B  I  B  L  I  O  T  H  E  C  A    A  U  G  U  S  T  A  N  A
           
  Sebastian Brant
1458 - 1521
     
   



D a s   n a r r e n   s c h y f f .

C X I I .   D e r   w y ß  m a n .

__________________________________________


 
Von narren hab ich vß geseyt
Do mit man doch wiß recht bescheyd
Wer witzig sy / gantz vmb / vnd vmb
Der læß myn fründ Virgilium /



Der wyß man.

Eyn gůt vernunfftig / witzig / man
Deß glych man nit mœcht eynen han
In aller welt / als Socrates
Appollo gab jm kuntschafft des /
5
Der selb syn eygen richter ist
Wo jm abgang / vnd wißheit gbrist
Versůcht er vff eym næglin sich
Er acht nit / was der adel spricht
Oder deß gemeynen volcks geschrey /
10
Er ist rotund / gantz wie eyn ey
Do mit keyn frœmbder mackel blib
Der sich vff glattem weg anryb
Wie lang der tag jm krebs sich streckt
Wie lang die naht den Steynbock deckt
15
So gdenckt er / vnd wigt eben vß
Das jn keyn wynckel jnn sym huß
Betrűb / oder er red eyn wort
Das nit glych wæg vff alle ort /
Do mit nit fæl das winckel mæß
20
Io væst syg / wes er sich vermæß /
Sunder all anlouff mit der handt
Versetz / vnd bald hab abgewandt /
So ist jm nit so lieb dheyn schloff
Das er nit gdenck ver / vnd sich stroff
25
Was er den langen tag hab gthon
Wo übersehen er sich mag han /
Was er by zyt solt han betracht /
Vnd das zů vnzyt hab volbracht /
War vmb vollendt er hab diß sach
30
On zymlicheit / vnd all vrsach /
Vnd er vil zyt vnnütz vertrib /
War vmb er vff dem anschlag blib
Den er wol mœcht verbessert han /
Vnd nit den armen gsehen an
35
War vmb er jn sym gműt hatt vil
Entpfunden schmertz / vnd wider will /
Vnd war vmb er diß hab gethon
Vnd hab jhens vnderwegen gelon /
War vmb er syg so offt geletzt
40
Vnd hab den nutz für ere gesetzt
Vnd sich verschuldt mit wort / vnd gsicht
Der erberkeyt geachtet nycht /
War vmb er der natur noch heng
Syn hertz zů zůcht nit zych / vnd zweng /
45
Also bewært er werck / vnd wort
Vom morgen / biß zů tages ort /
Gdenckendt / all sachen die er důt
Verwürfft das bœß / vnd lobt das gůt
Das ist eyns rechten wisen můt
50
Den jnn sym gdicht / vnß zeychet vß
Der hochgelobt Virgilius
Wer also lebet hie vff erd /
Der wer by gott on zwifel werdt
Das er recht wißheit hett erkannt
55
Die jnn fűrt jnn das vatterlant
Das vns gott geben well zů hannt
Wünsch ich Sebastianus Brant

Deo gracias.