B  I  B  L  I  O  T  H  E  C  A    A  U  G  U  S  T  A  N  A
           
  Matthäus Roricʒer
ca. 1430 - ca. 1492/95
     
   


P u e c h l e i n   d e r  
f i a l e n   g e r e c h t i k a i t


B l a t t   8   v e r s o

___________________________________________________


Darnach wil du dy plumen ʒv dem riſen de(r) fialen ſo tu im alſo mach dy negſt(e)n figur wid(er) abe(r) dw darfſt kain ʒiffer od(er)
puchſtab(e)n dar ʒv mach(e)n dan allain auf dem mittelriſ vnt(e)n das .a. vn(d) ob(e)n d(a)ʒ .b. Darnach ſecʒ ain ʒirkel auf das .a. jn dem gruntlein d(er) fialen vnd ʒuich den ʒirkel auf pis ʒv dem .b. dy
ſelb(e)n weit(e)n ſecʒ mit ainem ort auf das .b. jn dem mittelriſſ des riſens d(er) fialen vn(d) mach ain pu(n)ckt vnte(r)ſich auf de(m) mitelriſʒ do mach ain .c. Darnach mach ain linj vbe(r) cʒwerch durch das .c. wirt dy linj .d.c.e. Darnach ſecʒ den ʒirkel auf de(n) mittelriſ jn de(m) gru(n)tlein auf d(er) linj .a.b. vn(d) ʒuich de(n) ʒirkel auf pis ʒv de(m) .a. od(er) .b. wan das ain weit iſt dy ſelben weit ſecʒ auf d(a)ʒ .c. jn dem riſen d(er) fialen vnd [vnd] mach auf j(e)de ſeiten ain pu(n)ckt mit den puchſtaben .d.e. Darnach tail dy weit(e)n jn dem gru(n)tlein
d(er) fialen von de(m) .a. pis ʒv de(m) .b. jn drew gleiche tail ſa(m) alſo wa(n) d(a)ʒ iſt dj ſelbig weit

a           c           d           b
°           °           °           °

vn(d) dy cʒwen puchſt(a)b(e)n .c..d. cʒwiſchen dem .a. vn(d) dem .b. das tail in drew tail Darnach ſecʒ den ʒirkel auf das .a. vn(d) ʒuich den ʒirkel auf d(er) linj dy jn drew glei(c)he tail getailt jſt pis ʒv dem .d. das ſen cʒwai tail dj ſelb(e)n weit(e)n ſecʒ auf das .c. an dem riſen d(er) fialen vn(d) mach ain punckt vnterſich gegen dem .a. auf dem mittelriſſʒ des riſens da ſecʒ ain .f. Darnach mach ain lini vber cʒwerch wirt dy linj .g..f..h. Darnach ʒuich ain linj von dem .d. in das .g. des gleich(e)n von dem .e. in das .h. Darnach ſecʒ den ʒirkel auf den mittelriſſ auf d(er) lini .a..b. vnd ʒuich in auf pis auf dy lini .e..h. in dem gruntlein d(er) fialen dy ſelbige(n) weite(n) ſecʒ auf das .b. in dem riſen d(er) fialen vn(d) mach ain pu(n)ckt auf de(m) mittelriſʒ des
riſe(n)s d(er) fial(e)n vnte(r)ſich do mach ain .i. Darnach ʒuich ain linj vbe(r) ʒwerch jn dem ſelb(e)n .i. Darnach tail von dem .e. pis ʒv dem .h. an d(er) plume(n) des riſe(n) d(er) fial(e)n jn drew gleiche tail da ſecʒ dy cʒwe(n) pu(c)hſtab(e)n .l.m. Darnach ſecʒ den ʒirkel auf das ſelbig .l. vn(d) ʒuich jn auf pis ʒw dem .h. dy ſelbig weit(e)n ſecʒ
ob(e)n auf das .i. vnd mach vnterſich ain punckt auf dem mittelriſ
des riſens d(er) fialen do mach ain .k. jn dem ſelben .k. mach auch
ain linj vber ʒwerch Darnach ſecʒ den ʒirkel auf den mittelriſ
jn dem grunt auf d(er) linj .i.k. vnd ʒuich jn auf pis ʒv dem .i.
oder .k. wan das ain weit jſt dy ſelb(e)n weiten ſecʒ auf das .i.