Μῦθοι Αἰσώπειοι

___________________________________________________

286.

Μάντις.

(C. 40. F. 113.)

Μάντις, ἐπ᾿ ἀγορᾶς καθήμενος, διελέγετο. Ἐπιστάντος δέ τινος αἴφνης καὶ ἀπαγγείλαντος, ὡς αἱ τῆς οἰκίας αὐτοῦ θυρίδες ἀναπεπταμέναι τε πᾶσαι εἶεν καὶ πάντα τὰ ἔνδον ἀφηιρημένα, ἀνεπήδησέ τε στενάξας καὶ [140] δρομαῖος ἤιει. Τρέχοντα δέ τις αὐτὸν θεασάμενος «ὦ οὗτος,» εἶπεν «ὁ τἀλλότρια πράγματα προειδέναι ἐπαγγελλόμενος, τὰ σαυτοῦ οὐ προεμαντεύου;»

Ὁ μῦθος πρὸς τοὺς τὸν μὲν ἑαυτῶν βίον φαύλως διοικοῦντας, τῶν δὲ μηδὲν αὐτοῖς προσηκόντων προνοεῖσθαι πειρωμένους.