| |
[Bruchordnung
der Stadt Hannover]
Lecht: We lecht buten luchten eder vlas hedde in siner schune eder hove, syn broke is V s(olidos).
We des somers vor mitnacht vur under pannen steckt, syn broke is I solidum.
We deret eder backet unde neyn water dar by hedde, syn broke is I solidum.
Deren: We deret unde dat holt altohant na der wechter klocken nicht ut der dare entoghe, syn broke is I solidum.
Vorkop: We ok dem and(er)n vorkop dede, syn broke is IIII solidos.
We dem andern dreck veghede in de goten, so dat de vor sine dore vlote, syn broke is I solidum.
Mes, erde: We ok mes eder erde lete dreghen up de strate und des na dren daghen nicht en weck voren lete, syn broke is I solidum.
Aaes, vulnisse: We dem and(er)n aaes eder ander vulnisse vor sine dor, eder woninghe bringet eder bringen leth eder getet, de schal dat vorbeteren myt IIII s(olidos).
Solt-kop: Welk borgher uppe karen solt halet eder halen leth uppe syn eventure, de mach id ok van den karen vorkopen und en schal id nicht durer gheven wen alse he id tom ersten male upp steken heft.
Overoken: Neymant en schal overoken kopen van den soltern, de weder to vorkopende, wen des anderen daghes, und de schal malk sellen upp lede, und en schal des nicht durer gheven wen alse de solter dede, de dat erst veyle hadde, van dem de overoke gekoft is.
Waner ok vromede solther myt orem solte tom markede komet, so en schullet de solter, de her wonhaftich synt, nicht vellen den kopp myt orem solte den se gheven hebbet den vromeden solteren to vorvanghe und to schaden, wen se schollet dat gheven, alse se dat erst up steken hebbet, und en scholet den vromeden solteren ore solt nicht afkopen den gemeynen koperen to schaden. We dat vorbreke, de schalt vorbeteren myt eynem punde, vorbreke dat ok eyn solter van orer aller weghen so schal orer iowelk dat io vorbeteren mit eynem punde.
Undorschen korne: Anno domini M° CCCC° XLIIII° in sunte Iligens avende worden de Rat unde Sworen eyn. Also We ungedorschen stro eder voder uppe sinen balken leyde , vor der tiid alse de vurheren ummeghan na der meyntweken unde dar undere backede eder bruwede worde de dar umme beschuldiget van den vurheren de scholde on dat vorbeteren mid eyner brem. mark.
Item En schall nemend nedene in sin hus ungedorschen korn stro eder voder lecgen by eyner brem. mark. id enwere denne dat he van stund dorschen unde by bringen wolde, Unde de wile id dar so lege, scholde men in dem huse neyn vur hebben by demsulven broke vorgenomd.
Hoppe: Ok enscholl nemend vor sunte michels daghe mer hoppen kopen, wen Eyn voder, we dat vorbreke de scholde ed den vurheren vorbeteren, io vor eynen iowelken scepel des he boven eyn voder koffte mid viff schilling.
Ok enschall nemend jenigen hoppen dem anderen to schoverhodekope, noch ienigerleyewiis mid weme bespreken in kope, ome na Sunte michels dage to bringende, by dem broke uppe den hoppen vorscreven.
Korn: Ok enschall nemend jenich korn kopen, dar he dat nicht kopen mach, we dat vorbreke de scholde dat den vurheren vorbeteren mid eynen schillinge vor eynen jowelken schepell to ghevende.
Holt-kole: Item En schall nemend Hold noch kole kopen dar he des nicht kopen mach, we dat vorbreke de schal dat den vurheren vorbeteren, io vor en jowelk voder holtes Eynen schillingh unde vor en jowelk voder kole IIII schilling to ghevende.
Sodane korn hold kole vorgn. schall men allens bynnen der Stad doren kopen nempliken, vor dem leyndore over der ghoten stan na der barvoten brodere kerken uppe der siden unde uppe der anderen siden jegen dem zode over der ghoten by Eylhardes bokholtes huse, vor dem Stendore wan men de flage twe vorkumpt by dem wechterhuse unde vor Sunte Iligens dore dor den slagen by Deptmers van dornde huse unde de straten vorgn. vort alle uth wente uppe den market.
Lenewant, wulle, vlas, was, eyer, kese, bottern: Item lenewant, wulle vlas, was, lamer, heyken, gose, botteren, honere, keyse und eyer und allerleye kopenschup schal me alle bynnen den doren kopen. De broke is van der stighe lenewand IIII schilling, vor jowelk stucke wasses IIII schilling, vor jowelk cluwede wulle IIII schilling, [für:] lammer, hoken, ghose, honer, bottern, kese, eyer und ander kopenschup IIII schilling, so vaken dat vorbroken worde und we dar umme beschuldiget worde.
Ane perde, koye, schap, swyn mach me kopen vor den doren malk to siner behof. Dar en schal malk neyne bate myt den borgeren und inwoneren ane soken. Unde in dessen vorscr(evenen) schal me neynen vorkop doen. De broke is vor jowelk hoved IIII schilling. Dar sint enbuten de jarmarket dage unde alse id hir vry is.
We ok sodan, wat alse vorscreven steyt, in de stad leydede, de scholde des sulven brokes plichtich wesen, de dar up gesath is. Dat he so gheleydede alse vorscreven is.
|