BIBLIOTHECA AUGUSTANA

 

Menandros

344/43 - 292/91 a. Chr. n.

 

Γνῶμαι μονόστιχοι

 

Μονόστιχοι Υʹ

 

___________________________________________________

 

 

777

Ὑφ᾽ ἡδονῆς <ὁ> φρόνιμος οὐχ ἁλίσκεται.

778

Ὑπὲρ σεαυτοῦ μὴ φράσηις ἐγκώμιον.

779

Ὑγίεια καὶ νοῦς ἀγαθὰ τῶι βίωι πέλει.

780

Ὑπόνοια δεινόν ἐστιν ἀνθρώποις κακόν.

781

Ὑπὲρ εὐσεβείας καὶ λάλει καὶ μάνθανε.

782

Ὕπνος θανάτου γὰρ προμελέτησις τυγχάνει.

783

Ὕπνος δὲ πάσης ἐστὶν ὑγίεια νόσου.

784

Ὕπνος τὰ μικρὰ τοῦ θανάτου μυστήρια.

785

Ὑπὸ τῆς ἀνάγκης πάντα δουλοῦται ταχύ.

786

Ὑπὸ τῆς ἀνάγκης πολλὰ γίγνεται κακά.

787

Ὑπερήφανον πρᾶγμ᾽ ἐστὶν ὡραία γυνή.

788

Υἱῶι μέγιστον ἀγαθόν <ἐστ᾽> ἔμφρων πατήρ.

789

Ὕπνος πέφυκε σωμάτων σωτηρία.

790

Ὕπνος δὲ πεῖναν τὴν κατ᾽ ἔσχατον δαμᾶι.

791

Ὑπὲρ σεαυτοῦ καὶ φίλου μάχου πάνυ.

792

Ὕβριν δὲ τίκτει πλοῦτος ἢ φειδὼ βίου.

793

Ὕφασμ᾽ ὑφαίνειν μάνθανε στροφὰς λόγων.

794

Ὑπερηφανία μέγιστον ἀνθρώποις κακόν.

795

Ὕβρις κακὸν μέγιστον ἀνθρώποις ἔφυ.

796

Ὑπὲρ γυναικὸς καὶ φίλου πονητέον.

797

Ὕπουλος †ἀνὴρ δίκτυον κεκρυμμένον.

798

Ὕδωρ θαλάσσης ὁ τρόπος τῶν δυσκόλων.