Sacramentarium Gregorianum

_________________________________________________________

3.

Oratio ad ordinandum presbyterum

Oremus dilectissimi deum patrem omnipotentem, ut super hunc famulum suum, quem ad presbyterii munus elegit, caelestia dona multiplicet: per.

Alia. Exaudi nos [quaesumus], domine deus noster, et super hunc famulum tuum benedictionem sancti spiritus et gratiae sacerdotalis effunde uirtutem: ut quem tuae pietatis aspectibus offerimus consecrandum, perpetua muneris tui largitate consequaris: per.

Consecratio. Domine sancte pater omnipotens aeterne deus, honorum auctor et distributor omnium dignitatum, per quem proficiunt uniuersa, per quem cuncta firmantur amplificatis semper in melius naturae rationalis incrementis per ordinem congrua ratione dispositum: unde et sacerdotales gradus atque officia leuitarum sacramentis mysticis instituta creuerunt, ut cum pontifices summos regendis populis praefecisses, ad eorum societatis et operis adiumentum sequentis ordinis uiros et secundae dignitatis eligeres. Sic in heremo per septuaginta uirorum prudentium mentem Mosi spiritum propagasti, quibus ille adiutoribus usus in populo innumeras multitudines facile gubernauit: sic in Eleazaro et Ithamar paternae plenitudinis abundantiam transfudisti, ut ad hostias salutares et frequentioris officii sacramenta ministerium sufficeret sacerdotum. Hac prouidentia, domine, apostolis filii tui doctores fidei comites addidisti, quibus illi orbem totum secundis praedicatoribus impleuerunt. Quapropter infirmitati quoque nostrae domine haec adiumenta largire, qui quanto magis fragiliores sumus, tanto his pluribus indigemus. Da quaesumus pater in hunc famulum tuum presbyterii dignitatem, innoua in uisceribus eius spiritum sanctitatis, acceptum a te deus secundi meriti munus optineat, censuramque morum exemplo suae conuersationis insinuet: sit probus cooperator ordinis nostri, eluceat in eo totius forma iustitiae, ut bonam rationem dispensationis sibi creditae redditurus aeternae beatitudinis praemia consequatur: per.