Sacramentarium Gregorianum

_________________________________________________________

51.

Sabbato ad sanctos Marcellinum et Petrum

Da quaesumus domine nostris effectum ieiuniis salutarem, ut castigatio carnis adsumta ad nostrarum uegetationem transeat animarum: per.

Super oblata. His sacrificiis domine concede placatus, ut qui propriis oramus absolui delictis, non grauemur externis: per.

Ad completa. Sacramenti tui domine diuina libatio penetra[bi]lia nostri cordis infundat et sui participes potenter efficiat: per.

Super populum. Familiam tuam quaesumus domine continua pietate custodi, ut quae in sola spe gratiae caelestis innititur, caelesti etiam protectione muniatur: per.