B  I  B  L  I  O  T  H  E  C  A    A  U  G  U  S  T  A  N  A
           
  C. Valerius Catullus
ca. 87 - 54 a. Chr. n.
     
   



C a r m e n  X C V I

[ad Gaium Licinium Calvum.]

_____________________________________


metrum: distichon dactylicum


Si quicquam mutis gratum acceptumve sepulcris
      accidere a nostro, Calve, dolore potest,
quo desiderio veteres renovamus amores
      atque olim missas flemus amicitias:
5
certe non tanto mors immatura dolorist
      Quintiliae, quantum gaudet amore tuo.