| |
|
-
- D a s n a r r e n s c h y f f .
C I V . w o r h e y t v e r s c h w i g ē .
- __________________________________________
- Wer durch liebkosen vnd trouwort
Die worheyt setzet an eyn ort
Der klopft dem endkrist an der port
- worheyt verschwigē.
- Der ist eyn narr / wer wyrt zerstœrt
Inn sym gemüt / so man anfœrt
Vnd mit gewalt / jnn zwingen wœll
Das er die worheyt schwigen sœll
- 5
- Syn wißheyt vnder wægen lon
Vnd soll den weg der torheyt gon
Den der on zwiffel anhyn fert
Der sich an solche trouwort kert
Die wile doch got / vff syner sytt
- 10
- Ist / vnd beschyrmt den alle zyt
Der von der worheyt sich nit scheydt
Das er zů keyner zyt beleydt
Syn fűß / wer vff der worhyt blibt
Bald / der all vygend von jm tribt /
- 15
- Eyn wiß man statt der worheyt zů
Ob er joch sæch Phalaridis ků /
Wer nit kan by der worheit ston
Der můß den wæg der torheyt gon
Hett jonas worheit gkundt by zyt
- 20
- Der visch hett jn verschlucket nytt
Helyas hielt mit worheit priß
Dar vmb fůr er jnns Paradiß /
Johannes floch der narren louff
Dar vmb kam christus zů sym touff /
- 25
- Wer eynen lieplich stroffen důt
Ob ers joch nit hat glich für gůt
So würt doch ettwan syn die stundt
Da es jm zů verdancken kundt
Vnd grœsser dâck nymbt vmb stroff wort
- 30
- Dann ob er redt / das man gern hort
Daniel keyn liebdat nemen wolt
Als er Balthesar sagen soltt
Vnd jm die worheit legen vß
Dyn gelt blib (sprach er) jn dym huß
- 35
- Der engel hyndert Balaam
Dar vmb das er die gaben nam
Vnd wolt důn wider die worheyt
Des wart verkœrt als das er seyt
Der esel strofft den / der jn reyt /
- 40
- Zwey ding mag man verbergen nit
Zů ewig zyt sycht man das drytt /
Eyn statt gebuwen jnn der hœh /
Eyn narr / er stand / sitz / oder gee /
Sicht man doch bald / wesen vnd bscheit
- 45
- Worheyt sicht man jnn ewigkeyt
Vnd würt sich nyemer me verlygen
Wañ narren schon den hals ab schryen /
Worheyt ert man durch alle land
Der narren freüd ist / spott / vnd schand /
- 50
- Ich bin gar offt gerennet an
Wile ich diß schiff gezymberet han
Ich soll es doch eyn wenig færben
Vnd nit mit eychen rynden gærben
Sunder mit lynden safft ouch schmyerē
- 55
- Vnd ettlich ding ettwas glosyeren
Aber ich ließ sie all erfryeren
Das ich anders dann worheyt seyt
Worheyt die blibt jnn ewikeyt
Vnd würt eym vnder die ougen ston
- 60
- Wann nyemer wer diß büchlin schon /
Worheyt ist stercker dann all die
Mich hynder reden / oder sie
Wann ich mich hett gekœrt dar an
Ich můst byn grœssten narren stan
- 65
- Die ich jnn allen schiffen han
|
|