BIBLIOTHECA AUGUSTANA

 

Heliand

um 830

 

Heliand

 

Fitte XXXIX

 

______________________________________________________________________________

 

 

3170

| Thô giuuêt imu uualdand Crist

eft an Galileo land,| sôhte is gadulingos,

mahtig is mâgo hêm,| sagde thar manages huat

berhtero bili{d}eo,| endi that barn godes

them is sâligun gesî{d}un| sorgspell ni forhal,

3175

ac he im openlîco| allun sagde,

them is gôdun iungarun,| huô ine scolde that Iudeono folc

uuêgean te uundrun.| Thes uur{d}un thar uuîse man

suuî{d}o an sorgun,| uuar{d} im sêr hugi,

hriuuig umbi iro herte:| gihôrdun [iro hêrron] thô,

3180

uualdandes sunu| uuordun tellien,

huat he undar [theru] thiodu| tholoian scolde,

uuilliendi undar themu uuerode.| Thô giuuêt imu uualdand Crist,

gumo fan Galilea,| sôhte imu Iudeono burg,

quâmun im te Cafarnaum.| Thar fundun sie ênan kuninges thegan

3185

uulankan undar themu uuerode:| qua{d} that he uuâri giuueldig bodo

a{d}alkêsures;| he grôtte aftar thiu

Sîmon Petrusen,| qua{d} that he uuâri gisendid tharod,

that he thar gimanodi| manno gehuiliken

thero hô{b}idscatto,| the sie te themu ho{b}e scoldin

3190

tinsi gelden:| «nis thes tueho ênig

gumono nigiênumu,| ne sie [ina fargelden] sân

mê{d}mo kusteon,| [biûten] iuuue mêster [êno]

[ha{b}ad] it farlâten.| Ni scal that lîcon uuel

mînumu hêrron,| sô man it imu at is ho{b}e kû{d}id,

3195

a{d}alkêsure.»| Thô geng aftar thiu

Sîmon Petrus,| uuelde it seggian thô

hêrron sînumu:| he uuas is an is hugi [iu than,]

giuuaro uualdand Crist:| – imu ni mahte uuord ênig

biholen uuer{d}en,| he uuisse hugiskefti

3200

manno gehuilikes –:| hêt thô thene is mârean thegan,

Sîmon Petrus| an thene sêo innen

angul uuerpen:| «[suliken] sô thu thar êrist [mugis]

fisk gifâhen», [qua{d} he],| «sô teoh thu thene fan themu flôde te thi,

antklemmi imu [thea] kinni:| thar maht thu undar them kaflon nimen

3205

guldine scattos,| that thu fargelden maht

themu manne te gimôdea| mînen endi thînen

tinseo sô huilican,| sô he ûs tô sôkid.»

He [ni] thorfte imu thô aftar thiu| ô{d}aru uuordu

fur{d}ur gibioden:| geng fiscari gôd,

3210

Sîmon Petrus,| uuarp an thene sêo innen

angul an û{d}eon| endi up gitôh

fisk [an] flôde| mid is folmun tuêm,

teklôf imu [thea] kinni| endi [undar] them kaflun nam

guldine scattos:| dede al, sô imu the godes sunu

3215

uuordun geuuîsde.| Thar uuas thô uualdandes

megincraft gimârid,| huô scal [allaro] manno gehuilic

suî{d}o uuilliendi| is uueroldhêrron

sculdi endi scattos,| thea [imu] giskeride sind,

gerno gelden:| ni scal ine fargûmon eouuiht,

3220

ni farmuni ine an is môde,| ac uuese imu [mildi an is hugi,]

thiono imu thiolîco:| an thiu mag he thiodgodes

uuillean geuuirkean| endi ôk is uueroldhêrron

huldi habbien.|