Das Liederbuch

Bl. 320r-320v (I, 93)

____________________________________________________________

Die vasenacht laszt vns mit fräden loben!

Es schadt nit, ob wir toben,

Die alten lebten auch also

Vnd wavren fro.

5

Mein trauren ist ercloben!

Mit rechter fräd bin ich gentzlich vmbgeben,

In fräden will ich streben.

Ich waisz wol, was mich fräen tůt,

Ain fräwlin gůt

10

Erfrät wir al‹s› mein leben.

Darnach komt vns die vast mit pitter gallen,

So dürr wir nymmer schallen,

Dann will ich ainen hailigen eren,

On als verker‹n›

15

Zu dem so will ich wallen.

Der hailig lebt vnd hat gewalt meins hertzen;

Mein frädenreiches schertzen

Macht als der selbig hailig an mir.

Mit lieber gir

20

Veriagt er all mein schmertzen.

Des hailigen genad hatt mich meins laids empunden,

Mein hertz zu allen stunden

Mit andacht will Im sein berait.

In stättikait

25

Hab ich ablas gefunden.

Mein hertz, mein můt, mein gůt, mein leib, mein leben

Dem hailigen ist ergeben

Ze aigen gantz, on alle rew,

Sein lieb, sein triu

30

Die ist mir allweg eben.

Es ist ain pild nach allem wunsch geschicket.

Da ichs von erst erplicket,

Mein hertz trůg ich ze opffer dar;

Mit triuer wavr

35

Bin ich zu Im bestricket.