slegen grôzen Franzoyser wurdn ouch niht gespart.
30	si begunden schrîen Rennewart,
389	si wolden fristen gerne ir lebn. daz herzeichen was in gegebn, dô si der markîs scharte und des rîches vanen bewarte.
5	Franzoysen wart dâ kumber kunt. waerens über Pitît punt mit gemache heim gevarn, sone waern si mit sô manegen scharn sô ungefuoge niht getrett.
10	dâ wart Ehmereiz errett, und rois Tybalt von Cler, von des stolzen Josweizes her. der soltz ouch pillîche tuon: Josweizes pasen tohter suon
15	was der künec Ehmereiz. sîns rîchen mâges puneiz was im dâ ze staten komn. dâ wart gegeben und genomn donrs hurte als diu wolken rîz.
20	nu kom von Raabs Poydwîz, der manlîch und der hôh gemuot: der fuorte manegen rîter guot. wir hoeren von sîm ellen jehen, er wart bî vînden nie gesehen,
25	ern schiede ouch dan geprîset. manec tjost in hete gewîset dâ sîn volliu hant wart laere. zeinem forstaere kür ich ungerne sîne hant,
30	sît der walt sô vor im verswant.
390	Man tuot von sînen tjosten kunt, der Swarzwalt und Virgunt müesen dâ von oede lign. daz liegen solt ich hân verswign,
5	beginnt etslîcher sprechen: wan lât der selbe brechen den walt einen andern man? und habe er verre dort hin dan. der künic Poydwîz von Raabs,
10	weder stapfes noch drabs kom er gevarn in den strît: er fuor rehte als man dâ gît den orsen wunden mit den sporn. in was ûf Terramêren zorn,
15	daz er in nâch siben scharn alrêrst nâch rîterschaft hiez varn. er sprach 'het ich nie strît getân, ich füer sô manegen werden man ûz anderr künege rîchen,
20	daz ich pillîchen den buhurt solte hân erhabn. man darf mich harte wênic labn nâch maneger quatschiure, die ich durh âventiure
25	in dem puneiz solte hân genomn. ich bin ze disem strîte komn sô der schûr an die halme.' von pusînen galme was vor im grôz gesnarren.
30	dane kunde niht geharren
391	Sîn vane mit grôzem kundewiers kom gevarn ze triviers mit ungefüeger hers kraft beneben an die rîterschaft,
5	dâ mit strîte ê sêre was gekrîet und noch enwederthalp geswîet. dâ was versperret niht diu biunt: dâ wart der vîent und der vriunt mit volleclîcher huorte,
10	dâ Poydwîz in ruorte, vast ûf ein ander geschobn und manec puneiz enzwei geklobn. dâ nam von Poydwîzes druc al daz her sô grôzen ruc,
15	daz die kristen und die heiden gar gedigen alle zeiner schar, swaz ir dâ was ze bêder sît, die wâppen truogen ime strît, swaz man der dâ wesse,
20	als obs in einer presse zesamne waern getwungen, die alte mit den jungen, rîch und arme über al. daz was ein wîter nôtstal,
25	mit swerten verrigelet, manec lebn (wart dâ) übersigelet mit des tôdes hantveste. von strîtes überleste dâ mohte maneger sprechen.
30	dâ was slahen und stechen
392	Und hurteclîchez dringen. si kunden sich baz bringen zein ander denne ichz künne sagn: decheinen haz wil ich dem tragn,
5	swerz iu baz nu künde. seht wie des meres ünde walgen ûf und ze tal: sus fuor der strît über al, hie ûf slihte, dort ûf lê.
10	si dolten ach unde wê, die mit Poydwîz kômen in den strît, driu her den man vil prîses gît. daz eine der künec Tenabruns brâhte ûz Liwes Nugruns:
15	des küneges her von Rankulat mit swerten hiew dâ manegen phat: und diu rîterschaft von Azagouc, daz dritte her, niht râche louc umb ir hêrrn den künec Rubîuon.
20	waz mugen die kristen liute tuon, sine weren sich al die wîl si lebn? got selbe mac in trôst wol gebn. Poydwîz kom in alze vruo: ir her nam ab und ninder zuo.
25	diu kristenheit sich rêrte, diu heidenschaft sich mêrte ûf Alitschanz dem anger. ob ie her wart swanger, des möht man jehen der heiden schar:
30	ob einiu de andern niht gebar,
393	So ist wunder wanne in koem diu fluot, diu sô grôze rîterschaft dâ tuot. der strît begunde vellen etslîchem sînen gesellen,
5	disem den hêrren, dem den mâc. waz hers ze bêder sît dâ lac, die von dem strîte töuten! wie si den orsen ströuten mit manegem gezimiertem man!
10	diu waerns dâ heime wol erlân: dâ sint diu müeden ors vil vrô, der wirfet undrs ein trucken strô. waz wunder ors dâ nidr sign! etslîchez wolde ûf fürsten lign,
15	etslîchez ûf dem amazûr. Poydwîz was nâchgebûr dâ worden der kristenheit; mit den man ê doch vaste streit: sîn strît si dorfte lützel müen.
20	nu alrêrst sah manz velt erblüen mit rîterschaft der werden, als ob gâhes ûz der erden wüehs ein krefteclîcher walt, dar ûf touwec manecvalt
25	sunder clâre blicke. breit lang und dicke kom diu schar des künec Marlanz von Jericop mit zierde glanz und mit maneger sunderrotte.
30	dô der keiser Otte
394	Ze Rôme truoc die krône, kom er alsô schône gevarn nâch sîner wîhe, mîne volge ich dar zuo lîhe
5	daz ich im gihe des waere genuoc. âvoy wie manegn rîter kluoc der künec Marlanz brâhte! niht ze sêre er gâhte: in dûhte, er hete wol erbiten
10	der die vaste vor im striten: wie siz heten überhouwen, daz wolt er gerne schouwen. der zimmerman muoz warten wie er mit der barten
15	nâch der ackes müeze snîden: daz wolt ouch er niht vermîden. Poydwîz al anders fuor: er kunde wênic nâch der snuor houwen nâch ir marke.
20	ob der getouften sarke nu mit starken huofslegn iht wol getretet werden megn? jâ für wâr, ê daz diu schar mit ir poynder voldrucke gar,
25	des künec Marlanz von Jericop. sîn manheit dâ gediente lop. unsamfte ich mac der sunnen sô liehtes plickes gunnen, alsô dâ heten die sîne
30	von ir zimierde schîne
395	Ab ir tiuren pfellelmâlen. niht langer wolde twâlen der künec von Orkeise: der bezzerte die reise,
5	daz was Margot von Pozzidant, den man gezimieret vant ein jumenten rîten, dar ûf er wolde strîten, mit îserkovertiur verdact.
10	ûf daz îsern was gestract ein phellel, des ir was ze vil. der orse muoter man niht wil sô hie ze lande zieren: wir kunnen de ors punieren.
15	Margot ein künec dar brâhte, dem daz niht versmâhte. al des her âne ors dâ was: der hiez Gorhant von Ganjas: si wârn ab sneller sus ze fuoz.
20	die tâten inme strîte buoz des lebens manegen kristen man. niht ander wâpn si mohten hân: ir vel was horn in grüenem schîn: die truogen kolben stähelîn.
25	bî dem künege Margotte fuor diu hürnîn grôziu rotte: der was geschart zuo Marlanz. diu schar beleip niht langer ganz. Margot der verre komende dar,
30	er unt die sîn punierten gar,
396	E si den puneiz vollen tribn, dâ von daz velt begunde erbibn. nu kumt dem zwickel hie sîn schop, da der künec Marlanz von Jericop
5	mit hurteclîches poynders kraft sich stacte in die rîterschaft, dâ von diu swert erklungen. was ê dâ vil gedrungen, doch niwes gedranges phlâgen sie,
10	beide dise unde die. bî rois Margot von Pozidant streit daz her des künec Gorhant mit den stähelînen kolben. die virste und die wolben
15	begundens ûf die helme legn mit starken ungefüegen slegn. ich hete ungerne hiute sölhe zimmerliute: ine möht in niht gelônen.
20	vil krîe ûz manegen dônen si schriren ûz maneger sprâche. nu mac die vart hinz Ache mit êren mîden Terramêr. al meist die roemschen fürsten hêr
25	sint gein im komn ûf Alitschanz. si woldn im künden, Vivîanz und der edele Mîle waern erslagn: wolt er ze Rôme krône tragn, sô solt er in daz rihten,
30	wolt er zir dienste phlihten.
397	Von den hürnînen schalken wart mit kolben dâ gewalken vil manec werlîch rîter guot. wie möht ein Bernhartshûser huot
5	harter ûf ein ander komn? des twanc si nôt: nu wart vernomn von den kristen liuten über al sehs herzeichen lût erschal. ein ir ruof was Narbôn:
10	sus hal dâ der ander dôn durch koverunge, Brubant: der dritte ruof was benant den Franzoysen, Rennewart (harte kleine was der zart
15	der gein in dâ begangen was): der vierde ruof was Tandarnas, Berbester was der fümfte gein Marlanzes kümfte: done moht diu schar des markîs
20	vermîden niht decheinen wîs, sine schrîten Muntschoye, in gedrange als ein boye von îser waere umb si gesmit. dâ wart mit swerten wol gewit.
25	die getouften kômen kûme mit den ekken sô ze rûme, daz si sich samelierten: die wol gezimierten ir brücke wârn übr bluotes furt,
30	etslîchr ûz Terramêrs geburt.
398	Die kristen sint zein ander komn. was denne, hânt si schaden genomn? si suln ouch schaden erzeigen nuo. dâ greif mit sîner stangen zuo
5	mit grôzen slegen Rennewart. die ê sunder wârn geschart, nu bî ein ander vâhten: die krî zesamen si brâhten, und der druc den in brâht Poydwîz.
10	maneger slahte sunderglîz die kristen müete dicke: der heiden pfellel blicke gein sunnen kunde vlokzen. der strît begunde tokzen,
15	als ûf dem wâge tuot diu gans. dâ muose daz velt Alitschans mit bluote betouwen. den hêrren und den vrouwen wart dâ wol gedienet beiden.
20	der houbtman al der heiden nu saz ûf Brahâne. gein der funtâne, dâ bî Vivîanz lac tôt, des endes sich der strît erbôt.
25	nu was diu schar ûz manegem lant über daz wazzer Larkant, und die karrâschen mit den goten. nu hete bî der wide geboten des küenen Kanabêus barn,
30	si solden bî den goten varn,
399	Die dar zuo wârn geschaffet. si wurden des dâ gaffet: Mahumet und Kâhuon in mohten kranke helfe tuon,
5	oder swaz man anderr gote dâ vant, ez waere Apolle od Tervigant. ôwê daz er nu komen sol, durch den diu sorclîchiu dol und daz angestlîche lîden
10	die getouften niht wil mîden! nu mein ich Terramêren, der wol nâch herzesêren den getouftten kunde werben. lât sîn: ê daz si ersterben,
15	er beginnt ouch schaden von in nemn, des jâmert und dar zuo muoz schemn sîn herze unde des gemüete. von sîner zehenden schar flüete möht ich prüevens wol gedagn.
20	doch müese er manegen zaphen tragn, der des regens zaher besunder verschübe: daz waere ein wunder. sus aht ich den von Suntîn. man mohte ietwederhalben sîn,
25	dar zuo vor im und hinden, vil grôzer storje vinden, mit der sprâche ein ander gar unkunt. dâ fuor manec sundermunt, der niht wesse waz der ander sprach,
30	ob er erge od güete jach.
400	Owê kristen liute, guoter wîbe getriute, und ir gruoz unde ir minne, und die hoehern gewinne
5	(ich mein die ruowe âne ende), wirt nu von maneger hende ûf iuch gestochen und geslagen! swer triwe hât, der solt iuch klagen. ir sît durh triwe in dirre nôt.
10	sît man von êrste iu strîten bôt, daz was gar um sus gestritn: ir habt nu rehtes strîts erbitn. hie kumt der von Tenabrî sînen goten nâhen bî.
15	dâ wart geworfen und geslagn, als ir mich ê hôrtet sagn, tûsent rottumbes sleht, ir keiniu krumbes: und aht hundert pusînen snar
20	man hôrte dâ mit krache gar. von dem bibn und von dem schallen möht daz tiefe mer erwallen. ich mac wol sprechen swenn ich wil, von grôzer kost zimierde vil
25	dâ fuor in Terramêres schar: sô unde sus gevar maneger slahte kunder nâch al dem merwunder hetens ûf gemachet,
30	an koste niht verswachet,
401	Nâch vogelen und nâch tieren. maneger slaht creigieren si brâhten mit in in den sturm. der truoc den visch, der den wurm,
5	ûf ir wâppenkleit gesnitn. diu schar mit kreften kom geritn ûf Alitschanz dem plâne. al die stein gâmâne sint niht sô manegen wîs gesehen,
10	sô man zimierde muose jehen, die de minne gernden truogen. die getouftens vil durchsluogen, swâ nâch ez gemachet was. nune dorfte der künec von Tandarnas
15	und der pôver schêtîs niht für gâhen durch ir prîs: swen ie sîn herze in strît getruoc, der fund dâ strîtes noch genuoc. von Salenîe Ektor
20	fuorte den vanen hôhe enbor; obs die getouften gerten, daz sin doch mit den swerten mohten niht erlangen. mit stählînen spangen
25	was der schaft vast umbeworht. Ektor was unervorht, der künec von Salenîe. Terramêrs krîe begunden rüefen Cordes.
30	ôwê nu des mordes,
402	Der dâ geschach ze bêder sît, dô der vane kom in den strît, der brâhte den grôzen swertklanc. dâ was von storjen manec gedranc
5	gein dem strît durch für komn; die doch heten wol vernomn, swer die schar dâ braeche, mit der wide daz raeche Terramêrs gerihte.
10	dâ wart des tôdes phlihte in dem strîte wol bekant. ze bêder sît si sazten phant diu nimmer mugen werden quît vor der urteillîchen zît,
15	dâ al der werlde wirt ir lebn wider anderstunt gegebn. dâ was manc sunder grâzen. swer si kan an gelâzen als ez der rîterschefte gezem,
20	mit mînem urloube er nem diz maere an sich mit worten, ime gedrenge und an den orten oder swâ die muotes rîchen riten, wie wurde aldâ von den gestriten
25	nâch wîbe lôn und umb ir gruoz, und wie ein puneiz den andern muoz nâch koverunge werben. swer nu lieze niht verderben dirre âventiure maere,
30	deste holder ich dem waere.

<<< Übersicht <<< vorige Seite nächste Seite >>>

Willehalm

Buch VIII

362

Diz kunden si ze bêder sît.

sus samelierte sich der strît.

die tjostiure ûz fünf scharn

und der schêtîs kom gevarn,

5

und der künec von Tandarnas,

und swer dâ mit in beiden was,

an den künec von Falfundê.

Halzebiere was vor jâmer wê

um Pînels tôt von Ahsim.

10

des manlîch her reit dâ bî im

geflôrt mit maneger koste:

der getouften tjoste

umb gelt wart von in genomn.

mit Halzebier was ze orse komn

15

der mêr, die tjoste ouch gerten,

die Gyburge werten

ze Oransche deheiner strîte:

an des marcrâven kümfte zîte

si dûhte, ir râche hête prîs.

20

der künec Nöupatrîs

von Oraste Gentesîn

wart mit speren roerîn

manlîche dâ gerochen.

sô diu sper wârn zebrochen,

25

der trunzûn schilt noch harnasch meit:

des rôres scherpfe beidiu sneit.

swer solhe tjoste wolde urborn,

der bedorfte wol der sporn,

und daz ûz dem kalopeyz

30

von rabîn waer sîn puneyz.

363

Des küneges her von Kânach

man sô bî Halzebiere sach,

ir strît tet den getouften wê.

ir hêrre, der künec Galafrê,

5

dem von Vivîanzes hant

sîn werlîch sterben wart erkant,

hôhe fürsten, sîne man,

die gedâhten nu dar an:

ir râche gap dâ sterbens lôn.

10

von Sêres rois Eskalibôn,

dem ouch der junge Vivîanz

sîn leben nam ûf Alitschanz,

der wart mit maneger tjost geklagt,

und ouch mit swerten, sô man sagt.

15

die von Boctâne

wol striten ûf dem plâne

under Halzebieres vanen:

sine dorfte niemen râche manen

umb ir hêrren Thalimônen:

20

sine kunden niemens schônen.

do enphienc des schêtîses her

von den gesten über mer

grôzen kumber schiere:

der sînen soldiere

25

und der massenî von Tandarnas

wart vil gevellet ûf daz gras.

Halzebier dâ selbe streit:

swaz der getouften im gereit,

die nâmn von sîner hende

30

ûf den gotes solt ir ende.

364

Nu kom rois Tîbalt von Cler

mit wol geflôriertem her,

unt des sun von Todjerne.