Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

C. VON DEN MERWUNDERN.

___________________________________________________

8.

Von dem mertracken.

Draco maris haizet ain mertrack. daz ist ain grausam mertier und ist lanch und an der grœze sam ain rehter track, ân daz er niht flügel hât. der mertrack hât ainen knodohten swanz und hât ain klainz haupt nâch seiner grœzen. sein piz ist vergiftig paideu läuten und den vischen in dem mer. er hât prait flozzen an der flügel stat, dâ mit er swimt in dem wazzer gar snell und weiten vert. aber diu snellikait ist mêr von seiner sterken und von seiner kraft wan von den flozzen. der asch, der von seim pain kümt, ist guot zuo dem zantsiehtum. Pei dem tier verstên ich die pœsen puoben und die verræter und die ungetrewen schintvezzel, die habent knodocht swänz, wan si machent knoden an die gugeln und an die röck und umb und umb und frezzent die armen läut und werdent armen arbaitern nümmer holt.