Le Roman de la Rose

Chapitre XX

____________________________________________________________________________

Comment Dangier villainement

Bouta hors despiteusement

L'Amant d'avecques Bel-Acueil,

Dont il eut en son coeur grant dueil.

2920

Atant saut Dangiers li vilains

De la ou il s'estoit muciez.

Granz fu e noirs e hericiez,

S'ot les iauz roges come feus,

2924

Le nés froncié, le vis hisdeus,

E s'escrie con forsenez:

«Bel Acueil, por quoi amenez

Entor ces rosiers cest vassaut?

2928

Vos faites mal, si Deus me saut,

Qu'il bee a vostre avilement.

Dehé ait, senz vos solement,

Qui en cest vergier l'amena!

2932

Qui felon sert itant en a.

Vos li cuidiez bonté faire

E il vos quiert honte e contraire.

Fuiez, vassaus, fuiez de ci,

2936

Par poi que je ne vos oci.

Bel Acucil mal vos conoissoit

Qui de vos servir s'angoissoit;

Si le beez a concilier.

2940

Ne me quier plus en vos fier,

Car bien est ores esprovee

La traïson qu'avez covee.»