Sacramentarium Gregorianum

_________________________________________________________

76.

Feria iiii ad sanctam Mariam maiorem

Praesta quaesumus omnipotens deus, ut qui nostris excessibus incessanter affligimur, per unigeniti tui passionem liberemur: per.

Alia. Deus qui pro nobis filium tuum crucis patibulum subire uoluisti, ut inimici a nobis expelleres potestatem: concede nobis famulis tuis, ut resurrectionis gratiam consequamur: per.

Super oblata. Purifica nos misericors deus, ut ecclesiae tuae preces, quae tibi gratae sunt pia munera deferentes, fiant expiatis mentibus gratiores: per.

Ad completa. Largire sensibus nostris omnipotens deus, ut per temporalem filii tui mortem, quam mysteria ueneranda testantur, uitam nobis dedisse perpetuam confidamus: per.

Super populum. Respice domine quaesumus super hanc familiam tuam, pro qua dominus noster Iesus Christus non dubitauit manibus tradi nocentium et crucis subire tormentum: per.