Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

A. UND DES ÊRSTEN VON DEN DIU

DA GÊNT AUF ERDEN.

___________________________________________________

45.

Von dem hasen.

Lepus haizt ain has. daz ist gar ain vorhtig tier, dar umb suocht ez sein waid neur pei der naht und selten pei dem tag. Plinius spricht, daz die hasen nümmer vaizt werden. man spricht, daz diu wisel mit dem hasen schimpf und scherz unz der has müed werd, sô peiz si im dann den hals ab und frezz in. des hasen lung ist den augen guot, sô man si dar auf legt; aber wenne man si zereibet oder zestœzt und macht si fäuht, sô hailt si müed füez, der si dâ mit salbet. des hasen renne ist guot wider des leibes überfluz, der ze vil stüel hât. der has hât hinden lenger füez denn vorn, dar umb läuft er sänfter und palder ze perg wan ze tal. er slæft mit offenn augen. der has wirt haimisch, aber wenn er stætes still ligt und niht läuft, sô wehst auf seinen niern ain vaizten und stirbt.