Ein Christlich, vnd gantz lustig Spiel,

Darinn des Antichristlichen Babstthumbs,

Theufflische lehr, vnd wesen,

wunder meisterlich dargeben wird,

der Christlichen iugent inn Deudscher

Nation zum besten, aus dem Latein

Thome Naogeorgi inn deudsche Reim

versetzt durch Joan Tyrolff

zu Cala an der Saal

Paulus Rephun an die Deudschen leser

______________________________________________________________________________

Paulus Rephun an die Deudschen leser.

IHR lieben Deudschen/ so ihr achtet werd

Das auch eur sprach gezirt werd/ und gemert

So last euch gfallen solcherley geticht

Die neben anderm nutz/ auch drauff gericht

5

Das deusche sprach werd gschmuckt/ und reich gemacht

Wie dann/ der diß geticht ins deudsch hat bracht

Hiezu besunder vleis und neygung hat/

Und auch die gnad von Gott/ wie das die that

Aus weisen thut/ und fort auch zeugen wird

10

So anderst auch eur gunst und lieb wird gspürt

Gegn ihm/ wie billich/ und euch gfallen lahn

Sein arbeit/ die er hie bringt auff die pahn/

Darumb wolt das zu lesen euch nicht bschwern

Welchs euch zu nutz/ und Deusche sprach zu mehrn

15

Von ihm verdolmetscht ist/ und Reimweis gstelt

Kauffs/ liß mit vleis/ es rewt dich nicht das gelt

Fürchstu/ das dich vileicht mein urtheil treugt

Sölchs ihm der Tichter des Lateins selbs zeugt/

Weil aber nu diß Spil auch drumb geticht

20

Das es zur besserung würd angericht

Und öffentlich gespielt für jederman

Den grewl des Babstumbs drinn zu zeygen an/

Und doch dieweils so hat die sach begert

Etwas mit worten ist zu reichlich gmehrt

25

Das es nicht künd werdn füglich angericht

Damit man würd des nutzs beraubet nicht

Sind etzlich reim darinn gezeiget an

Die man on bsondern schadn mag aussen lahn

Wenn man sie spilt/ jedoch sonst sehr nutzbar

30

Wenn man mit muß/ das Spiel wil lesen gar

Demnach so jemand hat zu anderm spiln

Zu richten an/ geneigten lust und willn

Der wöll ihm sonderlich das lassen sein

Bevolen auch zu stellen für die gmein

35

Damit man nicht vergeß Bebstlicher art

Und das der Jugnt solch irthumb offenbart

In ursach geb gots wort dest mehr zu liebn

Und sich inn reyner lehr dest bas zu ubn

Welchs alles dann gedeit zu Gottes ehr

Und auch des nechsten nutze fördert sehr.