Minnereden

Quelle:

Berliner Liederhandschrift mgf 922

(Berlin, Staatsbibliothek)

____________________________________________________________

24.

Lob der Frauen

Fassung III

[18ra]

So ho of ouch soe listen rych

de wuonde in heyl dier gelych.

eyn goet wyp oitmoedich ende milde

guotz inde gruoetzen, daz ist eyn bilde

5

daz mangen man ergetzen mach.

eyn tzairte wyp reyne das ist eyn tagh

und eyn morgen ruote der suonnen.

den hertzen de dar nicht enconnen

vro gesyn vuor mange sorgen,

10

den kan suolg wyp vreude borgen.

eyn wyplich wyp daz ist eyn anger

na dem mangen wirt vil banger

dan na des ewigen ryches troone.

wyp draynt ertscher vreuoden croone.

15

Men schryft van coninc Artus hove

und pryst ouoch den mit groesme love,

want da was stoltze ritterschaft,

die duocke mit stoltzer mannes craft

duorch ere waeghden lyp und guot.

20

mange druoegh da lewes muot,

die besser syn wolde dan eyn ander.

noch Artuoer noch ouch Alexander

in wuonnen nie so rychen hof,

he in muost vergaen al sonder lof,

25

erluochten da nicht wyflich wyf,

want alre mannen leits verdryf

synt wyf geseyt ind wail gelaissen.

manich here muos zich tzornes maissen

als hee eyn wyplich wyp aensiet.

30

zelich muos doch syn der zyt

das wibes bilde ye wairt formeert!

eyn wyf mit duochden wail duorch ziert

daz ist eyn cleynoot alzo weert

dem de wyplich zucht begeert.

[18rb]

eyn guot wyp fyn, huoesch und gemeit

ormeret al freude und swachet leit

dem den mynne hait gewont.

ay wye balde wirt hee gesont

als se eyn guotlich woort hem buyt

40

und ym daz na mit guonsten duyt!

Vur al guot prysich wibes namen.

eyn ordelich wyp tzyt inden hamen

der mynnen mangen stoltzen man,

de sich erweren nicht enkan,

45

heen muos yn dienen om ir schuolt,

datz guonst wail sprechen, wesen huolt;

und werlich wie das can erwerben,

aen dem muos freude aen lyden erben.

daz willich allen mannen raden:

50

ze werben vast um ir genaden.

wan sicher wie sich dar aen keyrt

daz hee mit claffen wyp ondeert

und spricht van yn virlaissen woirt,

dien kuoemt an eren nuommer vort.

55

wie wyfs geselschaft pleit verkeren

und sait van yn vyl valscher meren,

he sy hertzoghe, ritter, grebe,

syn geselschaft wirt ongeneem

beyde by mannen und by wyben,

60

laster muos aen eme becliben.

got gebe yn leit und ouoch dem beger,

de sich dar um donct so weger

is yn van wyben goit geschiet.

wie cleyn daz sy (licht es is niet),

65

her baight sich jegen jonck ind alt,

he muos in vreuoden wirden balt

duorch guot daz ym geschiet van wyben.

ich willen by dem selben schriben

de wyflich vreuode zem argste went.

[18va]

ich weis dat sy got zamen scheynt,

want wa sy comment, da ist mer muoede.

dar um yderman sich huode

und rede van wyben nicht dan guot!

Wyp draynt alre eren huot,

75

wyp sint alre werelde troist,

wyp haint mangen man irloist

us commer ind us sorgen benden.

wyp connent leyt in vreuden wenden.

eyn sceymelich wyp van weynich woirden

80

de kan stillich hertzen morden,

yt zwygen vyl bas hertzen crecht

dan de mit worten sich ondecht.

eyn gutlich, fruontlich, wyplich wyp,

guotz behuoet, in stedicheiden styf,

85

virmeystert alre kuonster spil,

wilch zyt se vreude tzoven wil.

rychdom, sterct ind ho gewalt

hait wyplich craft vil duocke irvalt.

leyen, paffen, jueden, heyden

90

muossen irre genaden beyden

als sy van mynnen syn entfengt.

duos wyfs gewalt de werelt drengt.

he sy rych, arm, ho of neder,

gheyn list inmach ym syn wedir.

95

eyn wyf getru aen contrefeit,

die recht nach iren worden deit,

wen se zo lieben sich vorbint,

of se den stede und wairaft fint,

van rechte mach he freuoden sich!

100

can syn gelais dan doin gelych

doch aen tseychen allen luden,

der hertzen daz wil ich edel duyden,

und dee muos zyn eyn selich man

den sulg gut wyf ir minne gan,

105

eyn lutzelich wyf kan wuonder werken;

daz inmach nymont doch vul merken

[18vb]

wy wail eyn lutzelich wyp erfreuot.

eyn plein mit vreuoden wail duorch streuot

daz ist eyn guotlichs wyfs aenschyn

110

und ir wonnencliche bilde fyn,

want is doit truoeren gair verderren

und hertzen duocke in vreuoden werren.

nu denct men guot aen guoden arten

und sprich al guot van wyben zairten:

115

want wie wyfs lof mit love ermeert

und wyf duorch wyflicheit ouch eyrt,

de sal sycher wesen daz

he wirt van wyben noch irgatst.

Al wyf prisen ich vuor guot;

120

is eyn of zwa wail onbehoyt

und duoent licht weder wyflicheit,

so synt ir duosent dent is leyt

und huoeden sich voir mannen loes,

dee mange wyf machent eren bloes,

125

daz nicht endeyt der wyf onduocht.

an wyben inwere nicht dan tzuocht,

de wyflich zuocht mit zuochten zuoese,

daz troez so grois ist wybes guoete

daz die nieman kan vuolgruonden.

130

ich ween, mit meysterlichen vonden

geyn man dair zoe konne comen

das hee vuolprisen muocht de vromen

die al die werelt hait van wyben.

ich wil eyn guot wyf werlich scriben

135

vuor al guot mit guode verguot.

eyn wyf de sich vuor wandel huot

und wandelt wyflich al ir leben,

der muoes got hier vyl eren geben

und ouoch hemelsche vreude dort.

140

o wyf, wyflicher salden hort,

got gebe mir vil des ich dir gan!

[19ra]

ich wil dir weynschen, of ich kan,

vreuoden heyls bis aen myn doet.

got huoede goede wyf vuor alle noet,

145

wan sy ensyn nicht arger wert

dan guotz, des ouoch ir hertz begert.

o got, nu mach mir vreuden rych

mit wyben, got, des bid ich dich,

und halt mich mit ym gespart,

150

bis ons Maria die maget zart

bedect mit yren vreuden cleyde;

so syn wir vry vur allen leyde!

Explicit.