Le Roman de la Rose

Chapitre IX

____________________________________________________________________________

Ici parole de Jonesce

Qui tant est sote et jengleresce.

La bele Oiseuse vint après,

1252

Qui se tint de moi assez près.

De cele vos ai je senz faille

Dite la façon e la taille;

Ja plus ne vos en iert conté,

1256

Car ce fu cele qui bonté

Me fist si grant qu'ele m'ovri

Le guichet dou vergier flori.

Après se tint, mien escient,

1260

Jonece au vis cler e riant,

Qui n'avoit encore passez,

Si con je cuit, doze anz d'assez.

Nicete fu, si ne pensoit

1264

Nul mal ne nul engin qui soit;

Mais mout iert envoisiee e gaie,

Car juene chose ne s'esmaie

Fors de joer, bien le savez.

1268

Ses amis fu de li privez

En tel guise qu'il la baisoit

Toutes les foiz qu'il li plaisoit,

Veianz toz ceus de la querole;

1272

Car qui tenist d'aus deus parole,

Il n'en fussent ja vergondeus;

Ainz les veïssiez entr'aus deus

Baisier come deus colombiaus.

1276

Li yallez fu juenes e biaus,

Si estoit bien d'autel aage

Con s'amie e d'autel corage.

Ensi queroloient ilueques,

1280

Cestes genz, e autres avueques,

Qui estoieni de lor maisnies;

Franches genz e bien enseignies

E genz de bel afaitement

1284

Estoient tuit comunement.