Handschrift B

____________________________________________________________

VI

(HS A 37v, HS B 2v, HS c 6rv, Klein 6)

I

JCH ſpür ain tyer/

mit füſſen brait gar ſcharpff ſind jm die horen/

das wil mich tretten jndie erd/

und ſtößlichen durch boren/

5

den ſlund ſo hat es gen mir kert/

als ob ich jm für hunger ſey beſchert/

Und nahet ſchier/

dem herczen mein in befündlichem getöte/

dem tier ich nicht geweichen mag/

10

owe der großen nöte/

ſeyd all mein jar zu einem tag/

geſchübert ſein die ich ye hab uerzert/

Jch bin erfordert an den tancz/

do mir geweiset würt/

15

all meiner ſünd ein groſſer krantz/

der rechnung mir gebürt/

doch wil es got der ainig man /

ſo wirt mir pald ein ſtrich da durch getan

II

ERſt deucht mich wol/

20

ſolt ich newr leben eines jares lenge/

uernünftiklich in diser welt/

ſo wolt ich ma[n]chen enge/

mein ſchuld mit klainem widergelt/

der ich laider groſs uon ſtund bezalen müſs/

25

Darumb iſt uol/

das herczen mein uon engeſtlichen ſorgen /

und iſt der tod die mynſt gezalt/

o ſel wo biſtu morgen/

wer iſt dein tröſtlich ufenthalt/

30

wenn du verraiten ſolt mit haiſſer buſs /

O kinder freund geſellen rain /

wo iſt ewr hilff und rat/

jr nempt das güt lat mich allain/

hin uaren in das bad/

35

da alle müncz hat klainen werd/

newr güte werck ob ich der hett gemert –

III

Allmächtikait/

an anefangk noch end bys mein gelaite/

durch all dein barmung göttlich groſs/

40

das mich nicht überraite/

der lucifer und ſein genos/

da mit ich werd enzuckt der helle ſlauch/

Maria mayd/

erman dein liebes kind des großen leiden/

45

ſeyt er all criſtan hat erloſt/

ſo well mich ouch nicht meyden/

und durch ſein marter werd getroſt/

wenn mir die ſel fleuſst uon des leibes drouch/

O welt nu gib mir deinen lon /

50

trag hin vergiß mein bald/

hett ich dem herren für dich ſchon/

gedient jnwildem wald/

ſo für ich wol die rechten far /

got ſchepffer leucht mir Wolkenſteiner klar etc.