Handschrift B

____________________________________________________________

XII

(HS A 7r-7v, HS B 5r-5v, HS c 13v-14v, Klein 12)

I

JNfrankereich/

yſpanien Aragun Caſtilie Engelant/

Tennmarckh Sweden Behem ungern dort/

5v

Jnpüllen und Afferen/

5

jn Cippern und Cecilie/

jnportugal Granaten Soldans kron/

Die ſechzehen künigreich/

hab ich umbfaren und uerſücht bys das ich uand/

mit treuen newr ein ſtäten hort/

10

der wil mich trew geweren/

umb meinen dienſt an zweifels we/

mag ich jr newr zu willen leben ſchon/

Doch hab ich troſt ob ich jr huld/

uerlur oder iren ſun/

15

das ſys nit räch nach meiner ſchuld/

als andr' frowen tün/

und ſey dorjnn genëdig mir/

bys das ich widerzäm jr freuntſchaft ſchier/

II

KAin ſchöner weib/

20

nye mentzſch geſach mit ougen zwar und wer ſy kent/

der müß mir des verſchulde iehen/

an ir iſt nicht verhönet/

ir amplick prehent als die ſunn/

liecht öglin klar und einen rotn' mund/

25

Wie möcht mein leib/

nu traurig ſein wen ich gedenck von wort zu end/

das ich die rain ſol aneſehen/

uor mir köſtlich gekrönet/

ir zarter leib geit freud und wün/

30

und wër ich ſiech ſy macht mich ſchier geſund/

Czwar ich gewün ſein kain verdrieß/

möcht ich jrs aberkoſen/

das ſy mich jn jern garten ließ/

do ſy ſwantzt durch die roſen/

35

und wurd mir do ein krentzlin grün/

uon jrem gunſt ſo wër ich freuden kün/

III

UJer künigin/

uerkrönt uon den mir eren uil beſchehen iſt/

der ich für war nye wirdig ward/

40

und manche fürſtin ſchöne/

die mich zu ſchallen mit ir bat/

wenn ich mein danck volbracht auf einem knye/

Als ichs beſynn/

ſo iſt mein frow hoch für ſy alle mit klügem liſt/

45

geworcht nach adeleicher art/

das menczſch nye ſüſſer döne/

auf kainer zung uernomen hat/

wen ſy jr ſtym ye freundlich hören lye/

Sy dempft die gantzen muſica/

50

mit großer reſonancz/

die recht menſur appoſita/

all noten hol und gantz/

lat ſy erzittren durch jr kel/

das es erklingt inmeines herczen ſel/

IV

UNd wer parys/

uenedigk Bruck Thomaſch und die trippel jnbarbarey/

mit berlin gold als ÿberſtreut/

und jenau uol karfunkel/

und perſolon mit dyamant/

60

und mumpoliers vol aller maiſt' kunſt/

Dennoch wër ſys/

die diſen ſchatz swër überwäg mit eren frey/

die mich zu mancher ſtund erfreut/

wo ich jntrauren tunckel/

65

durch tauſent maſchen bin verwant/

ſo loßt ſy mich aus mangem tieffen runſt/

An tadel rain diemütiklich/

mit aller tugenthait/

jnallem wandel züchtiklich/

70

ſo herſcht die ſchöne mayd/

umb trauren gëb ich nicht ein ſtro/

wil ſy mir wol ſo fürcht ich nyemands dro/

V

ACh frowen ſchar/

es wër wol czeit ein vrlob ſolt ich uon ew hän/

75

ewr leib betreugt mich alſo ſer/

mein troſt iſt euch unmëre/

mein dienſt der loufft newr hinden nach/

ſeyt mir die weyß durch braunen bart aufdringt/

Jch hoff die klar/

80

die zart die rain die minikliche wolgetan/

wil an mir haltn' weiplich er/

ob ich ſy nicht beſwäre/

und wennt mir lieplich ungemach/

dieſelbig lieb mich allczeit billeich zwingt/

85

Jr kayſer künig herczog freyen/

dinſtman wer ſey ſein/

darüber wil ich geuden greyen/

mit der frowen mein/

und die ir trew an mir nicht bricht/

90

ob ich jr dien mit williklicher phlicht –

Nota diſs uorgeſchriben lied

O ſnöde werlt etc.