Buch der Natur

II. Von den himeln und

von den siben planêten.

___________________________________________________

28.

Von der zuosunnen.

Ez geschiht auch oft, daz uns der sunnen dunket mêr dan aineu. daz geschiht dâ von, daz under der rehten sunnen beseits sint gar dickeu wolken und daz diu sunne an etleichen dünnen stücken der selben wolken irn schein durchpricht und daz der warm schein dâselbs diu wolken umb und umb von im treibt in kraizes weise, reht sam ain sinbelz fensterlein in diu wolken gê, dâ diu sunne her durch scheint. wenn daz geschicht, sô dunket uns an der selben stat ain sunne sein. daz haiz wir ain zuosunnen, und geschiht ez an mêr steten, sô wirt der sunnen mêr denn aineu. diu zuosunne haizt kriechisch parelius.