Hieronymi Cardani

de propria vita liber

____________________________________________________________________________

capvt xxv

Paupertas et detrimenta in patrimonio

―――――

Pauper neque lucri cupidus neque diligens dignitate ornatus uana et ambitiosa, casu ¹⁾ domus, bello in patria et tributis intollerandis quasi perpetuo, familia multa, ab aemulis laceratus, a Collegio diu reiectus, ego quandoque prodigus et inconsideratus; corpore infirmus, furtis dilapidatus ²⁾, profusus in emendis libris, mutata toties nescio an dicam saepius urbe an in urbe habitatione; mora Gallareatae ³⁾ infructuosa ut in XIX mensibus ne XXV coronatos pretium conductae domus lucratus sim; alea aduersa, oppigneratis ornamentis uxoris et supellectile, ut mirum sit potuisse omnibus carere praesidiis; magis, non mendicare carentem; magis adhuc nil admisisse ne cogitasse quidem indignum aut maioribus meis, aut uirtute, aut honoribus quibus antea decoratus eram et in posterum florui, sed ⁴⁾ aequo animo tulisse omnia; haec quindecim annis perpetuis, nec interim munere assidentis medici perfrui uoluisse.

Verum dices, qua ratione? an docuisti priuatim? non. An mutuo accepisti sine pignore? non. An rogasti quenquam ut dono daret? Neque inuenissem puto et puduisset me. An forsan uictum attenuasti? neque illud. Quid ergo? ephemerides scribebam, in scholis a ⁵⁾ Platinis publice docebam, medendo aliquid colligebam, domestici ferme singuli muneri quaestuoso addicti erant, Archinti domus munusculis aliquot adiuuabat, consulta uendebam, fortuita obseruabam et spicilegium imitabar, a sumptu uestiario prorsus abstinebam: ita pertuli aduersam fortunam ut etiam in secunda melius partis fruerer.

――――――――

1) casu D : casus MNS. 

2) dilapidatus NSD : delapidatus M. 

3) Gallareatae MD : Gallareate NS. 

4) sed NSD : sed maximum M. 

5) a NSD : omisit M.